საწური (ვაზის ჯიში)

მასალა ვიკიპედიიდან — თავისუფალი ენციკლოპედია
Jump to navigation Jump to search

საწური, საწურავი — წითელყურძნიანი საღვინე ვაზის ჯიში. წარმოშობილია აჭარაში. საშუალოზე ძლიერი ზრდის და უხვმოსავლიანი ვაზია. გამოიყენება სუფრის წითელი მშრალი ღვინის დასამზადებლად. ღვინო ფერით ღია წითელი ან მოვარდისფროა. მცირედ ალკოჰოლიანი და ხალისიანი, ნაკლებსხეულიანი, მცირედ გამოხატული ჯიშური არომატით.[1]

ზრდასრული ფოთოლი საშუალო ან საშუალოზე დიდი ზომისა, ოვალური და ხუთნაკვთიანია. ფოთლის ქვედა მხარე ქეჩისებრადაა შებუსული. მტევანი დიდი ზომის, ცილინდრულ-კონუსური ან ცილინდრული ფორმის, ხშირად დატოტვილი თხელი, კუმსი, ზოგჯერ საშუალო სიკუმსის. მტევანს ახასიათებს ერთი ან ორი ფრთა. მარცვალი საშუალო ზომისაა. მცირედ ოვალური, ზოგჯერ მომრგვალო, მუქი წითელი ელფერით, თხელკანიანია. რბილობი მეტად წვნიანია, წვენი შეუფერავი, მოტკბო გემოს მქონე. მტევანში მარცვლების მომწიფება არათანაბრად მიმდინარეობს, რაც ამ ჯიშისათვის დამახასიათებელი თვისებაა. სავეგეტაციო პერიოდი 198 დღემდე გრძელდება. მტევნის წონა 288–300 გრამს შეადგენს. ყურძნის სრული სიმწიფის პერიოდში მისი შაქრიანობა 18–19%-ს, მჟავიანობა კი 9,0–10 /-ს აღწევს.[1]

სქოლიო[რედაქტირება | წყაროს რედაქტირება]

  1. 1.0 1.1 გაზ. „ჩვენი სოფელი“, №5 (55), 15 ივლისი 2020, გვ. 15.