ზურაბ ზვიადაური

ზურაბ ზვიადაური

პირადი ინფორმაცია
ეროვნება	ქართველი
დაბ. თარიღი	2 ივლისი, 1981 (1981-07-02)
დაბ. ადგილი	ახმეტა
სიმაღლე	182 სმ
წონა	90 კგ
სპორტი
ქვეყანა	საქართველო
სპორტი	ძიუდო
მედლები ოლიმპიური თამაშები ოქრო ათენი 2004 90 კგ. მსოფლიო ჩემპიონატი ვერცხლი მიუნხენი 2001 90 კგ. ვერცხლი ოსაკა 2003 90 კგ. ევროპის ჩემპიონატი ბრინჯაო მარიბორი 2002 90 კგ.

ზურაბ მამუკას ძე ზვიადაური (დ. 2 ივლისი, 1981, ახმეტა) — ქართველი სპორტსმენი (ძიუდო), ათენის 2004 წლის ოლიმპიური თამაშების ჩემპიონი, პოლიტიკოსი.

ბიოგრაფია

სასპორტო კარიერა

დაამთავრა საქართველოს ფიზიკური აღზრდისა და სპორტის სახელმწიფო აკადემია ძიუდოს მწვრთნელის კვალიფიკაციით (2005). საერთაშორისო ასპარეზზე გამოდიოდა 1998 წლიდან. იყო მსოფლიოს ჩემპიონი ახალგაზრდებში (2000), მსოფლიოს ორგზის მეორე პრიზიორი (2001; 2003), ევროპის ორგზის ჩემპიონი გუნდურ (2002–2003), ევროპის მესამე პრიზიორი პირად შეჯიბრებაში (2002). ზვიადაურმა 2004 წლის ათენის XXVIII ოლიმპიურ თამაშებში ოქროს მედალი მოიპოვა 90 კგ წონით კატეგორიაში და პირველი ოლიმპიური ჩემპიონი გახდა დამოუკიდებელი საქართველოს ისტორიაში. 2010–2011 წლებში იყო საქართველოს ძიუდოს ეროვნული ნაკრების მთავარი მწვრთნელის თანაშემწე.

პოლიტიკური კარიერა

2012–2016 წლებში ზვიადაური არჩეული იყო საქართველოს მე-8 მოწვევის პარლამენტის წევრად (ახმეტის მაჟორიტარი) საარჩევნო ბლოკიდან „ბიძინა ივანიშვილი — ქართული ოცნება“. იყო პარლამენტის გარემოს დაცვისა და ბუნებრივი რესურსების, ასევე სპორტისა და ახალგაზრდულ საქმეთა კომიტეტის წევრი.

დაჯილდოებულია სპორტის დარგში საქართველოს სპორტისა და ახალგაზრდობის საქმეთა სამინისტროს უმაღლესი ჯილდოთი — სპორტის რაინდის წოდებით (2004), ღირსების (2004) და ბრწყინვალების საპრეზიდენტო ორდენით (2018).

კრიმინალური შემთხვევები

2021 წლის აგვისტოში ზვიადაური დააკავეს სოფ. წინანდალში 27 წლის ნიკა კენჭოშვილის განზრახ მკვლელობის ბრალდებით (ინციდენტის დროს ორმხრივ სროლას ემსხვერპლა ზვიადაურის ძმაც), მაგრამ სასამართლომ იმავე წლის ნოემბერში 50 000-ლარიანი გირაოს სანაცვლოდ გაათავისუფლა. 2025 წლის სექტემბერში ზვიადაური კვლავ დააკავეს ცეცხლსასროლი იარაღისა და საბრძოლო მასალის მართლსაწინააღმდეგო შეძენის, შენახვისა და ტარების ბრალდებით. იმავე წლის ნოემბერში, საპროცესო შეთანხმების თანახმად, მას სასჯელის სახედ განესაზღვრა თავისუფლების აღკვეთა 6 თვით, პირობითი მსჯავრი 4 წლის ვადით და დამატებით სასჯელად დაეკისრა ჯარიმა.

სასპორტო კარიერის ძირითადი მიღწევები

წელი	ტურნირი	მასპინძელი	წონითი კატეგორია	ადგილი
2001	მსოფლიო ჩემპიონატი	მიუნხენი, გერმანია	-90 კგ	02 
2002	ევროპის ჩემპიონატი	მარიბორი, სლოვენია	-90 კგ	03 
2002	ევროპის ჩემპიონატი	მარიბორი, სლოვენია	-90 კგ	01 
2002	მსოფლიოს გუნდური ჩემპიონატი	ბაზელი, შვეიცარია	-90 კგ	02 
2003	ევროპის გუნდური ჩემპიონატი	ლონდონი, დიდი ბრიტანეთი	-90 კგ	01 
2003	მსოფლიო ჩემპიონატი	ოსაკა, იაპონია	-90 კგ	02 
2004	ზაფხულის XXVIII ოლიმპიური თამაშები	ათენი, საბერძნეთი	-90 კგ	01 
2006	ევროპის გუნდური ჩემპიონატი	ბელგრადი, სერბეთი და ჩერნოგორია	-90 კგ	03 
2012	ევროპის ჩემპიონატი	ჩელიაბინსკი, რუსეთი	-90 კგ	01 

ლიტერატურა

• ენციკლოპედია „საქართველო“, ტ. 3, თბ., 2014. — გვ. 367.

რესურსები ინტერნეტში

• ზურაბ ზვიადაური — საქართველოს ბიოგრაფიული ლექსიკონი
• ზურაბ ზვიადაური — ქართული სპორტი
• ზურაბ ზვიადაური — საქართველოს პარლამენტის ოფიციალური საიტი (მოძველებული / არქივი / ახალი არქივი)
• ზურაბ ზვიადაური. საქართველოს ეროვნული ოლიმპიური კომიტეტი.
• ზვიადაურის კარიერის სტატისტიკა დაარქივებული 2020-04-18 საიტზე Wayback Machine. .
• ოფიციალური საიტი facebook-ზე.