შალვასეული ქარვისფერი
შალვასეული ქარვისფერი — ქართული თეთრყურძნიანი სელექციური სასუფრე-საღვინე ვაზის ჯიში.
გამოყვანილია 1945 წელს სელექციონერ ვასილ ბესტავაშვილის მიერ შასლასა და ჩინურის შეჯვარებით.
ბოტანიკური აღწერა[რედაქტირება | წყაროს რედაქტირება]
ზრდასრული ფოთოლი საშუალო ზომისაა, მომრგვალო ან ოდნავ მოგრძო ფორმის, ხუთნაკვთიანი, ღრმად დანაკვთული. ფოთლის ქვედა მხარე დაფარულია მოკლე ჯაგრისებრი შებუსვით. ყვავილი ორსქესიანია. მტევანი საშუალოზე დიდი ზომისაა, კონუსური ან ცილიდრულ-კონუსური ფორმის, მხრიანი, საშუალო სიკუმსის ან კუმსი. გვხვდება მეჩხერი მტევნებიც. მარცვალი საშუალო ზომისაა, მრგვალი ან მომრგვალო ფორმის, მომწვანო-მოყვითალო, მზის მხარეზე ქარვისფერ-მოყავისფრო ლაქებით. კანი თხელი ან საშუალო სისქისაა, ადვილად სცილდება რბილობს. რბილობი საკმაოდ წვნიანი და ხორციანია, ტკბილი და სასიამოვნო გემოთი.
შალვასეული ქარვისფერი სიმწიფის საადრეო პერიოდის სასუფრე-საღვინე ვაზის ჯიშია. სრულ სიმწიფეში სექტემბრის პირველ ნახევარში შედის. ყურძნის სრული სიმწიფის პერიოდში მისი შაქრიანობა აღწევს 19%-ს, ხოლო მჟავიანობა — 6.5 გ/ლ-ს.
გამოიყენება როგორც სასუფრედ, ასევე მაღალხარისხიანი სუფრის თეთრი მშრალი ღვინის დასამზადებლად. ღვინო ღია-ჩალისფერია, ზომიერი სხეულით, ხალისიანი სიმჟავითა და ჰარმონიული გემოთი.
ლიტერატურა[რედაქტირება | წყაროს რედაქტირება]
- უჯმაჯურიძე ლ., კაკაბაძე გ., მამასახლიშვილი ლ., „ქართული ვაზის ჯიშები“, თბ., 2018, გვ. 563