გაღმოური კაპისტონი
გაღმოური კაპისტონი — ქართული აბორიგენული წითელყურძნიანი საღვინე ვაზის ჯიში რაჭიდან.
გაღმოური კაპისტონი რაჭაში უძველესი დროდანაა ცნობილი.
ბოტანიკური აღწერა[რედაქტირება | წყაროს რედაქტირება]
ზრდასრული ფოთოლი მცირე ზომისაა, ოვალური, სუსტად დანაკვთული ან თითქმის დაუნაკვთავი. ფოთლის ქვედა მხარე საშუალო სიხშირის აბლაბუდისებრადაა დაფარული. ყვავილი მდედრობითია. მტევანი მცირე ზომისაა, კონუსური ან ცილინდრულ-კონუსური ფორმის, თხელი. მარცვალი საშუალო ზომისაა, თითქმის ოვალური, შავი, თხელი კანი ცვილისებრი ფიფქით უხვადაა დაფარული. რბილობი წვნიანია, წვენი — შეუფერავი.
გაღმოური კაპისტონი საშუალო ზრდისა და დაბალმოსავლიანია. სავეგეტაციო პერიოდის ხანგრძლივობა კვირტის გაშლიდან სრულ სიმწიფემდე 163 დღეა, ხოლო სრულ სიმწიფეში სექტემბრის ბოლოს შედის. ვაზი საშუალო ზრდისაა. მტევნის წონა 60-80 გრამია. ამ ჯიშის საჰექტარო მოსავლიანობა 6.0-8.0 ტონაა. ყურძნის სრული სიმწიფის პერიოდში მისი შაქრიანობა აღწევს 18-20%-ს, ხოლო მჟავიანობა — 8-9 გ/ლ-ს.
მიიღება სუფრის წითელი ღვინო.
ლიტერატურა[რედაქტირება | წყაროს რედაქტირება]
- უჯმაჯურიძე ლ., კაკაბაძე გ., მამასახლიშვილი ლ., „ქართული ვაზის ჯიშები“, თბ., 2018, გვ. 93