საქართველოს სახელმწიფო გერბი

ვიკიპედიიდან

საქართველოს სახელმწიფო გერბი შემოღებულ იქნა საქართველოს ორგანული კანონის საფუძველზე, რომელიც ძალაში შევიდა საქართველოს პრეზიდენტის ხელმოწერის შემდეგ 2004 წლის 1 ოქტომბრიდან. ეს კანონი ადგენს საქართველოს სახელმწიფო გერბის, როგორც სახელმწიფო სიმბოლოს, აღწერილობას, მისი გამოსახვის ფორმებს, გამოყენების სფეროს, გამოყენებისა და დაცვის წესს. სახელმწიფო გერბის ავტორია მხატვარი, ჰერალდიკოსი მამუკა გონგაძე.

საქართველოს სახელმწიფო გერბი გამოისახება სახელმწიფო და მცირე სახელმწიფო გერბების ფორმით.

სექციების სია 1 სახელმწიფო (დიდი) გერბი 2 მცირე სახელმწიფო გერბი 3 ყოფილი გერბები 4 საინტერესო ცნობები 5 რესურსები ინტერნეტში

[რედაქტირება] სახელმწიფო (დიდი) გერბი

სახელმწიფო გერბი წარმოადგენს ჰერალდიკურ ფარს, რომლის მეწამულ ველზე გამოსახულია ოქროს ჯვრის ბუნიანი ვერცხლის შუბოსანი, ვერცხლის გველეშაპის განმგმირავი, ვერცხლის ცხენზე ამხედრებული, ოქროს შარავანდედიანი ვერცხლის მხედარი – წმინდა გიორგი. ფარი დაგვირგვინებულია ივერიული (ქართული) გვირგვინით. ფარისმტვირთველი ორი ოქროს ლომი ვაზის სტილიზებული ორნამენტის საფუძველზე დგას. საფუძველზე გადმოფენილია ვერცხლ-მეწამული სადევიზე ბაფთა (ავერსი – ვერცხლი, რევერსი – მეწამული). ბაფთის ვერცხლის ველზე სევადისფერი ქართული მხედრული ანბანით წარწერილია დევიზი: „ძალა ერთობაშია“. ბაფთაზე, სადევიზე წარწერის თავსა და ბოლოში, გამოსახულია მეწამული ჰერალდიკური ჯვრები.

[რედაქტირება] მცირე სახელმწიფო გერბი

მცირე სახელმწიფო გერბი წარმოადგენს ჰერალდიკურ ფარს. ფარის მეწამულ ველზე გამოსახულია ოქროს ჯვრით დაბოლოებული ვერცხლის შუბით ვერცხლის გველეშაპის განმგმირავი ვერცხლის მხედარი – წმინდა გიორგი ოქროს შარავანდედით. ფარზე ივერიული (ქართული) გვირგვინია.

[რედაქტირება] ყოფილი გერბები

1918-1921 და 1989-2004 წლების გერბი

საბჭოთა საქართველოს გერბი

[რედაქტირება] საინტერესო ცნობები

• საქართველოს სახელმწიფო გერბზე ბრიტანეთის ჰერალდიკოსების კოლეჯის რეკომენდაციებით გარკვეული დეტალები შეიცვალა. ასევე შეიცვალა გერბზე გამოსახული ფარის ფორმა, რომელზეც წმინდა გიორგია გამოსახული. ვაზის ფოთოლი კი, წითელმა ჯვრებმა ჩაანაცვლა. [1];

[რედაქტირება] რესურსები ინტერნეტში

• საქართველოს ორგანული კანონი საქართველოს სახელმწიფო გერბის შესახებ;
• გერბის აღწერილობის ოფიციალური ვერსია;
• საქართველოს ორგანული კანონი საქართველოს სახელმწიფო გერბის შესახებ, (პირვანდელი სახით);
• მამუკა გონგაძე სახელმწიფო გერბის შესახებ («ჯი-ეიჩ-ენი»);
• საქართველოს სახელმწიფო გერბში ცვლილებები შევა