დავით ზალკალიანი

მასალა ვიკიპედიიდან — თავისუფალი ენციკლოპედია
Jump to navigation Jump to search
დავით ზალკალიანი
დავით ზალკალიანი
საქართველოს საგარეო საქმეთა მინისტრი
ამჟამინდელი თანამდებობა
დაიკავა21 ივნისი, 2018
პრეზიდენტი  გიორგი მარგველაშვილი სალომე ზურაბიშვილი
პრემიერ-მინისტრი  მამუკა ბახტაძე გიორგი გახარია
წინამორბედიმიხეილ ჯანელიძე

დაბადებული27 თებერვალი, 1968 (1968-02-27) (51 წლის)
მოქალაქეობასაქართველო
ეროვნებაქართველი

დავით ზალკალიანი (დ. 27 თებერვალი, 1968) — ქართველი დიპლომატი, 2018 წლის 21 ივნისიდან საქართველოს საგარეო საქმეთა მინისტრი.

კარიერა[რედაქტირება | წყაროს რედაქტირება]

1992 წელს, საქართველოს დამოუკიდებლობის აღდგენის შემდეგ, დავით ზალკალიანმა მუშაობა დაიწყო საქართველოს საგარეო საქმეთა სამინისტროში საერთაშორისო ორგანიზაციების დეპარტამენტში ატაშეს პოზიციაზე, ხოლო სამ წელიწადში - 1995 წელს იმავე დეპარტამენტში, სამმართველოს უფროსის მოადგილის თანამდებობაზე. ამ პერიოდში მნიშვნელოვანი გამოწვევა იყო საერთაშორისო ორგანიზაციებში საქართველოს ადგილის დამკვიდრება და მათ საქმიანობაში აქტიური მონაწილეობა. ამ პერიოდში საქართველომ დაიწყო თანამშრომლობის გაღრმავება ევროგაერთიანებასთან (მოგვიანებით ევროკავშირი), რომელმაც 1992 წელს საქართველო აღიარა დამოუკიდებელ სახელმწიფოდ. იმ დროისთვის საქართველოს და ევროგაერთიანების თანამშრომლობა ძირითადად ჰუმანიტარულ და ტექნიკურ საკითხებზე იყო ორიენტირებული, რაშიც დავით ზალკალიანი აქტიურად მონაწილეობდა.

1996-2000 წლებში ზალკალიანმა მუშაობა განაგრძო საქართველოს საელჩოში ავსტრიის რესპუბლიკაში მრჩევლის თანამდებობაზე. მონაწილეობდა ევროპაში ჩვეულებრივი შეიარაღების ადაპტირების ხელშეკრულების მოლაპარაკებების პროცესში, ასევე ეუთოს ბუდაპეშტის 1994 წლის, ლისაბონის 1996 წლის და სტამბულის 1999 წლის სამიტებში. დავით ზალკალიანი აქტიურად იყო ჩართული საქართველოს ტერიტორიიდან რუსეთის ფედერაციის სამხედრო ბაზების გაყვანასთან დაკავშირებული მოლაპარაკებების პროცესში. მისი ავსტრიაში მუშაობის პერიოდში საქართველოს ელჩი ვენაში გამოჩენილი ქართველი დიპლომატი, ლევან მიქელაძე, იყო. შემდგომში ლევან მიქელაძესთან ერთად დავით ზალკალიანი საზოგადოებრივ-პოლიტიკურ საქმიანობაში გადაინაცვლებს.

2000-2001 წლებში ზალკალიანმა საგარეო საქმეთა სამინისტროში ევროპულ საქმეთა დეპარტამენტში მრჩევლის პოზიციაზე განაგრძო კარიერა. მისი საქმიანობის სფერო მოიცავდა ევროპის ქვეყნებთან ორმხრივი ურთიერთობების გაღრმავებას.

2001-2002 წლებში ზალკალიანი ისევ დაბრუნდა ვენაში და საქართველოს მუდმივი წარმომადგენლის მოადგილის თანამდებობა დაიკავა.

2002-2004 წლებში დავით ზალკალიანმა მუშაობა აშშ-ში, კანადასა და მექსიკაში საქართველოს საელჩოში უფროსი მრჩევლის პოზიციაზე გააგრძელა. მისი მუშაობის პერიოდს უკავშირდება აშშ-ს დახმარების გაძლიერება თავდაცვის სფეროში.

აშშ-ში მუშაობის შემდეგ დავით ზალკალიანი 2004 წელს დაინიშნა უზბეკეთისა და ტაჯიკეთის რესპუბლიკებში საქართველოს საგანგებო და სრულუფლებიან ელჩად. ამ პერიოდში ქვეყნებს შორის ორმხრივი ურთიერთობები პოლიტიკური და ეკონომიკური კუთხით უფრო ინტენსიური გახდა.

2007 წელს ზალკალიანი იყო საქართველოს საგარეო საქმეთა სამინისტროს გლობალურ ურთიერთობათა დეპარტამენტის დირექტორი, მომდევნო ერთი წლის მანძილზე საქართველოს საგარეო საქმეთა სამინისტროს საგანგებო დავალებათა ელჩი.

2008 წელს დავით ზალკალიანი დაინიშნა ბელარუსის რესპუბლიკაში საქართველოს საგანგებო და სრულუფლებიან ელჩად.

დავით ზალკალიანმა 2009 წელს დატოვა ელჩის თანამდებობა და თანამოაზრეებთან ერთად პოლიტიკურ პროცესებში ჩაერთო. ზალკალიანი აქტიურად მონაწილეობდა „თავისუფალი დემოკრატების“ პარტიის ჩამოყალიბებაში, რასაც 2012 წლის 1 ოქტომბერს საპარლამენტო არჩევნებში კოალიცია „ქართული ოცნების“ გამარჯვება მოჰყვა. პარლამენტში შეიქმნა ფრაქცია „ქართული ოცნება-თავისუფალი დემოკრატები“. იმავე წელს დავით ზალკალიანი საგარეო საქმეთა მინისტრის პირველი მოადგილის პოზიციას იკავებს.

სამინისტროში პირველი მოადგილის თანამდებობაზე დანიშვნიდან, დავით ზალკალიანი სხვა მნიშნელოვან მიმართულებებთან ერთად, აქტიურად მონაწილეობდა საქართველო-ევროკავშირს შორის ასოცირების ხელშეკრულების მომზადების პროცესში. იგი იყო საქართველოს მხრიდან ასოცირების ხელშეკრულების მთავარი მომლაპარაკებელი. აღსანიშნავია, რომ მოლაპარაკებები წარმატებით დასრულდა და 2014 წლის 27 ივნისს ხელი მოეწერა ისტორიულ დოკუმენტს - ასოცირების შესახებ შეთანხმებას ევროკავშირსა და საქართველოს შორის, რომელიც მოიცავს ღრმა და ყოვლისმომცველი თავისუფალი ვაჭრობის სივრცის კომპონენტს და ითვალისწინებს ევროკავშირთან დაახლოების მნიშვნელოვან კონკრეტულ მექანიზმებს. ამასთან, 2012-2014 წლებში ზალკალიანი იყო ჟენევის საერთაშორისო დისკუსიებში საქართველოს მხრიდან მთავარი მომლაპარაკებელი და აშშ-საქართველოს სტრატეგიული პარტნიორობის ქარტიის სამუშაო ჯგუფების თანათავმჯდომარე.

2015 წელს დავით ზალკალიანმა საქმიანობა განაგრძო ახლად დაფუძნებულ ლევან მიქელაძის სახელობის ფონდში, აღმასრულებელი დირექტორის თანამდებობაზე. ფონდში ყოფნის პერიოდში მისი საქმიანობა იყო დაკავშირებული საჯარო პოლიტიკის კვლევებისა და ადვოკატირების პროექტების განხორციელებასთან, დიპლომატებისთვის შესაძლებლობების გაზრდასთან, აკადემიური და საჯარო დისკუსიების გამართვასთან საგარეო პოლიტიკის პრიორიტეტების შესახებ.

2016-2018 წლებში დავით ზალკალიანმა კვლავ დაიკავა საქართველოს საგარეო საქმეთა მინისტრის პირველი მოადგილის თანამდებობა, ხოლო 2018 წლის 21 ივნისს დაინიშნა საგარეო საქმეთა მინისტრის თანამდებობაზე.

დიპლომატიური რანგი[რედაქტირება | წყაროს რედაქტირება]

2007 წელს მინიჭებული აქვს საგანგებო და სრულუფლებიანი ელჩის დიპლომატიური რანგი.

განათლება[რედაქტირება | წყაროს რედაქტირება]

1992 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტი საერთაშორისო სამართლის სპეციალობით. ფლობს ინგლისურ და რუსულ ენებს.

ოჯახი[რედაქტირება | წყაროს რედაქტირება]

ჰყავს მეუღლე და ორი ქალიშვილი.

რესურსები ინტერნეტში[რედაქტირება | წყაროს რედაქტირება]

პოლიტიკური თანამდებობები
წინამორბედი:
მიხეილ ჯანელიძე
საგარეო საქმეთა მინისტრი
20 ივნისი, 2018 - დღემდე
შემდეგი: