ჯენესისი

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
ჯენესისი
ჯენესისი ასრულებს სიმღერას The Carpet Crawlers პიტსბურგში (პენსილვანია, აშშ), 2007 წლის ტურნეს Turn It On Again ფარგლებში. მარცხნიდან მარჯვნივ: დერილ სტერმერი, მაიკ რეზერფორდი, ტონი ბენქსი, ფილ კოლინზი
ჯენესისი ასრულებს სიმღერას The Carpet Crawlers პიტსბურგში (პენსილვანია, აშშ), 2007 წლის ტურნეს Turn It On Again ფარგლებში. მარცხნიდან მარჯვნივ: დერილ სტერმერი, მაიკ რეზერფორდი, ტონი ბენქსი, ფილ კოლინზი
ბიოგრაფია
წარმოშობა გოდელმინგი, სურეი, ინგლისი
ჟანრ(ებ)ი პროგრესული როკი
არტ როკი
სიმფონიური როკი
ფოლკ როკი
პოპ-როკი
სოფტ-როკი
აქტიური 1967–1998
2006–დღემდე (უმოქმედო)
(გაერთიანებები: 1982, 1999, 2000)
ლეიბლ(ებ)ი Virgin, Charisma, Decca, EMI, London (ამერიკა/იაპონია), Atlantic (აშშ/კანადა), Atco (აშშ/კანადა), Vertigo (ევროპა/აზია)
საიტი ოფიციალური საიტი
წევრები
ტონი ბენქსი
მაიკ რეზერფორდი
ფილ კოლინზი
ყოფილი წევრები
პიტერ გებრიელი
ენტონი ფილიპსი
კრის სტიუარტი
ჯონ სილვერი
ჯონ მეიჰიუ
მიკ ბერნარდი
სტივ ჰეკეტი
რეი უილსონი

ჯენესისი (ინგლ. Genesis) — ბრიტანული როკ-ჯგუფი, ჩამოყალიბებული 1967 წელს. მასში შედიან: დამაარსებლები ტონი ბენქსი (კლავიშიანები) და მაიკ რეზერფორდი (ბასი, გიტარა), აგრეთვე ფილ კოლინზი (ვოკალი, დასარტყმელი საკრავები), რომელიც ჯენესისს 1970 წელს შეუერთდა. ყოფილმა წევრებმა, რომელთა შორის არიან პიტერ გებრიელი (ვოკალი, ფლეიტა), სტივ ჰეკეტი (გიტარები) და ენტონი ფილიპსი (გიტარები) ასევე შეასრულეს მნიშვნელოვანი როლი ჯგუფის ადრეული წლების შემოქმედებაში. ჯენესისი ითვლება ყველა დროის ერთ-ერთ გაყიდვად შემსრულებლად, მსოფლიო მასშტაბით ალბომის დაახლოებით 130 მილიონი გაყიდული ასლით. [1]

1960-იანი წლების მიწურულს, პირველი ალბომის გამოცემისას, ჯენესისის მუსიკა ჯგუფის წევრები და თავად მსმენელები პოპ-ექსპერიმენტად თვლიდნენ, რაშიც იგულისხმებოდა მელოდიური პოპი, რომელსაც იგი ასრულებდა. [2] მოგვიანებით, ერთი წლის განმავლობაში (დაწყებული მეორე ალბომით, რომელიც 1970 წლის შუა პერიოდში გამოვიდა) ჯენესისი გარდაიქმნა პროგრესული როკის შემსრულებელ ჯგუფად, რომლის მუსიკა შეიცავდა სიმღერის რთულ სტრუქტურებს და გულმოდგინედ დამუშავებულ ინსტრუმენტულ ფრაგმენტებს. მათი კონცერტები იქცა თეატრალიზებულ ექსპერიმენტებად, ნოვატორული სასცენო დიზაინებით, პიროტექნიკით, ექსტრავაგანტული კოსტიუმებით და სცენაზე მოთხრობილი ამბებით. ამ მეორე ფაზას ახასიათებდა ხანგრძლივი გამოსვლები, სადაც, მაგალითად, სრულდებოდა 23 წუთიანი „Supper's Ready“ და 1974 წლის კონცეპტუალური ალბომი The Lamb Lies Down on Broadway. 1970-იანი წლების ბოლოს და 1980-იანი წლების დასაწყისში ჯგუფის მუსიკალური მიმართულება კვლავ შეიცვალა, იქცა რა ორიენტირებულად უფრო მეტად პოპ-მუსიკაზე და კომერციულად ხელმისაწვდომად. შედეგად ჯენესისს ჰქონდა აშშ-ს საუკეთესო 40-ეულში მოხვედრილი პირველი სინგლი, „Follow You Follow Me“, ბრიტანეთში პირველი #1 ალბომი Duke და აშშ-ში ერთადერთი #1 სინგლი „Invisible Touch“.

თავისი არსებობისას ჯენესისმა პერსონალის რამდენიმე ცვლილება განიცადა. სცენის შიშის გამო ენტონი ფილიპსი ჯგუფიდან 1970 წელს წავიდა. 1975 წელს ფილ კოლინზი, იმ პერიოდში ჯენესისის დრამერი, ახალი ვოკალისტის ხანგრძლივი ძიების შემდეგ წამყვანი ვოკალისტის სახით პიტერ გებრიელს ჩაენაცვლა. წამყვან ვოკალზე მისი კონცენტრირების გამო ტურნეს მსვლელობისას დასარტყმელ საკრავებზე უკრავდნენ ბილ ბრუფორდი და ჩესტერ თომპსონი, ხოლო კოლინზი მათ დრო და დრო ხანგრძლივი ინსტრუმენტული პასაჟებისას უერთდებოდა. 1977 წელს ჯგუფი დატოვა გიტარისტმა სტივ ჰეკეტმა. მას შემდეგ, რაც ჯენესისიდან 1996 წელს კოლინზი წავიდა, რეზერფორდმა და ბენქსმა მოიყვანეს რეი უილსონი (სტილტსკინი). მასთან ერთად ჩაიწერა 1997 წლის ალბომი Calling All Stations, რასაც მოჰყვა უვადო შესვენება. 2007 წელს ბენქსი, კოლინზი და რეზერფორდი გაერთიანდნენ და ევროპასა და ჩრდილოეთ ამერიკაში 20 თარიღიანი ტურნე გამართეს, რომის Circo Massimo-ს ჩათვლით, სადაც ისინი 500.000 მსმენელის წინაშე გამოვიდნენ. 2010 წელს ჯენესისი გახდა როკ-ენ-როლის დიდების დარბაზის წევრი. ჯგუფის მომავალი უცნობია. კოლინზმა შეწყვიტა მუსიკალური საქმიანობა, თუმცა მოგვიანებით განაცხადა დაბრუნების შესახებ[3], ხოლო სხვა წევრები სოლო პროექტებზე მუშაობენ. ბენქსმა 2012 წელს ინტერვიუში განაცხადა, რომ ჯგუფი დასრულდა. [4]

ისტორია

დაარსება და წარუმატებელი დებიუტი

ჯგუფი 1960-იანი წლების ბოლოს შეიქმნა. მისი დამაარსებლები - პიტერ გებრიელი და ტონი ბენქსი იყვნენ ჩარტერჰაუსის სკოლის სტუდენტები. ჯენესისის ორიგინალური შემადგენლობა ასეთი იყო: გებრიელი (ვოკალი), ენტონი ფილიპსი (გიტარა), ბენქსი (კლავიშები), მაიკ რეზერფორდი (ბას-გიტარა) და კრის სტიუარტი (დასარტყამები).

ჯენესისის პირველი წლები

მათი პირველი ალბომი - From Genesis to Revelation გამოვიდა 1969 წელს, ჯონატან კინგის მენეჯმენტის დახმარებით. ეს უკანასკნელი უკვე იყო სიმღერების წარმატებული ავტორი და პროდიუსერი. მან ჯგუფს დაარქვა ჯენესისი, რადგანაც ეს იყო პირველი სერიოზული ჯგუფი, რომელთანაც მას მოუწია მუშაობა, ანუ ეს იყო მისი კარიერის წარმოშობა, დასაწყისი. მისივე თქმით, მე მათ ჯენესისი დავარქვი, რადგანაც ვიფიქრე, რომ ეს კარგი სახელია... ეს იყო ახალი ჟღერადობისა და ახალი შეგრძნების დასაწყისი. საგულისხმოა, ჯგუფის სახელწოდების თავდაპირველი ვერსია იყო Gabriels Angels.[5]

ალბომი გამოიცა კომპანია Decca Records-ის მიერ. ხმისჩამწერი სესიების დროს სტიუარტმა დატოვა ჯგუფი და მას ჩაენაცვლა ჯონ სილვერი. ჯგუფმა ჩაწერა რამდენიმე სიმღერა ჯგუფის ბი ჯისის სტილში. კინგმა ეს სიმღერები ერთ ალბომად გააერთიანა, თანაც სიმებიანი ინსტრუმენტების ჟღერადობაც დაამატა მათ.

ჯენესისის პირველი სინგლი Silent Sun გამოვიდა 1968 წლის თებერვალში. ალბომი ცუდად იყიდებოდა, მაგრამ მიუხედავად ამისა, კოლექტივმა გადაწყვიტა გაეგრძელებინა სტუდიაში მუშაობა.

ჯგუფში მოვიდა ახალი წევრი - ჯონ მეიჰიუ, რომელიც ჯგუფში დასარტყამებზე უკრავდა მანამ, სანამ ქარიზმასთან არ დაიდო ახალი კონტრაქტი. საკონცერტო გამოსვლებისას ჯგუფს ჩამოუყალიბდა ახალი, უფრო ბნელი და მომაჯადოვებელი ჟღერადობა. ფილიპსმა დატოვა ჯგუფი 1970 წელს, ალბომის Trespass გამოსვლის შემდეგ, ჯანმრთელობის გართულებული მდგომარეობის გამო.[6]

მისი წასვლის შემდეგ ჯგუფის მომავალი საეჭვო გახდა.[7] კოლექტივიდან გაათავისუფლეს ჯონ მეიჰიუც. Trespass, მიუხედავად ამდენი არასასიამოვნო მოვლენისა, რომელიც მას ახლდა, იყო სწორედ ის დისკი, რომელმაც განაპირობა ჯგუფის ჟღერადობა შემდეგი წლების განმავლობაში. ჯგუფმა ასევე მიიღო კონტრაქტი ლეიბლთან Charisma Records.[8]

1970 წლის 4 აგვისტოს ჯგუფში მოვიდა ფილ კოლინზი, რომელიც ჯგუფის ყველა წევრს მოეწონა დასარტყამებზე დაკვრის ორიგინალური ტექნიკისა და ჯგუფის ადრინდელი სიმღერების უბადლო შესრულების გამო. იმავე წლის ბოლოს, გაზეთში გამოქვეყნებული განცხადების შემდეგ, ვირტუოზი გიტარისტი ჯგუფში მოხვდა სტივ ჰეკეტი, რომელსაც ჰქონდა მოსმენილი ჯგუფის სიმღერები კონცერტებზე და რომელმაც მცირე კონკურსი გაიარა.

1970–1975 (პიტერ გებრიელის ლიდერობით)

კოლინზი და ჰეკეტი პირველად გამოჩნდნენ სტუდიურ ალბომზე Nursery Cryme (1971). შემდეგი ალბომი იყო Foxtrot, რომელშიც შესულია ცნობილი 23 წუთიანი კომპოზიცია Supper's Ready და არტურ კლარკით შთაგონებული Watcher of the Skies. ალბომი ჯონ ბერნსის პროდიუსერობით იწერებოდა.[9] ამ ორი ალბომის მხარდასაჭერ კონცერტებზე გებრიელმა უკვე აქცია ჯგუფის გამოსვლები ნამდვილ თეატრად, დაიწყო რა სხვადასხვა კოსტუმისა და სასცენო ატრიბუტიკის გამოყენება. იმ დროს, როდესაც ყველა დანარჩენი უკრავდა, პიტერი გადაცმული იყო სხვადასხვა პერსონაჟად.[10]

შემდეგი ალბომი იყო Selling England by the Pound, 1973 წლის პრეტენზიული ნამუშევარი. გებრიელი ღელავდა რომ ახალი დისკის სახელწოდება გამოიწვევდა გაუგებრობას ამერიკული მსმენელის მხრიდან - ასევე ეწოდებოდა ლეიბორისტული პარტიის საპროტესტო აქციას. მუსიკალურად ალბომი მდიდარი იყო ჰეკეტის სოლოებით, გებრიელის ტექსტებით და ბენქსის ენერგიული პარტიებით მელოტრონზე. კრიტიკოსებმა მას მაღალი შეფასება მიანიჭეს.[11]

ჯენესისი და პიტერ გებრიელის ტიპიური იმიჯი - შუაში ამოპარსული თმებით

1974 წელს ჯგუფმა ჩაწერა და გამოსცა ორდისკიანი კონცეპტუალური ალბომი The Lamb Lies Down on Broadway, რომელშიც მოთხრობილია ვინმე რაელის, პუერტო-რიკოში დაბადებული და ნიუ-იორკში გაზრდილი მაწანწალის ისტორია მის პარალელურ სამყაროში მოგზაურობაზე.[12] ამ მოგზაურობის დროს გმირი ხვდება სხვადასხვა მითოლოგიების პერსონაჟებს და თავად გებრიელის მიერ მოგონილ არსებებს, როგორიც იყო Slipperman. ალბომი სავსეა სატირით, გებრიელისეული სპეციფიური იუმორით, სიტყვებისა და გამონათქვამების ორიგინალური ინტერპრეტაციით. დღემდე მისი რეალური სიუჟეტი დაუდგენელია, რადგანაც ყველას შეუძლია მისი საკუთარი ვარიანტი წარმოიდგინოს. დღემდე არც ერთ ინტერვიუში გებრიელს არ განუმარტავს ალბომის არც ერთი ეპიზოდი, თუმცა, ჯგუფის ბევრი მოყვარული თვლის, რომ რაელი თავად პიტერია. კოლინზი კი დოკუმენტურ ფილმში ჯენესისის ისტორიაზე ამტკიცებს, რომ მთელი ისტორია არის ადამიანის გაორებაზე.

ალბომს მოჰყვა მასშტაბური საკონცერტო ტურნე, რომლის მსვლელობისას სრულდებოდა მთლიანი ალბომი და სულ რამდენიმე სიმღერა წინა ალბომებიდან.[13] სცენაზე გებრიელი მუდმივად იცვლიდა კოსტიუმსა და გრიმს, ხოლო მუსიკოსების უკანა ფონს ამშვენებდა სლაიდ-შოუ, რომელიც მიჰყვებოდა ალბომის სიუჟეტს. დაძაბული ტურნესა და დამქანცველი ცხოვრების გამო გებრიელმა დატოვა ჯგუფი, იმ არგუმენტით, რომ მან ყველაფერს მიაღწია ამ მუსიკოსებთან.[14][15] 1977 წელს მან გამოუშვა პირველი საკუთარი ალბომი, რომელსაც უბრალოდ Peter Gabriel ეწოდებოდა.

პირველი წლები კოლინზთან

ჯენესისი 1980 წელს

ჯგუფმა გადაწყვიტა გებრიელის გარეშე არსებობის გაგრძელება[16]. თავდაპირველი ჩანაფიქრით, ჯენესისი უნდა ყოფილიყო მხოლოდ ინსტრუმენტული კოლექტივი, მოგვიანებით კი ახალი ვოკალისტის ძიება დაიწყეს, თუმცა არ იცოდნენ, თუ როგორი სჭირდებოდათ. ამასთან, გებრიელისგან ნაკლებად განსხვავებული ვოკალური მონაცემების მქონე ადამიანზე დიდი მოთხოვნა იყო. კოლინზის თქმით, მას ძალიან სურდა, რომ ეს საქმე მისთვის მიენდოთ. ერთ-ერთ შესაძლო ვოკალისტად ჯონ ანდერსონის (ჯგუფ Yes-ის წევრი) განიხილებოდა. მიუხედავად ვარიანტებისა, ვოკალისტად დარჩა კოლინზი, რომელიც მანამდა თავად ხელმძღვანელობდა დაახლოებით 200 მონაწილიან კონკურსს[17] და დასარტყამებიდან მთავარ მიკროფონზე გადაინაცვლა.

პოსტ-გებრიელისეული პირველი ალბომი იყო A Trick of the Tail. კრიტიკოსები, რომლებმაც ნაადრევად დაასამარეს ჯენესისი, გაოგნდნენ - ალბომი გაიყიდა ყველაზე დიდი რაოდენობით, ვიდრე რომელიმე მათი წინა დისკი. გებრიელი აღარ იყო ჯგუფში, მაგრამ კოლინზმა დაამტკიცა, რომ მას ასევე ჰქონდა ლიდერობის უნარი. ასევე, მის ნაზ ვოკალს უფრო მეტად ნაზი სიმღერები უხდებოდა და ჯგუფი სწავლობდა სიმღერების ვოკალურ შესრულებას, რათა კოლინზს არ ეყვირა. ბევრი თვლიდა, რომ „კოლინზი ჟღერდა როგორც გებრილი უფრო მეტად, ვიდრე თავად გებრიელი“.[18]

ალბომზე ერთ-ერთი საკმაოდ გამოკვეთილი სიმღერაა Squonk - რატომღაც ბევრმა ჩათვალა, რომ აქ გებრიელის მისამართით ნასროლი ქვა იმალებოდა, თუნდაც იმიტომ, რომ ეს სიმღერა მოისროლეს გამოუდეგარი სიმღერების სიაში გებრიელის დროს. ამავე დროს, რეზერფორდი და კოლინზი ისხდნენ სტუდიაში გებრიელთან და ეხმარებოდნენ მას პირველი სოლო-ალბომის დემოების ჩაწერაში. ჯგუფი თბილად იხსენებს გებრიელს ფინალურ Los Endos-ში, სადაც გაისმის სტრიქონი „there's an angel standing in the sun...free to get back home“, რომელიც Supper's Ready-დან იქნა აღებული.საინტერესოა, რომ გებრიელის პირველ სოლო-ჰიტში ასევე არის წამოყენებული შინ წასვლის თემა.

ტურნეზე ჯგუფს ბილ ბრუფორდი შეუერთდა, დასარტყამებზე პარტიების შესასრულებლად. ფილ კოლინზმა ნახევრად გადაინაცვლა სცენის წინა ფლანგზე.

ალბომიდან გამოვიდა ორი სინგლი - A Trick Of The Tail და Ripples. ამავე პერიოდში ჯგუფმა გადაიღო პირველი ოფიციალური პრომო-ფილმები - A trick of the tail და Robbery, Assault and Battery (უკანასკნელშ ჯგუფის ოთხივე წევრი მონაწილეობდა).

1976 წელს წლის ბოლოს გამოვიდა კიდევ ერთი ალბომი - Wind & Wuthering.ეს იყო ერთ-ერთი ორი ალბომიდან, რომელიც ჩაიწერა სტუდიაში Relight, ნიდერლანდებში.იგი იქცა ჯგუფის შემდეგ პრეტენზიულ ნამუშევრად. ჰეკეტის წვლილი აქ მინიმალურია, რადგან ჯენესისი უფრო მსუბუქ მუსიკაზე გადადიოდა, ჰეკეტი კი კვლავ ექსპერიმენტების მოყვარულად რჩებოდა. თუმცა, სტივი ფიქრობდა, რომ მეოთხე წევრის ამპლუაში იგი უბრალოდ დაწერდა სიმღერებს. მისი კოლეგები კი ალბომებში მხოლოდ საუკეთესო სიმღერების შეტანას აპირებდნენ. მათ წაუყენეს სტივს პირობა - მას ნებისმიერი რაოდენობის სოლო-ალბომების გამოცემის უფლება ექნებოდა, მხოლოდ იმ შემთხვევაში, თუკი იგი ჯგუფში ამ პრინციპით იმუშავებდა. სტივი არ დათანხმდა და ეს დისკი იქცა მის უკანასკნელ ნამუშევრად ჯენესისთან.[19]

ჰეკეტის წასვლა

სტივ ჰეკეტი წარმატებული სოლო-კარიერით

Spot the Pigeon (1977) უკანასკნელი ჩანაწერია სტივ ჰეკეტის მონაწილეობით, რადგან იგი უბრალოდ სამი სიმღერისგან შემდგარი მინიალბომია. სამივე კომპოზიცია არის წინა ორი სტუდიური ალბომისგან დარჩენილი მასალა, რომელიც ჯგუფმა ვერც ერთ დისკს ვერ მოარგო.

მთავარი სიმღერა არის Match Of The Day, რომელიც ფეხბურთის გავლენითაა დაწერილი. მინიალბომმა ამოჰყო თავი ბრიტანეთის სინგლების ჩარტის 14-ე ადგილზე, რაც ჯგუფისთვის რიგით მეორე ჰიტს ნიშნავდა. მიუხედავად იმისა, რომ მინიალბომი არასოდეს გამოცემულა ჩრდილოეთ ამერიკაში, უცხო ქვეყნებში ჯგუფის წარმომადგენელი Atlantic Records ამ მინიალბომს კანადაში ავრცელებდა.

მიუხედავად იმისა, რომ ჰეკეტს არ სიამოვნებდა, რომ ჯგუფი არ ითვალისწინებდა მის ინტერესებს, მას მოეწონა, რომ Inside and Out (მისი ფავორიტი) შეიტანეს ამ ალბომში.Spot the Pigeon შემდგომში კომპაქტ-დისკზეც გამოიცა, მაგრამ გამოცემა შემდგომში ამოიღეს გაყიდვიდან. მიუხედავად ამისა, Pigeons და Inside And Out გამოჩნდა ჯგუფის 2000 წლის კრებულზე Genesis Archive 2: 1976-1992. ასევე გადაიღეს სიმღერის Match of the Day-ს პრომო-ფილმიც, რომელიც შემდგომში დაიკარგა.

შემდეგ გამოვიდა Seconds Out - ორმაგი ცოცხალი ალბომი, რომელიც ჯგუფის მიერ ჩაიწერა პარიზში 1976/1977 წლებში. ეს არის ჯენესისის მეორე ცოცხალი ალბომი. იგი ძირითადად საინტერესოა იმით, რომ აქ ჟღერს გებრიელის პერიოდისა და პოსტ-გებრიელისეული კომპოზიციები. ჯგუფთან ერთად აქ უკრავს ბილ ბრუფორდი და Weather Report-ის დრამერი ჩესტერ თომპსონი. ეს არის უკანასკნელი კონცერტები, რომელთა ჩაწერაშიც ჰეკეტი მონაწილეობდა.

ყველასთვის მოულოდნელად, ალბომმა 4-ე ადგილი დაიკავა ბრიტანეთის ჩარტში .ბევრი ამ დისკს მიიჩნევს პროგრესული როკის პერიოდის ჯენესისის ფინალად, ვინაიდან შემდგომში ისინი უფრო მსუბუქ მუსიკაზე გადავიდნენ. Genesis Archive 1967-75-ის პირველი ნაწილის გამოცემამდე ეს დისკი ითვლებოდა ერთადერთ ჩანაწერად, სადაც შეტანილი იყო Supper's Ready-ს, 23 წუთიანი ეპიკური პიესის საკონცერტო ვერსია. სწორედ ამის შემდეგ ჰეკეტი მოსცილდა ჯგუფს.

მნიშვნელოვანი ცვლილებები

ჯენესისის მუსიკას მკვეთრად დაეტყო ჰეკეტის წასვლა. 1978 წლის ალბომი ...And Then There Were Three... სახელწოდების მიუხედავად, ორი ადამიანის უფრო არის, ვიდრე სამის.საქმე იმაშია, რომ კოლინზს ბევრი პრობლემა ჰქონდა ოჯახში.მას საკმაოდ გაუჭირდა დასარტყამების გარდა სხვა წვლილის შეტანა.მაგრამ იგი კვლავ იყო ჯგუფის უცვლელი ვოკალისტი.მან ასევე დაწერა Scenes from A Night's Dream-ის ტექსტი, თუმცა სიმღერების წერის მხრივ ჯგუფი უფრო შორს იყო ძველი ჯენესისისგან. მაიკმა საკუთარ თავზე აიღო მთავარი პარტიები გიტარაზე, რადგან ჰეკეტმა ჯგუფი დატოვა. ტონი ბენქსი, ალბათ, ყველაზე კარგად იყო მომზადებული ამ ესპერიმენტისათვის და მისი წვლილიც ამ ალბომში გამოკვეთილად ჩანს.Follow You Follow Me და Many Too Many პოპულარულ ჰიტებად იქცნენ. ალბომმა ჯგუფის პირველი პლატინის დისკი მოუტანა, რომელიც მათ RIAA-მ მიანიჭა.[20]

დერილ სტერმერი და ჩესტერ თომპსონი ჯენესისში, ჰეკეტის გარეშე

საკონცერტო ტურისათვის ჯგუფს შეუერთდა ჟან ლუკ პონტის საკონცერტო ბენდის ყოფილი გიტარისტი დერილ სტერმერი. იგი ასრულებდა ჰეკეტის პარტიებს და მალე დაამტკიცა, რომ არც თუ ცუდად აკეთებდა ამას.ტურნემ წარმატებით ჩაიარა.მის დასრულებისთანავე ფილმა განაცხადა, რომ ესაჭიროებოდა დასვენება და ოჯახური პრობლემების მოგვარება.ბენქსმა და რეზერფოდმა მისცეს მას დრო, ხოლო ამასობაში სოლო-ალბომები თავად გამოუშვეს. ფილმა ვერ გადაარჩინა ურთიერთობა მეუღლესთან და დაუბრუნდა ჯგუფ Brand X-ს.[21], რომელშიც იგი პარალელურად უკრავდა.ეს იყო უკანასკნელი დღეები ამ ჯგუფში - სწორედ ამის შემდეგ მან დაიწყო საკუთარი სოლო-ალბომის შექმნა.

ჯენესისის დიდ სცენაზე დაბრუნების მცდელობა იყო Duke (1980). ალბომმა კვლავ აღადგინა სამეული როგორც ნამდვილი ჯგუფი - თუნდაც იმიტომ, რომ სამეული კვლავ წერდა სიმღერებს ძველი მანერით, ისე, როგორც ეს წლების წინ ხდებოდა. თითოეულმა წევრმა დაწერა სიმღერები, რომლებიც წარუდგინა სხვებს. სხვადასხვა სიმღერა იყო მხოლოდ რეპეტიცია იმ კომპოზიციების, რომლებიც შემდგომში დაიწერა სხვა ალბომებზე მუშაობისას, ზოგი უფრო ადრინდელ ალბომებს გვაგონებდა.

25 წუთიანი პიესა, რომელიც დაიწერა დისკისთვის, დაიყო ცალკეულ სიმღერებად, თუმცა, სიმღერები Behind The Lines, Duchess, Guide Vocal, Turn It On Again, Duke's Travels და Duke's End სცენაზე ერთი თანმიმდევრობით სრულდებოდა. ალბომზე რამდენიმე სიმღერაში გამოიკვეთება ერთი თემა - როკ-მუსიკოსის ცხოვრება, შეშლილი ფანები, ვარსკვლავი, მენეჯერი და ჯგუფის მოყვარულები კონცერტზე. Please Don't Ask კოლინზის მეუღლესთან განშორებაზეა.M isunderstanding ასევე მიიჩნევა პირადი ცხოვრების აღწერად და მიზნად ისახავს ჯგუფ Beach Boys ვოკალური მანერის პაროდირებას.

Duke-ს მოჰყვა მინიმალისტური ელექტრონული Abacab (1981).ალბომი აღსანიშნავია იმით, რომ იწერებოდა ჯენესისის პირად სტუდიაში, რომელსაც The Farm ჰქვია და სწორედ იქ შეიქმნა ჯგუფის შემდეგი ალბომებიც.ალბომის პროდიუსერია ჰიუ პეჯჰემი, რომელმაც თავისებური ჟღერადობა შესძინა სტუდიურ ჯგუფს[22]. მისი კარიერა დაიწყო Yes-თან და Emerson, Lake & Palmer-თან მუშაობით. შემდგომში მის კლიენტებში შედიოდნენ - ბი ჯისი, დევიდ ბოუი, Clannad, ფილ კოლინზი, შერილ კროუ, მელისა ეტერიჯი, ელტონ ჯონი, პოლ მაკ-კარტნი, Mike and The Mechanics (მაიკ რეზერფორდის ჯგუფი), იუსუ ნ'დური, The Police და სტინგი, 311 და მაკფლაი.

პეჯჰემის პროდიუსერობის შედეგად, დისკი იქცა ერთ-ერთ საუკეთესოდ, სტუდიური ჟღერადობის მხრივ. თავად მასალა ორდისკიან ალბომს ჰყოფნიდა, მაგრამ მის მაგივრად გამოიცა ერთი დისკი, ე.წ. B-გვერდების სახით კი, სინგლების მეორე მხარეს - ორი სიმღერა, რომელიც არ შევიდა ალბომში.მინიალბომი სამი სიმღერით გამოვიდა ინგლისში, ამერიკაში კი - ალბომის Three Sides Live მეოთხე დისკად. ალბომზე ასევე პირველად გამოჩნდა საყვირი Earth, Wind and Fire-ის სტილში.შემდეგი მისი გამოჩენები მხოლოდ ფილ კოლინზის სოლო-ალბომებში მოხდა.

უკანასკნელი წლები კოლინზთან

Three Sides Live-ის გამოცემის შემდეგ, 1982 წელს, ჯგუფი ორიგინალური სახით, გებრიელთან და ჰეკეტთან ერთად, გაერთიანდა ერთჯერადი კონცერტისათვის. უშუალოდ, ეს კონცერტი მიზნად ისახავდა გებრიელის ფონდის WOMAD დახმარებას, რომელიც ფინანსურ კრიზისს განიცდიდა.[23]

შემდეგი ალბომი, Genesis (ასევე ცნობილი სათაურით Mama) გამოვიდა 1983 წელს. მას ასევე უწოდებენ „ფორმებს“, რადგან მის ყდაზე გამოსახულია გეომეტრიული ფორმები. ალბომის სახელწოდება მნიშვნელოვანია იმით, რომ ზუსტად ასახავს ჯგუფის მდგომარეობას იმ დღეებში - ყველაფერი თითქოს და თავიდან დაიწყო. ინტერესი ალბომის მიმართ დიდი იყო. აქედან კომპოზიციების ნახევარს საკუთარი პრომო-ფილმებიც გააჩნია. ალბომიდან გამოსულ სინგლებზე არ იყო არც ერთი ნომერი, რომელიც არ შესულა ალბომში. ერთადერთი იყო მაიკის სოლო-კომპოზიცია, რომელიც უკვე მის ალბომში შევიდა.

წარმატებული ტურნეს შემდეგ, ჯგუფი დაუბრუნდა სტუდიას და ჩაწერა Invisible Touch (1986). ეს ალბომი, ისევე როგორც წინა ორი, ჯენესისის ყველა სახის ფანისათვის იყო - აქ იყო პოპ-სინგლებიც და ხანგრძლივი ტრეკები, როგორიც არის Tonight, Tonight, Tonight და Domino, რომლებიც გამოცდილ ფანებს უფრო მიიზიდავდა. Land of Confusion, რომლის სტრიქონი The Who-ს სიმღერიდან My Generation არის ნასესხები,[24] მსოფლიოს წამყვან პოლიტიკოსებზე, რაზეც მისი ექსცენტრიული ვიდეოც მოწმობს. მისი მუსიკალური ვიდეო წარდგენილი MTV-ზე საუკეთესო კლიპის ნომინაციაზე, თუმცა გაიმარჯვა პიტერ გებრიელის ანიმაციურმა ვიდეომ Sledgehammer.ისევე, როგორც წინა ალბომიდან, ამ დისკიდან თითქმის ყველა კომპოზიცია გამოვიდა სინგლის სახით, ვიდეოკლიპების შესაბამისი რაოდენობით, ხოლო ჰიუ პეჯჰემისათვის ეს იყო უკანასკნელი ალბომი ჯგუფთან.

1988 წელს, როიალ ალბერტ ჰოლში გაიმართა კონცერტი, რომელზეც გებრიელი და კოლინზი პირველად გამოჩნდნენ ერთად, 1982 წლის გამოსვლის შემდეგ. მათ დაუკრეს Sledgehammer და ეს იყო დღემდე მათი უკანასკნელი საკონცერტო გამოსვლა.

ხუთწლიანი პაუზის შემდეგ ჯგუფმა ჩაწერა We Can't Dance, რომელიც გამოვიდა 1991 წელს.ეს არის კოლინზის უკანასკნელი ალბომი ჯგუფთან. დისკი არ გამოსულა ვინილზე და გამოიცა კომპაქტ დისკებზე, თუნდაც იმიტომ რომ იგი გრძელდებოდა 70 წუთს. ალბომის ჟღერადობაზე არ მუშაობდა ჰიუ პეჯჰემი, პასუხისმგებლობა ამ დისკზე თავის თავზე აიღო ჯგუფ Marillion-ის ყოფილმა ინჟინერმა ნიკ დევისმა, რომელიც დღემდე თანამშრომლობს ჯენესისთან და მათი ალბომების რემასტერინგებს ამზადებს. ალბომი სავსე სხვადასხვა ისტორიით. ყველაზე ცნობილია Driving the Last Spike, სადაც 10-ივე წუთი ბოლომდეა გამოყენებული ბრიტანეტის რკინიგზის გაყვანის მწარე ისტორიების გადმოსაცემად. Fading Lights-ში საუბარია ჯგუფის წარსულის მიღწევებზე. ალბომში არ შევიდა On the Shoreline, ბენქსის ინსტრუმენტული ნომერი. Since I Lost You ერიკ კლეპტონის დაღუპულ შვილს ეძღვნება. Jesus He Knows Me მხიარული სიმღერაა, რომელშიც ჯგუფი დასცინის ფსევდო-რელიგიურ გადაცემებს, რომლებითაც სავსეა ამერიკული ტელეარხები. ტურნესთვის კი დამზადდა განსაკუთრებული სიურპრიზი - ჯგუფის 1970-იანი წლების ნომრების კრებული.

1996 წლის მარტში, კოლინზმა ოფიციალურად განაცხადა, რომ მიდიოდა ჯგუფიდან.თავის განცხადებაში მან ახსენა, რომ დრო იყო, შეეცვალა მიმართულება მუსიკაში.იგი აპირებდა კინო-ფილმების, ჯაზური პროექტებისა და სოლო-კარიერაზე მუშაობის გაგრძელებას.მისივე თქმით, ის და ჯგუფის დანარჩენი წევრები მეგობრებად რჩებოდნენ.[25]

უილსონი

რეზერფორდმა და ბენქსმა გადაწყვიტეს, კვლავაც ემუშავათ ჯგუფთან დაკავშირებულ პროექტებზე.თომპსონმა და სტერმერმა გადაწყვიტეს, არ ემუშავათ აღდგენილი პროექტის საკონცერტო გამოსვლებზე.ჯგუფის ახალ ვოკალისტად აიყვანეს რეი უილსონი, რომელიც ადრე ჯგუფ სტილტსკინში მღეროდა.

კონკურსის შედეგად ახალ ვოკალისტად შეარჩიეს სწორედ იგი, რადგანაც მისი ვოკალური მანერის ბნელი სტილი გებრიელს უფრო აგონებდათ, ვიდრე კოლინზს.მუსიკას რეზერფორდი და ბენქსი წერდნენ.დასარტყმელ საკრავებზე სამუშაოდ ნირ ზიდკიაჰუ და ნიკ დ'ვირჯილიო მოიყვანეს.

ევროპაში ახალი ალბომი Calling All Stations (1997) არც ისე ცუდად იყიდებოდა, თუმცა შტატებმა უარი თქვეს ახალი ჯენესისის მიღებაზე. ამერიკული ტურნეს თარიღები გაუქმდა, რადგანაც არავის აინტერესებდა ჯენესისი კოლინზის გარეშე. მოგვიანებით რეზერფორდმა და ბენქსმა შეაჩერეს პროექტი. წლების შემდეგ უილსონი უკმაყოფილების გამოთქვამდა და იხსენებდა, რომ შეიტყო, თითქოს კოლინზს მისი ჯგუფში გამოჩენა არ მოეწონა.[26] Congo იყო ალბომის ერთადერთი წარმატებული სინგლი. ალბომმა მეორე ადგილი დაიკავა ბრიტანეთში, შტატებში კი 54-ე. ეს იყო ჯენესისის უკანასკნელი სტუდიური ალბომი.

ერთჯერადი პროექტები

ჯგუფის ოფიციალური დაშლის შემდეგ, მისი კლასიკური შემადგენლობა, ბენქსის, კოლინზის, გებრიელის, ჰეკეტის და რეზერფორდის სახით, შეიკრიბა სტუდიაში და გადაამუშავა The Carpet Crawlers, სიმღერა ალბომიდან The Lamb Lies Down on Broadway.ეს სიმღერა, უშუალოდ, დამზადდა ჯგუფის საუკეთესო სიმღერების კრებულისათვის Turn It On Again: The Hits.ჯგუფის მენეჯერის, ტონი სმითის პატივსაცემად, სამეულმა, კოლინზის, ბენქსისა და რეზერფორდის სახით, მუსიკალური მენეჯერების ფორუმზე აკუსტიკური სახით შეასრულა I Can't Dance.

ასევე გამოიცა ჯგუფის საარქივო ჩანაწერებიც.პირველი მათგანია Genesis Archive 1967-75, რომელშიც შესულია პირველი ოფიციალური ჩანაწერი The Lamb Lies Down on Broadway-ს შოუთი. აქ რამდენიმე ადგილას პიტერმა სპეციალურად ჩაწერა ვოკალი, რადგანაც იგი ცუდად ჟღერდა. სტივ ჰეკეტმა, თავის მხრივ, რამდენიმე ახალი სოლო გიტარაზე სტუდიაში დაამატა. დანარჩენ ორ დისკზე შესულია ლონდონის Rainbow Theatre-ში ჩატარებული კონცერტი, 1973 წლის, დემო-სიმღერები, იშვიათი B-გვერდები და 1970 წლის BBC-ს ჩანაწერები.

მეორე გამოცემა, Genesis Archive 2: 1976-1992, გამოვიდა 2000 წელს და მოიცავს ჯგუფის შემოქმედებას მასში გებრიელის ლიდერობისას. ეს კრებული შედგება სამი დისკისგან, სადაც კვლავაც შესულია B-გვერდები, დემო-სიმღერები, იშვიათი ჩანაწერები, ცოცხლად შესრულებული ნომრები და სიმღერები მინი-ალბომებიდან Spot the Pigeon და 3 X 3.

ასევე გამოიცა კრებული Platinum Collection (2004), რომელიც სამი დისკისგან შედგება. მასში შეტანილია ჯგუფის საუკეთესო და პოპულარული სიმღერები.

2007 წლის დაბრუნება და მიმდინარე გეგმები

აღდგენილი ჯენესისის შოუ, 2007 წელს, ტურის Turn It On Again (ტური) ფარგლებში გამართული ერთ-ერთი კონცერტი

. მრავალი მოლაპარაკების შემდეგ, 2006 წლის 7 ნოემბერს ცნობილი გახდა, რომ ჯგუფი მსოფლიო ტურნეს მოაწყობდა, სახელწოდებით Turn It On Again. ტურნემ საბოლოოდ, 12 ქვეყანა მოიცვა და დაიწყო ფინეთში, ჰელსინკიში. შესრულდა როგორც ახალი, ასევე ძველი სიმღერები - ზოგიერთი მათგანი 1973 წლის პერიოდის იყო.არ შესრულდა არც ერთი სიმღერა ალბომიდან Calling All Stations.

თავდაპირველი ჩანაფიქრი გულისხმობდა ალბომის The Lamb Lies Down on Broadway სრული სახით შესრულებას, პიტერ გებრიელთან და სტივ ჰეკეტთან ერთად, თუმცა, ცნობილი გახდა, რომ გებრიელი მორიგ სოლო-ალბომზე მუშაობდა და მას არ შეუძლია პროექტში ჩართვა.[27] ჰეკეტმა უარი თქვა ტურნეში მონაწილეობის მიღებაზე.

ჯგუფის პროდიუსერი ნიკ დევისი მუშაობდა კოლექტივის ყველა სტუდიური და ოფიციალური ცოცხალი ალბომის ახალ გამოცემაზე. ორიგინალური ჩანაწერები გადამუშავდა სტუდიაში და გაუმჯობესდა მათი ჟღერადობა. სხვადასხვა პერიოდში გამოცემულ ალბომების კრებულებში შეტანილია დისკები Trespass-იდან Calling All Stations-მდე.გამოცემაში არ იქნ ა შეტანილი პირველი ალბომი From Genesis to Revelation. ყველა დისკი გამოიცა SACD ფორმატითა და DVD აუდიო ფორმატით. DVD აუდიო დისკებზე ასევე წარმოდგენილი იქნა ინტერვიუები ჯგუფის წევრებთან და სიმღერების პრომო კლიპები.

2007 წლის 12 მაისს ჯგუფი დაჯილდოვდა სპეციალური პრიზით მუსიკალური ტელევიზიის VH1 დაჯილდოვებაზე VH1 Rock Honors.მათ აგრეთვე შეასრულეს სამი კომპოზიცია - Turn It On Again, No Son Of Mine და Los Endos.

2007 წლის 7 ივლისს ჯგუფი გამოვიდა მასშტაბურ საერთაშორისო ტელემარათონზე Live Earth, რომელიც მიზნად ისახავდა ხალხის ყურადღების მიქცევას გლობალური პრობლემებისაკენ, როგორიც არის გლობალური დათბობა.ჯგუფი გამოვიდა განახლებულ უემბლის სტადიონზე, სხვა ჯგუფებთან და სოლისტებთან ერთად.[28]

2007 14 ივლისის უფასო კონცერტი რომში გადაღებული იქნა DVD დისკზე გამოსაცემად. აგრეთვე, დიუსელდორფში ჩატარებული 27 ივნისის კონცერტი პირდაპირი ეთერით გადაიცემოდა კინოთეატრებში.

მოგვიანებით გამოიცა ცოცხალი ალბომი Live Over Europe 2007, 2007 წლის სხვადასხვა ჩანაწერით.

14 ივლისის კონცერტი გამოვიდა 2008 წლის 26 მაისს, სამმაგი DVD დისკის When In Rome 2007 სახით.

კრებულის Genesis: 1970–1975 გამოცემის პერიოდში ტონი ბენქსმა განაცხადა, რომ ჯგუფი, შესაძლოა, გაერთიანდებოდა გებრიელთან და სტივ ჰეკეტთან ერთად. თუმცა, კოლინზი ამტკიცებდა, რომ ჯანმრთელობის პრობლემების გამო, შეწყვიტა დასარტყამებზე დაკვრა და ჯოხების დაკავებაც არ შეეძლო.[29]

2009 წლის 10 სექტემბერს ჯგუფის ოფიციალური საიტის საშუალებით ფილისგან ცნობილი გახდა, რომ ზურგის ოპერაცია ჰქონდა გასავლელი. მისივე თქმით, იგი ვერც ფორტეპიანოზე უკრავდა.

2009 წლის 21 სექტემბერს რემასტერინგების სერიაში გამოიცა Genesis Live 1973–2007, ცოცხალი ალბომების რემასტერინგების კრებული. 2009 წლის 23 ნოემბერს გამოსულ კრებულში Genesis Movie Box 1981–2007 ასევე შეტანილია 1981-2007 წლებში გამოსული საკონცერტო ჩანაწერები.

2010 წლის 15 მარტს ჯგუფი შეყვანილი იქნა როკ-ენ-როლის დიდების დარბაზში. ცერემონიას ესწრებოდნენ კოლინზი, ბენქსი, რეზერფორდი და ჰეკეტი (პიტერ გებრიელი ემზადებოდა ალბომის Scratch My Back მხარდასაჭერი ტურნესათვის. ჯგუფმა Phish, რომლის გიტარისტმა ტრეი ანასტასიომ წარადგინა კოლექტივი, შეასრულა ჯენესისის Watcher of the Skies და No Reply at All.

2010 წლის სექტემბრის ინტერვიუში ჟრნალთან Billboard კოლინზი კვლავ ნაკლებად ოპტიმისტური იყო ჯენესისის მომავალთან დაკავშირებით: „მე ვფიქრობ, ჯენესისი აღარ არსებობს. ჩემს თავს მომავალში, როგორცჯენესისის შოუებში მონაწილეს არ ვხედავ. არა იმიტომ, რომ არ მომწონს ან არ მსურს. ეს უბრალოდ ჩემს ამჟამინდელ ცხოვრებას არ უხდება. ფიზიკურად დასარტყამებზე დაკვრა არ შემიძლია. ამას მთელი ცხოვრება ვაკეთებდი და ახლა უბრალოდ საკუთარი ცხოვრების სხვა მხარე მსიამოვნებს.“[30]

პრობლემებსა და სხვა საკითხებზე საუბრისას, 2011 წლის 4 მარტს კოლინზმა განაცხადა, რომ მუსიკალური კარიერა დაასრულა.[31]

2011 წლის 27 სექტემბერს ჟურნალთან Rolling Stone საუბრისას გებრიელმა გამოხატა ვარაუდი, რომ ჯგუფის კლასიკური შემადგენლობის გაერთიანება კვლავაც შესაძლებელია, მაგრამ იმედები თითქმის არ არის.[32]

გავლენა და შთაგონება

ჯენესისის მუსიკოსების უმთავრეს შთაგონებას წარმოადგენდა ევროპული კლასიკური მუსიკიდან დაწყებული და ჯაზური იმპროვიზაციებით დამთავრებული მელოდიები.ბენქსის საყვარელი მუსიკოსი იყო ჯგუფის The Animals წევრი ალან პრაისი. მას ასევე მოსწონდა მეტიუ ფიშერი (Procol Harum) და კიტ ემერსონი (Emerson, Lake and Palmer).კლასიკური მუსიკიდან იგი უპირატესობად ანიჭებდა სერგეი რახმანინოვს, მორის რაველს, გუსტავ მალერსა და დიმიტრი შოსტაკოვიჩს. ჯგუფის მუსიკალურ სტილზე ასევე გავლენა იქონიეს იმავე დროის როკ-კოლექტივებმა - ბითლზმა, როლინგ სტოუნზმა, Simon & Garfunkel-მა.კოლინზი პატივს სცემდა ჯგუფს The Mahavishnu Orchestra, ხოლო გებრიელი - ნინა სიმონესა და კინგ კრიმსონს.პირველ ალბომზე, From Genesis to Revelation, ჯგუფის სტილი უფრო ახლოს არის მუდი ბლუზის, ფემილისა და ბი ჯიზის სტილთან.

შემდგომში, ჯენესისმა ბევრ ჯგუფზე იქონია გავლენა - მაგალითად, Dream Theater, ქემელი და Kansas. თავის გავლენად ჯენესისი დაასახელეს ჯგუფებმა Rush,[33] Marillion,[34] IQ,[35] Pendragon,[36] Pallas[37] და Dream Theater.[38][39]

აგრეთვე არსებობს რამდენიმე ჯგუფი, რომელიც ჯენესისის მხოლოდ ადრინდელ (1971-1975) კომპოზიციებს ასრულებს - Re-Genesis, The Musical Box და In the Cage.

ყდების გაფორმება

ჯგუფის ყდებზე გამოტანილი მხატვრული ნამუშევრები ხშირად ასახავს ალბომის სიმღერების შინაარს. პირველი ალბომის, From Genesis to Revelation შემთხვევაში ასე არის - მისი ყდა თავიდან ბოლომდე შავია და ახლავს გოთიკური შრიფტით შესრულებული წარწერები.

დეტალურად საკმაოდ დატვირთულია ალბომის Foxtrot გაფორმება. აქ არის: ქალის ტანსაცმელში ჩაცმული მელია (დიზაინერი პოლ უაიტჰედი ამტკიცებს, რომ ამ პერსონაჟის შთაგონება იყო ჯიმი ჰენდრიქსის სიმღერა Foxy Lady).[40]

1974 წლის ალბომის The Lamb Lies Down on Broadway ყდის ავტორია დიზაინ სტუდია Hipgnosis. მასზე გამოსახულია ალბომის პერსონაჟი რაელი, სხვადასხვა მოქმედებაში. ალბომის A Trick of the Tail გაფორმებაში გამოყენებულია მისი სიმღერების პერსონაჟები. ალბომით Duke დაიწყო ახალი პერიოდი ჯენესისის ყდების გაფორმებაში. ამ პერიოდიდან მოყოლებული, ყდებს ქმნიდა ბილ სმითის სტუდია. ჯგუფის ყველაზე გაყიდვადი ალბომის Invisible Touch გრაფიკაში გამოყენებულია სახელოსნოს Assorted Images ნამუშევრები. We Can't Dance-ის ხალისიანი სურათების ავტორია ფელისიტი ბოუერსი. Calling All Stations და Turn It On Again: The Hits ეკუთვნის დიზაინ სტუდიას Wherefore Art?.

შემადგენლობა


დისკოგრაფია

Searchtool-80%.png მთავარი სტატია : ჯენესისის დისკოგრაფია.

სტუდიური ალბომები

სქოლიო

  1. Perrone, Pierre. “John Mayhew: Drummer who played with the fledgling Genesis on 'Trespass'“, The Independent, 2009-04-20. წაკითხვის თარიღი: 2013-05-13. 
  2. (2011) Peter Gabriel, From Genesis to Growing Up. Ashgate Publishing, გვ. 44. ISBN 0-7546-6521-6. , Extract of page 44
  3. Phil Collins considering a return to music?.
  4. შეცდომა ციტირებაში არასწორი ტეგი <ref>; სქოლიოსათვის BBC_Breakfast_2012 არ არის მითითებული ტექსტი; $2
  5. Tracy, John. And The Word Was ... GENESIS genesis-path.net. Retrieved on 15 March, 2007.
  6. Ostrich, Michael "Genesis Frequently Asked Questions List Version 2.6". ProgScape Entertainment, 21 December 1998. Retrieved on 23 March 2007.
  7. Young, John. "Genesis Look at Themselves". Trouser Press Magazine, March 1982. Retrieved on 23 March 2007.
  8. Cromelin, Richard. "Genesis: Short on Hair, Long on Gimmicks". Rolling Stone, 28 March 1974.
  9. World of Genesis website - John Burns interview. Worldofgenesis.com (2006-07-02). წაკითხვის თარიღი: 2011-07-21.
  10. "Some New York Times Reviews '72-'74". genesis-path.net. Retrieved on 23 March 2007.
  11. Malamut, Bruce. "Selling England by the Pound". Crawdaddy, March 1974. Retrieved on 23 March 2007.
  12. Welch, Chris. "Genesis: The Lamb Lies Down On Broadway". Melody Maker, 23 November. 1974.
  13. Neer, Dan (1985). Mike on Mike [interview LP], Atlantic Recording Corporation.
  14. Mankowitz, Gered. "Help!". Mojo Magazine, April 2007.
  15. "Gabriel, Peter. "Out, Angels Out - an investigation" genesis-path.net, August 1975. Retrieved on 23 March 2007.
  16. Welch, Chris. "Peter Gabriel Quits Genesis". Melody Maker, 23 August 1975.
  17. Phil Collins | Music Videos, News, Photos, Tour Dates, Ringtones, and Lyrics. MTV. წაკითხვის თარიღი: 2011-07-21.
  18. "Phil Collins". Golden Slumbers, 2005. Retrieved on 23 March 2007. დაარქივებული იანვარი 24, 2007 საიტზე Wayback Machine
  19. "Wind & Wuthering 1977 - Genesis Remember". g2online.co.uk. Retrieved on 23 March 2007.
  20. RIAA Gold & Platinum database. RIAA. Retrieved 4 December 2011
  21. Brand X: Product Allmusic. Retrieved 4 December 2011
  22. Flans, Robyn. Classic Tracks: Phil Collins' "In the Air Tonight". Mix, 1 May 2005. Retrieved on 25 March 2007.
  23. "The 1982 Reunion Show Program Book".genesis-path.net. Retrieved on 23 March 2007.
  24. Turner, Frederick. "Assorted pieces of insight into Genesis from assorted sources. Genesis: A Biography, 1992. Retrieved on 23 March 2007.
  25. Darling, Linda; Silberstein, Scott. "Phil Quits Genesis!". Entertainment Wire, 28 March 1996. Retrieved on 23 March 2007.
  26. "Rocker Ray's life begins after Genesis Scotsman.com Retrieved on 14 April 2008
  27. "Press conference, 7 November 2006, Mayfair hotel, London". genesis-news.com. Retrieved on 23 March 2007.
  28. Genesis to participate in Live Earth. Liveearth.org. Retrieved on 25 March, 2007.
  29. I can never play the drums again, says Phil Collins“, Daily Mail, 10 September 2009. 
  30. Latest Music News, Band, Artist, Musician & Music Video News. Billboard.com. წაკითხვის თარიღი: 2011-07-21.
  31. Phil Collins calls time on music career“, 3 March 2011. წაკითხვის თარიღი: 4 March 2011. 
  32. Andy Greene (2011-09-27). Peter Gabriel: Possibility of Genesis Reunion Is Slim | Music News. Rolling Stone. წაკითხვის თარიღი: 2011-10-08.
  33. Rush: Beyond the Lighted Stage. Rush: Beyond the Lighted Stage. წაკითხვის თარიღი: 27 July 2011.
  34. Interview: Steve Hogarth of Marillion. Mstation.org. წაკითხვის თარიღი: 17 January 2008.
  35. IQ: Peter Nicholls.
  36. Pendragon website.
  37. Interview with Graeme Murray in Classic Rock, March 2011, Issue 155.
  38. Bredius, Mark. Jordan Rudess News. Dream Theater - The Offici al Site. Dream Theater. წაკითხვის თარიღი: 17 January 2008.
  39. Interview of Jordan Rudess. Aux Portes Du Métal. წაკითხვის თარიღი: 17 January 2008.
  40. Christopulos, Jim. "Paul Whitehead interview". vandergraafgenerator.co.uk. Retrieved on 23 March 2007.

რესურსები ინტერნეტში

Commons-logo.svg
ვიკისაწყობში? არის გვერდი თემაზე:
Musical notes.svg მუსიკის პორტალი – დაათვალიერეთ ვიკიპედიის სხვა სტატიები მუსიკაზე.