მალაბო

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
ქალაქი
მალაბო
Malabo
Malabo a 13-oct-01.jpg
ქვეყანა ეკვატორული გვინეის დროშა ეკვატორული გვინეა
კოორდინატები 3°45′07″ ჩ. გ. 8°46′25″ ა. გ. / 3.7520639° ჩ. გ. 8.7737000° ა. გ. / 3.7520639; 8.7737000
დაარსდა 1827
სიმაღლე 0
მოსახლეობა 155,963 კაცი (2005)
დროის სარტყელი UTC+1

მალაბო მდებარეობა ეკვატორული გვინეა

Red pog.svg

მალაბო (Malabo; 1973 წლამდესანტა-ისაბელი) — ეკვატორული გვინეის რესპუბლიკის დედაქალაქი. გაშენებულია კუნძულ ბიოკოს ჩრდილოეთ ნაწილში, დაძირული ვულკანის სიახლოვეს, ზღვის დონიდან 0 მ სიმაღლეზე. გარემო ტერიტორია ვრცელდება ბიაფრის ყურეზე, რომელიც თავის მხრივ, წარმოადგენს გვინეის ყურის ნაწილს.

დააარსეს ინგლისელებმა XIX საუკუნის 20-იან წლებში და უწოდეს პორტ-კლარენსი. კუნძულ ფერნანდო-პოზე ესპანეთის გაბატონების (1843 წელი) შემდეგ დაერქვა სანტა-ისაბელი. 1968 წლამდე იყო ესპანეთის კოლონია — ესპანეთის გვინეის ადმინისტრაციული ცენტრი, 1968 წლის 12 ოქტომბრიდან — ეკვატორული გვინეის რესპუბლიკის დედაქალაქი. მალაბო ეწოდა 1973 წელს, ბუბის ტომის ბელადის სახელის მიხედვით, რომელიც ხელმძღვანელობდა კოლონიზატორების წინააღმდეგ ბრძოლას.

მალაბო ქვეყნის მთავარი კომერციული და ფინანსური ცენტრია. ნავსადგური რეგიონში ერთ-ერთი უღრმესია, ხელსაყრელია რამდენიმე გემის სადგომად. ეკონომიკის ერთ-ერთი ძირითადი მამოძრავებელი ძალაა კაკაოს, მერქნისა და ყავის ექსპორტზე გატანა. არის საერთაშორისო აეროპორტი, რომელიც ასრულებს რეისებს ეკვატორულ გვინეაში (ქალაქი ბატა), აფრიკისა და ევროპის სხვადასხვა ქალაქებსა და ამერიკის შეერთებულ შტატებში. 1969 წლის აურზაურის შედეგად, ქალაქში მცხოვრები ევროპელი მოსახლეობა შეთხელდა. 2005 წლის აღწერის მონაცემებით ქალაქ მალაბოს მოსახლეობა შეადგენდა 155,963 ადამიანს.

ჰავა ეკვატორულია. საშუალო წლიური ტემპერატურა უდრის 25,4 °C. ატმოსფერული ნალექების რაოდენობა დაახლოებით 2000 მმ წელიწადში. ქვეყანაში ნავთობის მარაგის გამოვლინებამ 1980-1990-იან წლებში ხელი შეუწყო მალაბოში ბიზნესის ზრდა-განვითარებას.

რესურსები ინტერნეტში[რედაქტირება]