მარია დე ლა პას ესპანელი

მასალა ვიკიპედიიდან — თავისუფალი ენციკლოპედია
Jump to navigation Jump to search
მარია დე ლა პას ესპანელი
La infanta Paz de Borbón (Lenbach).jpg
დაბ. თარიღი 23 ივნისი, 1862
მადრიდი, ესპანეთის სამეფო
გარდ. თარიღი 4 დეკემბერი, 1946, (84 წლის)
მიუნხენი, მოკავშირეთა მიერ ოკუპირებული გერმანია
ეროვნება ესპანელები
წოდება ბავარიის პრინცესა
რელიგია კათოლიციზმი
მეუღლე(ები) ლუდვიგ ფერდინანდ ბავარიელი
(ქ. 1883)
შვილ(ებ)ი ფერდინანდი
ადალბერტი
მარია დელ პილარი
მშობლები მამა: ფრანსისკო, კადისის ჰერცოგი
დედა: ისაბელ II, ესპანეთის დედოფალი

მარია დე ლა პას ესპანელი (ესპ. María de la Paz de España, გერმ. María de la Paz von Spanien; დ. 23 ივნისი, 1862 — გ. 4 დეკემბერი, 1946) — ბურბონთა დინასტიის წარმომადგენელი. ესპანეთის დედოფალ ისაბელ II-ისა და კადისის ჰერცოგ ფრანსისკო დე ასისის შუათანა ასული. ბავარიის პრინცესა 1883-1946 წლებში როგორც პრინც ლუდვიგ ფერდინანდ ბავარიელის მეუღლე.

ბიოგრაფია[რედაქტირება | წყაროს რედაქტირება]

მარია დე ლა პას ესპანელის გერბი

მარია დე ლა პასი დაიბადა 1862 წლის 23 ივნისს მადრიდში. იგი იყო ესპანეთის დედოფალ ისაბელ II-ისა და მისი მეუღლის, კადისის ჰერცოგ ფრანსისკო დე ასის დე ბურბონის შუათანა ასული. მისი ბავშვობისა და მოზარდობის ხანა დრამებითაა სავსე: როდესაც იგი მხოლოდ ექვსი წლის იყო, 1868 წელს დედამისის, ისაბელ II-ის მმართველობა დაამხეს და სამეფო ოჯახი საფრანგეთში გააძევეს, ამას დაერთო ისიც, რომ 1871 წელს მისმა სიძემ საჯაროდ მოიკლა თავი.

1874 წელს ესპანეთში მონარქია აღსდგა და ტახტზე მისი ძმა ალფონსო XII ავიდა, რომელთან ერთადაც მარია დე ლა პასი და მისი დები მშობლიურ ესპანეთში დაბრუნდნენ. 1875 წელს ესპანეთში მისი უფროსი და, ისაბელი ჩავიდა, რომელიც სანამ ალფონსოს შვილი გაუჩნდებოდა ტახტის მემკვიდრედ მოიაზრებოდა.

თავად მარია დე ლა პასი და მისი დები: მარია დელ პილარი და ეულალია, ესპანეთში მხოლოდ 1877 წელს დაბრუნდნენ. მათმა ბედნიერმა ცხოვრებამ სამშობლოში ძალიან ცოტა ხანს გასტანა. 1878 წელს, ქორწინებიდან მალევე ალფონსო XII-ის საყვარელი მეუღლე, 18 წლის დედოფალი მერსედეს ორლეანელი ჭლექით გარდაიცვალა, რაც ალფონსოსთან ერთად ძალიან განიცადა მარია დე ლა პასმაც. სულ ერთ წელიწადში, 1879 წელს გარდაიცვალა მარია დე ლა პასის საყვარელი უფროსი და მარია დელ პილარიც, ასევე 18 წლის ასაკში. ცხადია, ამდენი ახლობლის უეცარმა გარდაცვალებამ საშინლად იმოქმედა მარია დე ლა პასზე, რომელიც ძალიან მელანქოლიური ხასიათის გახდა და რომანტიკული ლექსების წერა დაიწყო.

1883 წლის 2 აპრილს, 18 წლის მარია დე ლა პასი მადრიდში ცოლად შერთეს მის ბიძაშვილ ლუდვიგ ფერდინანდ ბავარიელს, რომელიც ბავარიის მეფე ლუდვიგ I-ის შვილიშვილი იყო. ამის შემდეგ იგი ქმართან ერთად მიუნხენში, ნიმფენბურგის სასახლეში დასახლდა. ბავარიაში გადასახლების შემდეგ მან მთელი თავისი სიცოცხლე თავისი შვილების აღზრდას, ქველმოქმედებასა და პოეზიას მიუძღვნა.

მარია დე ლა პასი გარდაიცვალა 1946 წლის 4 დეკემბერს, 84 წლის ასაკში, ბავარიაში.

შვილები[რედაქტირება | წყაროს რედაქტირება]

  1. ფერდინანდი (1884-1958), ცოლად შეირთო თავისი ბიძაშვილი, ესპანეთის მეფე ალფონსო XII-ის ასული მარია ტერეზა ესპანელი, რომელთანაც შეეძინა ოთხი შვილი, მათ შორის მარია დე ლას მერსედესი, რომელიც შემდგომში ცოლად გაჰყვა ირაკლი ბაგრატიონ-მუხრანელს;
  2. ადალბერტი (1886-1970), ცნობილი ისტორიკოსი და დიპლომატი. ცოლად შეირთო გრაფინია ავგუსტა შეეფრიედელი, რომელთანაც ორი ვაჟი შეეძინა;
  3. მარია დელ პილარი (1891-1987), მას მარია დე ლა პასმა სახელი თავისი განსვენებული დის, მარია დელ პილარ ესპანელის პატივსაცემად დაარქვა. შემდგომში მან გათხოვებაზე კატეგორიული უარი განაცხადა და მხატვარი გახდა.

წინაპრები[რედაქტირება | წყაროს რედაქტირება]

ლიტერატურა[რედაქტირება | წყაროს რედაქტირება]

  • María Teresa Álvarez, La infanta Paz de Borbón, La Esfera de los Libros, 2011. ISBN 8499700136