ქართული მარში

ქართული მარში;
	ქართული მარშის სიმბოლო, დავით აღმაშენებლის დროშა
ლიდერი	ალექსანდრე ბრეგაძე ; გია კორკოტაშვილი ; ლადო სადღობელაშვილი
დაფუძნდა	2017
იდეოლოგია	ნაციონალ-კონსერვატიზმი; ქრისტიან-დემოკრატია
შტაბ-ბინა	თბილისი, საქართველო

ქართული მარში — კონსერვატული და ულტრანაციონალისტური სახალხო ორგანიზაცია საქართველოში. დაარსდა 2017 წლის აპრილში.

„ქართული მარშის“ პირველი მასშტაბური საპროტესო აქცია გაიმართა 2017 წლის 14 ივლისს. აქციის მონაწილეების მოთხოვნა იყო უცხოელი არალეგალური იმიგრანტების დეპორტაცია საქართველოდან და ქვეყნის საიმიგრაციო პოლიტიკის გამკაცრება. საპროტესტო მსვლელობა გაიმართა თბილისის დავით აღმაშენებლის გამზირზე.^[1] ^[2]

საპროტესტო აქციები[რედაქტირება | წყაროს რედაქტირება]

2017 წლის 14 ივლისს მოეწყო „ქართული მარშის“ პირველი მასშტაბური საპროტესო აქცია, რომელიც გაიმართა უცხოელი არალეგალური იმიგრანტების საქართველოდან დეპორტირების და ქვეყნის საიმიგრაციო პოლიტიკის გამკაცრების მოთხოვნით თბილისის დავით აღმაშენებლის გამზირზე.

31 ოქტომბერს „ქართულმა მარშმა“ მოაწყო საპროტესტო აქცია საქართველოს ფეხბურთის ფედერაციის სათაო ოფისის წინ საქართველოს ეროვნული ნაკრების კაპიტნის, გურამ კაშიის გუნდიდან მოკვეთის მოთხოვნით. აქციის მონაწილეები ასევე მოითხოვდნენ საქართველოს ფეხბურთის ფედერაციის პრეზიდენტისგან, ლევან კობიაშვილისგან ბოდიშის მოხდას. გავრცელებული ინფორმაციით, დააკავეს 6 აქციის მონაწილე ღამის საათებში პიროტექნიკური ნაკეთობების გამოყენების გამო.

საპროტესტო აქციის მოტივი გახდა გურამ კაშიის მიერ ლგბტ პირების დროშით შეფერილი კაპიტნის სამკლაურით თამაში ერედივიზიეს მე-8 ტურის მატჩში „ვიტესსა“ და „ჰერაკლესს“ შორის. ამ სამკლაურის გაკეთებით კაშია შეუერთდა ლგბტ პირებზე ძალადობის წინააღმდეგ მოწყობილ აქციას მთელი ევროპის მასშტაბით. შემდგომში კაშიამ განმარტა, რომ ლგბტ პირების მხარდასაჭერი სამკლაურით თამაშით იგი სექსუალური უმცირესობებისადმი გამოვლენილი აგრესიის წინააღმდეგ გამოვიდა. კაშიას საქციელი მოუწონეს და მხარი დაუჭირეს სხვა ფეხბურთელებმა და სპორტულმა ჟურნალისტებმაც, ასევე საქართველოს საფეხბურთო ფედერაციის პრეზიდენტმა ლევან კობიაშვილმა, საქართველოს პრეზიდენტმა გიორგი მარგველაშვილმა და თბილისის მერმა კახაბერ კალაძემ. სოციალურ ქსელებში რიგითმა ფეხბურთის გულშემატკივრემაც ააგორეს კაშიას მხარდასაჭერი კამპანია.^[3] ^[4] ^[5]

საქართველოს ფეხბურთის ფედერაციამ არ დააკმაყოფილა „ქართული მარშის“ მოთხოვნები. 13 ნოემბერისთვის გურამ კაშია კვლავ გამოიძახეს საქართველოს ეროვნულ ნაკრებში სათამაშოდ, ამჯერად ბელარუსის წინააღმდეგ დაგეგმილ მატჩზე რამაზ შენგელიას სახელობის ქუთაისი ცენტრალურ სტადიონზე. მატჩის მიმდინარეობისას ტრიბუნებზე შეიჭრნენ „ქართული მარშის“ წევრები და დაწვეს ლგბტ პირების დროშა. ისინი შეურაცხმყოფელ ტექსტებს სკანდირებდნენ გურამ კაშიას მისამართით. მიმდებარე პერიმეტრის გასაკონტროლებრად ადგილზე მობილიზდა პოლიცია და სპეცრაზმი., თუმცა საქართველოს შინაგან საქმეთა სამინისტროს განცხადებით, მატჩის დროს არავინ დაუკავებიათ.

2018 წლის 19 მარტს „ქართული მარშის“ აქტივისტებმა მოაწყვეს საპროტესტო აქცია სატელევიზიო კომპანია „რუსთავი 2-ის“ შტაბ-ბინასთან, რომელიც საბოლოო ჯამში ფიზიკურ დაპირისპირებაში გადაიზარდა. მდგომარეობა მაშინ გამძაფრდა, როდესაც შენობის ეზოში გამოჩნდა მანქანა, რომელშიც გიორგი გაბუნია იჯდა.

„მე ვფიქრობ, რომ იესო ქრისტემ დიდი შეცდომა დაუშა, როდესაც საქადაგებლად 2000 წლის წინ ისრაელში მოვიდა. უნდა მოსულიყო აჭარაში და ჯვარზე კი ვერ გააკრავდნენ, იმიტომ რომ ჯვრის დასამზადებლად ხე აღარ იქნებოდა დარჩენილი. ამ დროისთვის ბიძინას ეზოში იქნება ყველა ხე გადარგული. ასე იცოცხლებდა იესო ღრმა სიბერემდე უხეო აჭარაში. მთავარია სადმე ბიძინასთვის არ გადაეკვეთა გზა, ან უარესი, მის ეზოში არ დაეწყო ქადაგება, თორემ იგივენაირად დაასრულებდა, როგორც 2000 წლის წინ, ან უარესად" - ასეთი შესავალი გაუკეთა რუსთავის 2-ის გადაცემა „პოსტკრიპტუმს“ წამყვანმა გიორგი გაბუნიამ აჭარაში ხეების მასიური რაოდენობით მოჭრის შესახებ გაკეთებულ სიუჟეტს. მეორე დღეს „რუსთავი 2-ის“ შენობასთან „ქართული მარშის“ წევრებმა გამართეს საპროტესტო აქცია, რომელზეც სწორედ აღნიშნული გადაცემის ეთერში გასვლას აპროტესტებდნენ. აქტივისტებმა განაცხადეს, რომ გიორგი გაბუნიას სიტყვები იესო ქრისტეს შესახებ შეურაცხყოფელია მართლმადიდებლური ეკლესიის მრევლისთვის. სიტუაცია გამძაფრდა მაშინ, როდესაც ტელეკომპანიის ეზოში შემივდა მანქანა, რომელშიც გიორგი გაბუნია იჯდა. „ქართული მარშის“ წევრები თავს დაესხნენ მანქანას და „რუსთავი 2-ის“ ჟურნალისტებს და ფიზიკურად გაუსწორდნენ მათ. ერთ-ერთი ჟურნალისტი სასწრაფო დახმარებამ საავადმყოფოში გადაიყვანა. არეულობის ადგილზე საპატრულო ეკიპაჟები მობილიზდნენ საზოგადოებრივი წესრიგისა და უსაფრთხოების დაცვის მიზნით. პოლიციამ „ქართული მარშის“ 6 წევრი დააკავა საქართველოს სისხლის სამართლის კოდექსის 126-ე მუხლის დარღვევის ბრალდებით, რაც სისტემატური ცემას ან ფიზიკური ან ფსიქიკური ტანჯვის გამომწვევ სხვაგვარ ძალადობას გულისხმობს. ინციდენტის დროს დაზიანდა ტელეკომპანიის ერთ-ერთი თანამშრომლის კუთვნილი ავტომანქანა, რაზეც გამოძიება სხვისი ნივთის ან ქონების დაზიანების ფაქტზე, საქართველოს სისხლის სამართლის 187-ე მუხლით დაიწყო. შემდგომში საქართველოს შინაგან საქმეთა სამინისტრომ გააკეთა განცხადება, რომ „ქართული მარშის“ წევრი პირები საქართველოს სისხლის სამართლის კოდექსის 239-ე მუხლის მე-2 ნაწილის „ა“ ქვეპუნქტით (ხულიგნობა წინასწარი შეთანხმებით ჯგუფის მიერ) არიან დაკავებულები, რომელიც 2-დან 5 წლამდე თავისუფლების აღკვეთას ითვალისწინებს.

„ქართული მარშის“ წევრების სასამართლო პროცესი 23 მარტს გაიმართა. იგი 5 საათის განმავლობაში მიმდინარეობდა. „ქართული მარშის“ წევრებმა ხმაურით გააპროტესტეს წინასწარი პატიმრობის შეფარდების ფაქტი. გაისმა მმართველი პარტიის, „ქართული ოცნების“ კრიტიკაც. ^[6] ^[7] ^[8] ^[9] ^[10] ^[11]