Coldplay

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
Coldplay
Coldplay სცენაზე 2009 წელს, ტურნე Viva La Vida. მარცხნიდან მარჯვნივ: კრის მარტინი, გაი ბერიმენი, ჯონი ბაკლენდი და გაი ბერიმენი
Coldplay სცენაზე 2009 წელს, ტურნე Viva La Vida. მარცხნიდან მარჯვნივ: კრის მარტინი, გაი ბერიმენი, ჯონი ბაკლენდი და გაი ბერიმენი
ბიოგრაფია
წარმოშობა ლონდონი, ინგლისი
ჟანრ(ებ)ი ალტერნატიული როკი, პოსტ-ბრიტპოპი[1][2]
აქტიური 1996— დღემდე
ლეიბლ(ებ)ი Warner Music, Parlophone, Capitol, Atlantic
ასოციაციები Apparatjik
საიტი coldplay.com
წევრები
კრის მარტინი
ჯონი ბაკლენდი
გაი ბერიმენი
უილ ჩემპიონი

Coldplayინგლისური როკ-ჯგუფი ლონდონიდან. ჩამოყალიბდა 1998 წელს. მსოფლიო აღიარებას მიაღწია 2000 წელს გამოშვებული სინგლით „Yellow“, რასაც მოჰყვა სადებიუტო ალბომი, Parachutes. ჯგუფის წევრები არიან: ვოკალისტი კრის მარტინი, გიტარისტი ჯონი ბაკლენდი, ბასისტი გაი ბერიმენი და დრამერი უილ ჩემპიონი. დღემდე Coldplay-ს 30 მილიონამდე ალბომი აქვს გაყიდული.

Coldplay-ს ადრეულ ნამუშევრებს ხშირად ადარებდნენ ჯეფ ბაკლის და Radiohead-ის შემოქმედებას.[3] პარალელებს ავლებდნენ U2-სთანაც.[4] ალბომის, Parachutes, გამოსვლის შემდეგ Coldplay-მ სხვა წყაროებიდანაც მოიზიდა გავლენა. აღსანიშნავია, Echo & the Bunnymen‎-ის[5] და ჯორჯ ჰარისონის[6] გავლენა ალბომზე A Rush of Blood to the Head (2002) და ჯონი კეშის და Kraftwerk-ის გავლენა ალბომზე X&Y (2005).[7]

Coldplay აქტიურად უჭერს მხარს სხვადასხვა სოციალურ და პოლიტიკურ მოძრაობებს, მათ შორის, ოქსფამის Make Trade Fair კამპანიასა და საერთაშორისო ამნისტიას. ჯგუფი ეწევა საქველმოქმედო საქმიანობასაც.[8]

ისტორია

შექმნა და ადრეული წლები (1996—1999)

1998 წლის გამოსვლის პლაკატი, სანამ ჯგუფი ოფიციალურად გახდებოდა Coldplay

ჯგუფის წევრები ერთმანეთს 1996 წელს რამსეი ჰოლში შეხვდნენ, რომელიც ლონდონის უნივერსიტეტის კოლეჯის სასტუმრო დარბაზია. კრის მარტინი და ჯონი ბაკლენდი ჯგუფის პირველი წევრები იყვნენ და ერთმანეთს საორიენტაციო კვირის განმავლობაში ხვდებოდნენ. წლის დანარჩენი დროის მანძილზე ისინი ჯგუფს გეგმავდნენ, და 'N Sync-ით შთაგონებულ ბოიბენდ „The Pectorals“-ში აღმოჩნდნენ.[9] საბოლოოდ გაი ბერიმენიც, მათი თანაკურსელი, შეუერთდა ჯგუფს მიუხედავად მათ მიერ არჩეული მუსიკალური მიმდინარეობისას. 1997 წლისთვის, Coldplay პატარა საკლუბო სიმღერებს ასრულებდა ლონდონის კემდენის პრომოუტერების წინაშე. ამ დროისათვის ჯგუფმა მათ ძველ, ბოი-ბენდურ იმიჯზე უარი განაცხადა და სახელად Starfish დაირქვა.[9] ასევე, მარტინი თავის სკოლის მეგობარს ფილ ჰარვის დაუკავშირდა, რომელიც ოქსფორდში კლასიკას სწავლობდა და ჯგუფის მენეჯერობა შესთავაზა. ჰარვი ჯგუფის მენეჯერად მეორე ალბომის, A Rush of Blood to the Head გამოსვლამდე დარჩა.

საბოლოოდ, 1998 წელს, ჯგუფის შემადგენლობა უილ ჩემპიონმა შეავსო. მრავალმხრივი ნიჭით დაჯილდოებული უილი ბავშვობიდან უკრავდა პიანინოზე, გიტარასა და ბას-გიტარაზე, და ტუჩის გარმონზე. მან სწრაფად ისწავლა დასარტყამ ინსტრუმენტზე დაკვრა, თუმცა ამის არანაირი გამოცდილება არ ჰქონია. ამის შემდეგ ტიმ რაის-ოქსლიმ, ჯგუფის წევრების საერთო მეგობარმა, ნება დართო მათ სახელი „Coldplay“ გამოეყენებინათ. მან გადაიფიქრა ამ სახელის თავის ჯგუფისთვის დარქმევა, რადგან ის ზედმეტად დეპრესიული ეჩვენებოდა. რაის-ოქსლის ჯგუფში ელექტრონულ კლავიშზე დაკვრა შესთავაზეს, მაგრამ მან უარი განაცხადა რადგან ის უკვე კინში იყო დაკავებული.[10]

1998 წლის მაისში ჯგუფმა გამოუშვა Safety EP-ს 500 ასლი. დისკების უმრავლესობა ხმის ჩამწერ სტუდიებსა და მეგობრებს დაურიგეს. პუბლიკისთვის მხოლოდ 50 ცალი კოპია იყო ხელმისაწვდომი. დეკემბერში Coldplay პატარა, დამოუკიდებელ ხმის ჩამწერ სტუდიაში Fierce Panda მივიდა. ამ ლეიბლის პირველი რელიზი იყო 3 ტრეკიანი Brothers & Sisters EP, რომელიც სწრაფად, 4 დღეში იქნა ჩაწერილი 1999 წლის თებერვალში. აპრილში გამოშვებული EP 2500 ასლამდე იყო შეზღუდული. ჯგუფის მიმართ ინტერესი ნელ-ნელა იზრდებოდა დიდ ბრიტანეთში, რასაც სტივ ლამაკი და Radio 1-ი უწყობდნენ ხელს, ეთერში მათი სიმღერების ხშირი გაშვებით.

1999 წლის გაზაფხულზე, საბოლოო გამოცდების დასრულების შემდეგ ჯგუფმა ლეიბლ Parlophone- თან ხელი მოაწერა კონტრაქტს 5 ალბომის გამოშვების შესახებ. მას შემდეგ რაც ჯგუფის წევრებმა პირველი განაცხადი გააკეთეს გლასტონბერის ფესტივალზე, სტუდიაში EP-ს The Blue Room ჩაწერას შეუდგნენ. EP-ს 5000 ასლი პუბლიკისთვის ხელმისაწვდომი ოქტომბერში გახდა, ხოლო სინგლმა „Bigger Stronger“, რომელიც Radio 1-ზე ტრიალებდა, ჯგუფის დამკვიდრებაში მნიშვნელოვანი როლი შეასრულა.

თუმცა, ჩაწერითი სესიები The Blue Room-ისთვის ცვალებადი და მოულოდნელობებით სავსე იყო. მარტინმა ჩემპიონი ჯგუფიდანაც კი გააგდო, მაგრამ მალევე ის მისივე დიდი თხოვნის შემდეგ უკან დაბრუნდა. მარტინი დანაშაულის გრძნობის გამო სასმელს მიეძალა. საბოლოოდ, ჯგუფის წევრებმა აზრთა სხვადასხვაობები შეაჯერეს და რამდენიმე წესზე შეთანხმდნენ, რათა ჯგუფი სრული და დაუნაწევრებელი შეენარჩუნებინათ. პირველ რიგში ისინი თანასწორობაზე შეთანხმდნენ: ჯგუფში დემოკრატია იყო, ანუ მოგება თანაბრად ნაწილდებოდა წევრებს შორის, რისი მაგალითიც იყო U2, A-Ha და R.E.M.. მეორე, ისინი შეთანხმდნენ რომ ნებისმიერი, ვინც მძიმე ნარკოტიებს მიეძალებოდა, ჯგუფიდან წავიდოდა.

Parachutes (1999—2001)

მუსიკალური ნაწყვეტები:

Yellow

სიმღერის ნაწყვეტი — 599 KB
ვერ ხსნით ფაილს? იხ. მედია მაშველი.

1999 წლის ნოემბერში Coldplay-მ ძალების მობილიზება სადებიუტო ალბომზე გააკეთა. ჯგუფმა ახალი წელი სინგლების „Yellow“ და „Everything’s Not Lost“ დასრულებაში გაატარეს. მათ ასევე კარლინგ ტურნეზე დაუკრეს, რომლითაც მათ მომავალ გზას გაესვა ხაზი. სამი უჰიტო EP-ს გამოშვების შემდეგ, Coldplay-მ თავისი პირველი ტოპ 40-ში შემავალი ჰიტი „Shiver“ დაარელიზა. ის 2000 წლის მარტში გამოჩნდა და ჯგუფს თავმდაბალი #35 ადგილი და MTV-ს პირველი ეთერი მოუტანა. 2000 წლის ივნისი ჯგუფისთვის გარდამტეხი და მნიშვნელოვანი იყო. ჯგუფმა გამოუშვა სინგლი „Yellow“ რომელმაც ჩარტები დაიპყრო. სიმღერამ ინგლისის ჩარტის #4 ადგილი დაიჭირა და ჯგუფს ხალხში ცნობადობა მოუტანა.

Coldplay-მ პირველი სრული, მოცულობითი ალბომი, „Parachutes“ 2000-ის ივლისში გამოუშვა და მან დებიუტობა ინგლისის ალომების ჩარტის #1 ადგილზე განიცადა. კრიტიკოსების მხარდაჭერების მხარდამხარ, „Parachutes“-ს ხანდახან აკრიტიკებდნენ მისი დიდი მსგავსების გამო ალტერნატული ჯგუფის Radiohead-ის მიმართ მათი ყოფნის დროს The Bends—OK Computer ერაში. „Yellow“-მ და „Trouble“-მა ატლანტის ოკეანის ორივე მხარეს მყარად დაიჭირა რადიო ეთერები. თავიდან Parlophone-ი 40,000 ეგზემპლარის გაყიდვას ვარაუდობდა, თუმცა შობისთვის 1.6 მილიონი კოპია იყო გაყიდული მხოლოდ დიდ ბრიტანეთში. Parachutes ნომინირებული იყო მერკურის მუსიკალურ პრიზზე 2000 წლის სექტემბერში.

მას შემდეგ რაც ჯგუფმა ევროპაში პოპულარობას მიაღწია, მან გეზი ჩრდილოეთ ამერიკის დაპყრობისკენ აიღო. ამერიკაში Parachutes 2000-ის ნოემბერში გამოვიდა. ჯგუფმა ადრე 2001-ში ამერიკაში საკლუბო ტურნეზე გაემართა. ეს ყველაფერი კი ვანკუვერში, კანადაში შოუთი დაიწყო. ამა მოჰყვა ჯგუფის მიწვევა შოუებში: Saturday Night Live, Late Night with Conan O’Brien, The Late Show with David Letterman. Parachutes ნელა იკრებდა ძალებს ამერიკაში, თუმცა საბოლოოდ ორმაგი პლატინის ალბომის სტატუსს მიაღწია. ალბომი კრიტიკოსებმაც კარგად მიიღეს, მან საუკეთესო ალტერნატიული როკ ალბომის წოდება მიიიღო 2002 წლის გრემის დაჯილდოვებაზე.

A Rush of Blood to the Head (2001—2004)

Coldplay-ს გამოსვლები 2003 წელს.

Coldplay სტუდიაში 2001 წლის ოქტომბერში დაბრუნდა რათა მეორე ალბომზე დაეწყო მუშაობა. დიდი მოლოდინებით Coldplay-მ 2002 წლის აგვისტოში A Rush of Blood to the Head დაარელიზა.

გამხსნელი ტრეკი, „Politic“ 2001 წლის 11 სექტემბრის ტერორისტული თავდასხმების შემდგომ დღეებში იყო დაწერილი. ახალმა ალბომმა რამდენიმე ახალი პოპულარული სინგლი მოუტანა ჯგუფს, აღსანიშნავია „In My Place“, „The Scientist“ და „Clocks“.

Coldplay დაახლოებით ერთი წლის განმავლობაში მართავდა ტურს-2002 წლის ივნისიდან 2003 წლის სექტემბრამდე. ამ დროის განმავლობაში მათ ხუთი კონტინენტზე გამართეს კონცერტები და ფესტივალების Glastonbury Festival, V2003 და Rock Werchter წამყვანი ფიგურები(ჰედლაინერები) იყვნენ. A Rush of Blood to the Head ტურმა ჯგუფის დიდი პროგრესი აჩვენა დიდ სცენებზე და სტადიონებზე გამოსვლის თვალსაზრისით. ბევრი შოუ დეტალურ განათებას და ინდივიდუალურ ეკრანებს შეიცავდა, რაც თავის ელემენტებით U2-ს ბოლოდროინდელ Elevation Tour-ს გავდა. ვრცელი ტურის განმავლობაში Coldplay-მ ასევე ლაივ CD და DVD ჩაწერა, ლაივ 2003 სიდნეის ჰორდერნ პავილიონში. ჩანაწერი ახალ სიმღერას „Moses“ შეიცავდა.

2003 წლის დეკემბერში ჟურნალ როლინგ სტოუნზის მიერ Coldplay საუკეთესო ჯგუფად დასახელდა. ამ დროსთვისვე მათ გააკეთეს ჯგუფ The Pretenders-ის ჰიტის „2000 Miles“ ქავერ ვერსია, რომელიც ჯგუფის ოფიციალური საიტიდან უფასო გადმოქაჩვისთვის იყო ხელმისაწვდომი. ეს ჩანაწერი ყველაზე ხშირად გადმოქაჩვადი ფაილი გახდა დიდ ბრიტანეთში იმ წელს. A Rush of Blood to the Head ორი ჯილდო აიღო 2003 წლის გრემის დაჯილდოვებაზე. ხოლო 2004 წლის გრემის დაჯილდოვებაზე Clocks-მა საუკეთესო ჩანაწერის წოდება მიიღო. ალბომი ასევე დასახელებულ იქნა როლინგ სტოუნზის 2003 წლის საუკეთესო 500 ალბომის სიაში 473 ადგილზე.

X&Y (2004—2007)

ჯგუფი ბარსელონაში კონცერტის დროს, 2005 წლის სექტემბერი

2004 წელი ჯგუფისთვის დასვენების და საზოგადოებრივი ყურადღების მიღმა ყოფნის წელი იყო. ისინი ტურის შემდეგ ისვენებდნენ და ახალ, მესამე ალბომზე მუშაობდნენ. ამ კონკრეტულ ალბომზე მუსიკალური გავლენის თაობაზე, ბასისტმა გაი ბერიმენმა თქვა, „ბევრ სხვადასხვა რამეს ვუსმენდით ალბომის დაწყებით სტადიაში (X&Y), დაწყებული ბოუიდან, ბრაიან ინოუდან და პინკ ფლოიდიდან, დამთავრებული დეპეშ მოდით, კეიტ ბუშით და Kraftwerk-ით“.[11] მაისში Coldplay-მ ფანები გაახალისა ოფიციალურ სატზე ახალი სიმღერისა და კლიპის პრეზენტაციით. რომელიც ეპლის, მარტინისა და მსახიობ გვინეტ პელტროუს ქალიშვილის დაბადებას ეძღვნებოდა. პროდიუსერმა სერ ჯორჯ მარტინმა წარმოადგინა პრომო სადაც ჯგუფი და მათი პროდიუსერი, კენ ნელსონი, სატირულად ასრულებდნენ რეპ/გლემ როკს. მარტინი ხუმრობდა, რომ ეს მუსიკა ჯეი-ზის მიერ იყო შთაგონებული.

Coldplay-ს მესამე ალბომი, X&Y, 2005 წლის 6 ივნისს გამოვიდა დიდ ბრიტანეთში. ამ ახალმა, გადადებულმა რელიზის თარიღმა ალბომი მომავალ ფისკალურ წელში გადაიყვანა, რამაც EMI-ს აქციების ვარდნა გამოიწვია. ეს ალბომი 2005 წლის საუკეთსოდ გაყიდვადი ალბომი გახადა მსოფლიო მასშტაბით 8.3 მილიონი გაყიდული ალბომით. პირველი სინგლი, Speed of Sound, რადიოსა და ონლაინ მაღაზიებში 18 აპრილს გამოჩნდა ხოლო კომპაკტ დისკზე 23 მაისს გამოვიდა. ალბომი #1 ადგილზე იქნა დაფიქსირებული მთელი მსოფლიოს მასშტაბით 28 ქვეყანაში და დიდი ბრიტანეთის ჩარტის ისტორიაში მეორე ყველაზე სწრაფად გაყიდვადი ალბომი გახდა. კიდევ ორი სხვა სინგლი გამოვიდა იმ წელს: „Fix You“ სექტემბერში და „Talk“ დეკემბერში. 2006 წლის მაისში ჯგუფმა დიდი ბრიტანეთის გარეთ რამდენიმე ქვეყანაში სინგალად გამოუშვა სიმღერა „The Hardest Part“. კომერციული წარმატების მიუხედავად, კრიტიკოსების რეაქციები X&Y მიმართ ნაკლებად ერთსულოვანი იყო მისი წინამორბედისგან განსხვავებით.

2005-ის ივნისიდან 2006-ის ივლისამდე Coldplay თავის Twisted Logic Tour-ზე გაემართა, რომელიც ფესტივალებსაც შეიცავდა. 2005 წლის ივლისში ჯგუფი Live 8 კონცერტზე გამოვიდა ლონდონის ჰაიდ პარკში, სადაც მათ ჯგუფ The Verve-ს ჰიტი „Bittersweet Symphony“ შეასრულეს რიჩარდ ეშკროფტთან ერთად ვოკალში. 2006 წლის თებერვალში Coldplay-მ საუკეთესო ალბომისა და საუკეთესო სინგლის წოდება მიიღო ბრიტანული მუსიკის დაჯილდოებაზე.

Viva La Vida Or Death And All His Friends (2007 — დღემდე)

მუსიკალური ნაწყვეტები:

Viva la Vida

სიმღერის ნაწყვეტი — 149 KB
ვერ ხსნით ფაილს? იხ. მედია მაშველი.

2006 წლის ადრე დეკემბერში Coldplay-ს ოფიციალური საიტი იუწყებოდა ჯგუფის დაგეგმილ ტურნეზე 2007 წლისთვის ლათინური ამერიკის ქვეყნებში. Coldplay-მ ეს ტური ჩილეში, მექსიკაში, ბრაზილიასა და არგენტინაში გამართა.[12] ჯგუფის წევრები ამჟამად მეოთხე სტუდიური ალბომისთვის მასალის შექმნის პროცესში არიან და „მზად არიან ინტიმური შოუები მოაწყონ, რათა გამოსცადონ ახალი სიმღერები პუბლიკაზე“. 2006 წლის ადრე დეკემბერში, Billboard.com იუწყებოდა რომ Coldplay-ს ახალი სტუდიური ალბომი 2007 წლის დასასრულისთვის იგეგმებოდა, თუმცა ეს ინფორმაცია ჯგუფმა თავის ოფიციალური საიტის კითხვა-პასუხის განყოფილებიდან უარყო.

2007 წლის 26 იანვარს, ცნობილმა პროდიუსერმა და მუსიკოსმა ბრაიან ინოუმ ბიბისის რადიო 4-თან ინტერვიუში განაცხადა რომ Coldplay-ს ახალი ალბომის პროდიუსერი ის იქნებოდა, რაც ჯგუფმა თავის ოფიციალურ საიტზე დაადასტურა.[13] 2007 წლის მარტში, სახელგანთქმულმა პროდიუსერმა ტიმბალენდმა ჟურნალ ჯიქიუსთან განაცხადა, რომ ის თანამშრომლობას აპირებდა Coldplay-სთან ახალი ალბომის შექმნის პროცესში.[14]

ჯგუფის გამოსვლა 2008 წელს.

ალბომი Viva La Vida Or Death And All His Friends ოფიციალურად გამოვიდა 2008 წლის 12 ივნისს.

კრის მარტინის თქმით, Viva la Vida არის ჯგუფისათვის ახალი მიმართულების აღმნიშვნელი. ეს არის მკვეთრი ცვლილება წინა სამი ალბომისგან განსხვავებით, რომელსაც თავად ჯგუფი ტრილოგიას უწოდებს. განსხვავება თუნდაც რომ მის ვოკალშია - აქ უფრო ნაკლები ფალცეტის სტილის სიმღერაა, ვიდრე წინა ალბომში. სხვადასხვა სიმღერაში გამოყენებულია უფრო უხეში სოლოები გიტარაზე.

ალბომის პირველი სინგლის სახით ინტერნეტით უფასოდ გავრცელდა Violet Hill, რომელიც იქცა ნამდვილად ჰიტად, თუმცა მასზე დიდი წარმატება, განსაკუთრებით, აშშ-ში, ჰპოვა სიმღერამ Viva la Vida. სხვადასხვა პრომო-აქციით, ტელეგამოსვლებით და წარმატებული საკონცერტო ტურით ჯგუფმა ალბომის მხარდაჭერა დაიწყო

2008 წლის 15 ივნისს ალბომი Viva la Vida or Death and All His Friends მოხვდა ბრიტანული ჩარტების სათავეში. იმ დროისათვის უკვე გაიყიდა მისი 302.000 ასლი. ივნისის მიწურულს იგი უკვე ითვლებოდა ინტერნეტით ყველაზე ჩამოტვირთვად ალბომად.

აგვისტოში კრის მარტინმა განაცხადა, რომ დეკემბერში გამოვიდოდა EP დისკი Prospekt's March, ხოლო მეხუთე სტუდიური ალბომი გამოიცემოდა 2009 წლის დეკემბერში.

2008 წლის ოქტომბერში Coldplay-მ მიიღო ჟურნალის „Q“ ჯილდო, წლის საუკეთესო ალბომისთვის.

2008 წლის ივლისში აგრეთვე დაიწყო ჯგუფის მასშტაბური ტური, რომელიც მოიცავს ბევრ ქვეყანას, სადაც კოლექტივი ჯერ არც არის ნამყოფი.

2008 წლის დეკემბერში გიტარისტმა ჯო სატრიანიმ ჯგუფს უჩივლა მათ სიმღერაში Viva la Vida მისი კომპოზიციის If I Could Fly მელოდიის ნაწყვეტის გამოყენების გამო. თუმცა, ეს სკანდალი მალე შეჩერდა, რადგან ჯგუფმა განაცხადა, რომ ეს მხოლოდ შემთხვევითი დამთხვევა იყო.

2009 წლის 20 იანვარს ცნობილი გახდა, რომ ჯგუფი წარდგენილია BRIT Awards-ის ჯილდოზე - საუკეთესო ბრიტანული ჯგუფის, საუკეთესო ბრიტანული საკონცერტო ჯგუფის, საუკეთესო ბრიტანული ალბომისა და სინგლის კატეგორიაში.

გრემის 51ე დაჯილდოვებაზე, 2009 წლის 8 თებერვალს, ჯგუფმა მიიღო სამი ჯილდო - წლის სიმღერის (Viva la Vida), წლის როკ-ალბომის Viva la Vida or Death and All His Friends) და ჯგუფის/დუეტის წლის ვოკალური შესრულებისათვის (Viva la Vida),

2009 წლის 1 მარტს ჯგუფის ოფიციალური საიტიდან ცნობილი გახდა, რომ დარჩენილ კონცერტებსა და საიტის მეშვეობით უფასოდ გავრცელდება ახალი საკონცერტო დისკი, LeftRightLeftRightLeft, ალბომი ოფიციალურად გამოქვეყნდა ვებ-გვერდზე 2009 წლის 15 მაისს. მასში შეტანილია 9 სიმღერა ჩაწერილია ტურის მიმდინარე ტურის მსვლელობისას.

Mylo Xyloto

დეტროიტის ერთ-ერთ გამოცემასთან ინტერვიუში გაი ბერიმენმა ახსენა, რომ 2009 წლის ბოლომდე ჯგუფი აპირებს ახალი სტუდიური დისკის დასრულებას.

2009 წელს ჯგუფის საკონცერტო ტური Viva la Vida Tour კვლავ გაგრძელდა. ამავე დროს, ჯგუფის სპეციალურ გვერდზე, რომელიც განთავსებულია სისტემაში Twitter გამოქვეყნდა ინფორმაცია, რომ იგი, პროდიუსერ ბრაიან ინოუს დახმარებით კვლავ მუშაობს ახალ მასალაზე სტუდიაში. 2009 წლის მარტში Coldplay-მ გადადო სტუდიური სესიები და განაგრძო საკონცერტო ტური, მაგრამ აპრილიდან კვლავ განაგრძო დისკზე მუშაობა. 2009 წლის დეკემბერში ცნობილი გახდა, რომ Coldplay იწერს სიმღერებს ლონდონის ჩრდილოეთ ნაწილში განლაგებულ ეკლესიაში.

2010 წლის სექტემბერში ცნობილი გახდა, რომ ალბომი წლის ბოლოს არ გამოიცემა.[15]

2011 წლის ზაფხულში ჯგუფი მართავდა საკონცერტო გამოსვლებს სხვადასხვა ფესტივალზე და ასრულებდა რამდენიმე ახალ სიმღერას. 12 აგვისტოს ცნობილი გახდა ალბომის სახელწოდება - Mylo Xyloto და გამოცემის თარიღი - 24 ოქტომბერი 2011.

ჯგუფის წევრები

დისკოგრაფია

სტუდიური ალბომები

პოლიტიკური და სოციალური საქმიანობა

Make Trade Fair, წარწერა კრის მარტინის ფორტეპიანოზე.

მიუხედავად Coldplay-ს დიდი მსოფლიო პოპულარობისა, ჯგუფი საკუთარ მუსიკას მედიაში გამოყენებისგან იცავდა და უარს ამბობდა პროდუქტების რეკლამირებისთვის გამოეყენებაზე. წარსულში Coldplay-მ უარი თქვა გეტორეიდისგან, დიეტური კოკა-კოლასგან და გეპისგან შემოთავაზებულ მრავალმილიონიან კონტრაქტებზე, რომელთაც მათი სიმღერების „Yellow“, „Trouble“ და „Don’t Panic“ გამოყენება სურდათ საკუთარი პროდუქციის რეკლამირებისთვის. მარტინის აზრით, „ჩვენ ვერ ვიცხოვრებთ ჩვენს თავთან მართლებად, თუ ჩვენი სიმღერების მნიშვნელობას და აზრს ასე ფულზე გავყიდით.“[16]

Coldplay-ს წევრები საერთაშორისო ამნისტიას მხარდამჭერები არიან; ფრონტმენი კრის მარტინი კი ასევე „სამართლიანი ვაჭრობის“ დიდი ქომაგი იყო და ამის გამო მხარს უჭერდა ოქსფამის Make Trade Fair კამპანიას მის დასრულებამდე 2005 წელს live 8-ის კონცერტის შემდეგ (რომელშიც ჯგუფიც იღებდა მონაწილეობას). Coldplay ასევე გამოვიდა დიდი რვიანის სამიტზე გლენიგლში. მარტინი ასევე ატარებს Make Trade Fair-ის მაჯის საბნევს, მათ შორის ჯგუფის კონცერტებზეც.

მარტინი წინააღმდეგი იყო 2003 წელს ერაყში შეჭრაზე და 2004 წლის არჩევნებზე დემოკრატების კანდიდატს ჯონ კერის უჭერდა მხარს(მიუხედავად იმისა, რომ ის ამერიკის მოქალაქე არაა).

ჯგუფი ადრეულ წლებში მედიაში სახელგანთქმული იყო თავის მტკიცებით, რომ მოგების 10%-ს ქველმოქმედებისთვის გაიღებდა. ბასისტი გაი ბერიმენი ამბობს, „შეგიძლია ხალხს შენი მოსაზრებები გააცნო. ეს ჩვენთვის დიდი დანახარჯი არაა, მაგრამ თუკი ამით ვინმეს დავეხმარებით, მაშინ ჩვენ მზად ვართ ეს გავაკეთოთ“.[17]

რესურსები ინტერნეტში

სქოლიო

  1. Deusner, Stephen M.. (1 June 2009)Coldplay: LeftRightLeftRightLeft | Album Reviews. Pitchfork. წაკითხვის თარიღი: 11 September 2011.
  2. Dowling, Stephen. “Entertainment | Are we in Britpop's second wave?“, BBC News, 19 August 2005. წაკითხვის თარიღი: 11 September 2011. 
  3. უისკონსინის შტატის ჟურნალი — Coldplay. წაკითხვის თარიღი: 23 ივნისი, 2006.
  4. Blue-Throated Warbler. წაკითხვის თარიღი: 22 ივნისი, 2006.
  5. ბიბისი — რადიო 2 — კრიტიკული სია — Coldplay:A Rush of Blood to the Head. დაარქივებულია ორიგინალიდან 2004-10-26-ში. წაკითხვის თარიღი: 22 ივნისი, 2006.
  6. VH1.com : Coldplay. წაკითხვის თარიღი: 22 ივნისი, 2006.
  7. Coldplay : X&Y. წაკითხვის თარიღი: 22 ივნისი, 2006.
  8. Pinion, Simon (2003). „Coldplay გვეხმარება მოზარდთა კიბოს ფონდის სახეს ღიმილი მოვფინოთ (Coldplay helps put a smile on the Teenage Cancer Trust’s face)“ Indie London (წაკითხვის თარიღი — 5 ივნისი, 2006)
  9. 9.0 9.1 Askmen Coldplay-ს ბიოგრაფია
  10. Q magazine: The Shore Thing. წაკითხვის თარიღი: ივნისი, 2006.
  11. Changing the World at UKULA.
  12. Coldplay-ს ოფიციალური საიტი. წაკითხვის თარიღი: 1 დეკემბერი, 2006.
  13. Billboard.com: ინოუ Coldplay-ს ახალ ალბომის პროდიუსერია
  14. ტიმბალენდი Coldplay-ს ახალ ალბომს აპროდიუსირებს
  15. http://coldplaying.com/index.php?name=News&file=article&sid=7224
  16. Q Magazine (2002)
  17. Amnesty International (USA) — Coldplay. წაკითხვის თარიღი: 22 მარტი, 2005.

წყაროები

  • როუჩ, მარტინი (September 2003). Coldplay: Nobody Said It Was Easy. Omnibus Press. ISBN 0711998108. 
  • სპივაკი, გერ (2004). Coldplay: Look at the Stars. MTV. ISBN 0743491963. 
Musical notes.svg მუსიკის პორტალი – დაათვალიერეთ ვიკიპედიის სხვა სტატიები მუსიკაზე.
მოძიებულია „http://ka.wikipedia.org/w/index.php?title=Coldplay&oldid=2764005“-დან