დიეგო ფორლანი

მასალა ვიკიპედიიდან — თავისუფალი ენციკლოპედია
დიეგო ფორლანი
პირადი მონაცემები
სრული
სახელი
დიეგო ფორლან კორასო[1]
დაბადების
თარიღი
19 მაისი, 1979 (1979-05-19) (44 წლის)[1]
დაბადების
ადგილი
მონტევიდეო, ურუგვაი
სიმაღლე 180 სმ[2]
სათამაშო
პოზიცია
თავდამსხმელი, გარემარბი
ახალგაზრდული კარიერა
1990–1991 პენიაროლი
1991–1994 დანუბიო
1994–1997 ინდეპენდიენტე
პროფესიონალური კარიერა*
წლები გუნდი მატჩი (გოლი)
1997–2002 ინდეპენდიენტე 80 (37)
2002–2004 მანჩესტერ იუნაიტედი 63 (10)
2004–2007 ვილიარეალი 106 (54)
2007–2011 ატლეტიკო მადრიდი 134 (74)
2011–2012 ინტერი მილანი 18 (2)
2012–2014 ინტერნასიონალი 34 (10)
2014–2015 სერესო ოსაკა 42 (17)
2015–2016 პენიაროლი 30 (8)
2016 მუმბაი სიტი 11 (5)
2018 კიჩე 7 (2)
სულ 525 (222)
ეროვნული ნაკრები
2002–2014 ურუგვაი 112 (36)
სამწვრთნელო კარიერა
2020 პენიაროლი
* პროფესიონალურ კლუბებში გამოსვლა და გოლები მხოლოდ ეროვნული ლიგებისთვის იანგარიშება

დიეგო ფორლან კორასო (ესპ. Diego Forlán Corazzo; დ. 19 მაისი, 1979, მონტევიდეო, ურუგვაი) — ყოფილი ურუგვაელი ფეხბურთელი, რომელიც უკანასკნელად თამაშობდა საფეხბურთო კლუბ „კიჩეში“ თავდამსხმელად. 2010 წლის მსოფლიო საფეხბურთო ჩემპიონატის საუკეთესო მოთამაშე ურუგვაის ნაკრების შემადგენლობაში. ტროფეო პიჩიჩის (ესპ. Trofeo Pichichi) და ოქროს ბუცის ორგზის მფლობელი. ითვლება ყველა დროის ერთ-ერთ საუკეთესო ფეხბურთელად ურუგვაის ფეხბურთის ისტორიაში.

ადრეული წლები[რედაქტირება | წყაროს რედაქტირება]

ფორლანი ფეხბურთელების ოჯახში დაიბადა. მამამისი, პაბლო ფორლანი 1970–1975 წლებში ერთ-ერთი ყველაზე უფრო ტიტულოვანი ბრაზილიური კლუბის — „სან-პაულუს“ შემადგენლობაში თამაშობდა. ასევე, იყო 1966 და 1974 წლების მსოფლიო ჩემპიონატების მონაწილე — ურუგვაის ეროვნული ნაკრების წევრი. ხოლო პაპამისი (დედის მხრიდან), ხუან კარლოს კორასო — 1932–1937 წლებში არგენტინული კლუბის — აველიანედას „ინდეპენდიენტეს“ ნახევარმცველი და შემდგომში, ურუგვაის ნაკრების მთავარი მწვრთნელი იყო, რომელმაც ორჯერ — 1959[3] და 1967[4] წლებში სამხრეთ ამერიკის თასი (ესპ. Copa América) მოაპოვებინა ურუგვაის ეროვნულ გუნდს.

კარიერა[რედაქტირება | წყაროს რედაქტირება]

საკლუბო კარიერა[რედაქტირება | წყაროს რედაქტირება]

ფორლანი ფეხბურთის თამაშს მონტევიდეოს „პენიაროლის“ საფეხბურთო აკადემიაში იწყებს. 16 წლის ასაკში მისით ფრანგული „ნანსი“ ინტერესდება. თუმცა ამ კლუბის მწვრთნელი ახალგაზრდა ურუგვაელის საფეხბურთო მონაცემებით მაინცადამაინც ვერ იხიბლება და დიეგოც იძულებულია სამშობლოში დაბრუნდეს. პირველი გუნდი, რომელშიც იგი თავის პროფესიულ საფეხბურთო კარიერას იწყებს, არგენტინული ფეხბურთის ერთ-ერთი გრანდი — აველიანედას „ინდეპენდიენტეა“. სწორედ ამ გუნდში ვლინდება პირველად მისი ტალანტი. „წითელ ეშმაკებთან“ (ესპ. Los Diablos Rojas) ოთხი სეზონის (1997—2001) განმავლობაში ჩატარებულ 80 შეხვედრაში ფორლანს 37 გოლი გააქვს. ამის შემდეგ მისით ერთდროულად რამდენიმე ევროპული კლუბი ინტერესდება. საბოლოოდ, 2002 წლის 22 იანვარს, დიეგო „მანჩესტერ იუნაიტედთან“ აფორმებს კონტრაქტს, რის შედეგადაც მისი ყოფილი გუნდი კომპენსაციის სახით 6 მილიონ 900 ათას ფუნტ სტერლინგს იღებს.

ფორლანის გულშემატკივრების ნაწილი იმედოვნებდა, რომ სამხრეთელი „წითელი ეშმაკებიდან“[5] ჩრდილოელ „წითელ ეშმაკებთან“[6] გადაბარგებულ ახალგაზრდა ფეხბურთელს („მანჩესტერ იუნაიტედი“ იგივე მეტსახელს ატარებს (ინგლ. Red Devils), რასაც „ინდეპენდიენტე“) არ უნდა გაჭირვებოდა ახალ გუნდთან შეგუება. თუმცა ორმხრივი მოლოდინი უფრო მეტი აღმოჩნდა, ვიდრე სინამდვილე. მიუხედავად იმისა, რომ ფორლანი გუნდთან ერთად 2002–03 წლების სეზონის ინგლისის პრემიერლიგას, ინგლისის სუპერთასს და 2003–04 წლების სეზონის ინგლისის ასოციაციის თასს იგებს, 2004 წლის ზაფხულში ის ესპანეთის პრიმერა დივიზიონის „ვილიარეალს“ უერთდება.

„ვილიარეალთან“ ერთად გატარებულ პირველივე სეზონში, ფორლანი 25 გოლის გატანას ახერხებს და ტროფეო პიჩიჩის (ესპ. Trofeo Pichichi) ისაკუთრებს. ორი წარმატებული სეზონის შემდეგ, იგი მადრიდის „ატლეტიკოში“ აგრძელებს თამაშს, სადაც კიდევ ერთხელ ხდება ესპანეთის პრიმერა დივიზიონის (ესპ. Primera División de España) საუკეთესო ბომბარდირი და პირველი ფეხბურთელი, რომელიც რონალდოს შემდეგ მეორედ ეუფლება ამ ტიტულს. წარმატებით ასპარეზობს ასევე, საერთაშორისო საფეხბურთო ტურნირებზეც. 2010 წლის 12 მაისს, ჰამბურგის „ნორდბანკ არენაზე“ (გერმ. HSH Nordbank Arena), უეფა-ს ევროპის ლიგის ფინალში, მადრიდის „ატლეტიკო“ ლონდონის „ფულემს“ უპირისპირდება. ამ მეტად დრამატულ მატჩში „ატლეტიკო“ მხოლოდ დამატებით დროში ახერხებს ლონდონური კლუბის დამარცხებას (2–1). ესპანელთათვის გამარჯვების მომტანი ორივე ბურთი ინგლისელთა კარში ურუგვაელ ფორვარდს გააქვს — შეხვედრის 32-ე და 116-ე წუთებზე. ფორლანს მატჩის საუკეთესო მოთამაშედ ასახელებენ. იმავე წლის 25 აგვისტოს ფორლანი „ატლეტიკოსთან“ ერთად უეფა-ს სუპერთასსაც ეუფლება.

2011–2012 წლებში ფორლანი მილანის „ინტერში“ თამაშობს.

სანაკრებო კარიერა[რედაქტირება | წყაროს რედაქტირება]

პირველად ეროვნული ნაკრების შემადგენლობაში 2002 წლის 27 მარტს, დამამში, საუდის არაბეთის ნაკრების წინააღმდეგ გამართულ საერთაშორისო ამხანაგურ შეხვედრაში გამოდის მინდორზე.[7] სადებიუტო მატჩში თავისი პირველი სანაკრებო გოლი ფორლანს შეხვედრის მეოთხე წუთზევე გააქვს. იმედისმომცემი დასაწყისის მიუხედავად თამაში საუდელთა გამარჯვებით (3–2) სრულდება. მეორე გოლი იმავე წლის 11 ივნისს, 2002 წლის მსოფლიო ჩემპიონატზე, სენეგალის ნაკრების კარში გააქვს. 2010 წლის მსოფლიო ჩემპიონატზე ფორლანი ხუთი გოლის გატანას ახერხებს. ორ გოლს ჩემპიონატის მასპინძლებს, სამხრეთ აფრიკელებს უტანს, ერთს განელებს, თითო-თითოს კი ჰოლანდიას და გერმანიას. ამ მუნდიალზე ფორლანს საუკეთესო მოთამაშედ ასახელებენ. მას გადაეცემა ჩემპიონატის საუკეთესო ფეხბურთელისთვის განკუთვნილი ჯილდო — ოქროს ბურთი.[8] თავის ბოლო, 112-ე შეხვედრას ეროვნული გუნდის მაისურით 2014 წლის 28 ივნისს, რიო-დე-ჟანეიროში, 2014 წლის მსოფლიო ჩემპიონატზეკოლუმბიის ეროვნული ნაკრების წინააღმდეგ მართავს. ეს მუნდიალის მერვედფინალური მატჩია, რომელიც კოლუმბიელთა გამარჯვებით (2–0) სრულდება.[9]

სანაკრებო სტატისტიკა[რედაქტირება | წყაროს რედაქტირება]

2002–2014 წლებში ურუგვაის ეროვნული საფეხბურთო ნაკრების შემადგენლობაში 112 მატჩი ითამაშა და 36 გოლი გაიტანა. [10]

ურუგვაის ეროვნული ნაკრები
წელიმატჩიგოლი
2002 5 2
2003 7 5
2004 11 2
2005 9 2
2006 3 0
2007 9 5
2008 7 3
2009 9 3
2010 11 7
2011 13 3
2012 9 1
2013 14 3
2014 5 0
ჯამში 112 36

რესურსები ინტერნეტში[რედაქტირება | წყაროს რედაქტირება]

ვიკისაწყობში არის გვერდი თემაზე:

სქოლიო[რედაქტირება | წყაროს რედაქტირება]

  1. 1.0 1.1 2014 FIFA World Cup Brazil: List of Players (PDF). FIFA. დაარქივებულია ორიგინალიდან — 2017-08-06. ციტირების თარიღი: 2 აპრილი, 2016.
  2. Diego Forlán Player Profile - ESPN FC.
  3. (ინგლისური) „1959 South American Championship (Ecuador)“. Prepared and maintained by Martín Tabeira for the Rec.Sport.Soccer Statistics Foundation. 12 აგვისტო, 2009. ციტირების თარიღი: 14 მარტი, 2017. შეამოწმეთ თარიღის პარამეტრი |accessdate= და |date=-ში (დახმარება)
  4. (ინგლისური) „1967 South American Championship (Campeonato Sudamericano 1967)“. Prepared and maintained by Martín Tabeira for the Rec.Sport.Soccer Statistics Foundation. 15 მაისი, 2014. ციტირების თარიღი: 14 მარტი, 2017. შეამოწმეთ თარიღის პარამეტრი |accessdate= და |date=-ში (დახმარება)
  5. (ესპანური) „Club Atlético Independiente (Sitio web oficial)“. clubaindependiente.com. ციტირების თარიღი: 15 მარტი, 2017. შეამოწმეთ თარიღის პარამეტრი |accessdate=-ში (დახმარება)
  6. (ესპანური) „Manchester United Football Club (Official website)“. manutd.com. ციტირების თარიღი: 15 მარტი, 2017. შეამოწმეთ თარიღის პარამეტრი |accessdate=-ში (დახმარება)
  7. (ინგლისური) „Saudi Arabia (3–2) Uruguay. International Friendly. 27 March 2002“. 11v11.com. ციტირების თარიღი: 14 მარტი, 2017. შეამოწმეთ თარიღის პარამეტრი |accessdate=-ში (დახმარება)
  8. (ინგლისური) „Uruguay’s Forlán Wins Golden Ball“. nytimes.com. 12 ივლისი, 2010. ციტირების თარიღი: 14 მარტი, 2017. შეამოწმეთ თარიღის პარამეტრი |accessdate= და |date=-ში (დახმარება)
  9. (ინგლისური) „Colombia (2–0) Uruguay. 2014 FIFA World Cup. Round of 16. 28 June 2014. Rio De Janeiro. Estadio do Maracana“. fifa.com. დაარქივებულია ორიგინალიდან — 12 მარტი 2017. ციტირების თარიღი: 14 მარტი, 2017. შეამოწმეთ თარიღის პარამეტრი |accessdate=-ში (დახმარება)
  10. (ინგლისური) „Diego Forlán at National Football Teams“. national-football-teams.com. ციტირების თარიღი: 14 მარტი, 2017. შეამოწმეთ თარიღის პარამეტრი |accessdate=-ში (დახმარება)