შურისმაძიებლები (2012 წლის ფილმი)

„შურისმაძიებლები“
რეჟისორი	ჯოს უიდონი
პროდიუსერი	კევინ ფაიგი
სცენარის ავტორი	ჯოს უიდონი
ნაწარმოები	შურისმაძიებლები; — სტენ ლი; ჯეკ კირბი
ისტორია	ზეკ პენი; ჯოს უიდონი;
როლებში	რობერტ დაუნი უმცროსი; კრის ევანზი; მარკ რუფალო; კრის ჰემსვორთი; სკარლეტ იოჰანსონი; ჯერემი რენერი; ტომ ჰილდსტონი; სემიუელ ლეროი ჯექსონი;
მუსიკა	ალან სილვესტრი
ოპერატორი	შიმუს მაკ-გერვი
მონტაჟი	ჯეფრი ფორდი; ლიზა ლესეკი;
სტუდია	Marvel Studios
დისტრიბუტორი	Walt Disney Pictures
გამოსვლის თარიღი	11 აპრილი, 2012 (მსოფლიო პრემიერა); 4 მაისი, 2012 (აშშ); ; ; ;
ხანგრძლივობა	143 წთ.
ქვეყანა	აშშ
ენა	ინგლისური
ბიუჯეტი	220 მილიონი აშშ დოლარი
შემოსავალი	1.520 მილიარდი აშშ დოლარი

შურისმაძიებლები (ინგლ. The Avengers) — 2012 წლის ამერიკული სუპერგმირული ფილმი, რომელიც Marvel Studios-მა გადაიღო. მას დისტრიბუციას უწევს Walt Disney Pictures. ფილმი ეფუძნება კომპანიის Marvel Comics მიერ გამოცემული სუპერგმირების გუნდ „შურისმაძიებლების“ თავგადასავლებს. ფილმის სცენარის ავტორი და რეჟისორია ჯოს უიდონი. მთავარ როლებს მასში ასრულებენ რობერტ დაუნი უმცროსი, კრის ევანზი, მარკ რუფალო, კრის ჰემსუორთი, სკარლეტ იოჰანსონი, ჯერემი რენერი, ტომ ჰილდსტონი და სემუელ ლ. ჯექსონი.

ფილმის სიუჟეტის მიხედვით, ორგანიზაციის S.H.I.E.L.D. ლიდერი ნიკ ფიური (სემუელ ლ. ჯექსონი) რკინის კაცს, ჰალკსა, თორს და კაპიტან ამერიკას აერთიანებს ერთ გუნდში, რომელსაც „შურისმაძიებლები“ ეწოდება. ჯგუფმა უნდა შეაჩეროს ლოკის, თორის ძმის ქმედებები, რომლებიც მიმართულია დედამიწის განასადგურებლად.

ფილმზე მუშაობა დაიწყო, როდესაც მერილ ლინჩი 2005 წლის აპრილში Marvel Comics-ის ერთ-ერთი მეწილე გახდა. ფილმის „რკინის კაცი“ 2008 წლის წარმატების შემდეგ Marvel Studios-ისგან ცნობილი გახდა, რომ „შურისმაძიებლები“ 2011 წლის ივლისში გამოვიდოდა. 2009 წლის მარტში გუნდს შეუერთდა სკარლეტ იოჰანსონი. ფილმის დასრულება 2012 წლისათვის გადაიდო. უიდონი კოლექტივს 2010 წლის აპრილში შეუერთდა და შეცვალა სცენარი, რომლის ავტორი სინამდვილეში ზეკ პენი იყო. ფილმის წარმოება დაიწყო 2011 წლის აპრილში, ნიუ-მექსიკოში გადაღებებით და 2011 წლის აგვისტოში გადაინაცვლა კლივლენდის ტერიტორიაზე. 2011 წლის სექტემბერში გადაღებები ნიუ-იორკში მიმდინარეობდა. პოსტ-წარმოების პერიოდში ფილმი 2D ფორმატიდან 3D-ში იქნა გადაყვანილი.

„შურისმაძიებლების“ პრემიერა გაიმართა ჰოლივუდში (კალიფორნია, აშშ), თეატრში El Capitan, 2012 წლის 11 აპრილს. დღეისათვის იგი 1 მილიარდი დოლარის შემოსავლის ზღვარის გადალახვის მხრივ რეკორდსმენია და ყველა დროის შემოსავლიანი ფილმების სიაში რიგით მესამე ადგილი უკავია.

ფილმის შემდგომი ნაწილის წარმოება 2012 წლის მაისში დაიწყო.

სიუჟეტი

ყურადღება! ქვემოთ მოყვანილია სიუჟეტის და/ან დასასრულის დეტალები.

ასგარდელი ლოკი ხვდება ჩიტაურების სახელით ცნობილი უცხო რასის მეთაურს. ტესერაქტის სანაცვლოდ უცხოპლანეტელი ლოკის სთავაზობს ჩიტაურელთა დიდ არმიას, რომელიც დედამიწის დაპყრობაში დაეხმარება. ნიკ ფიური, სააგენტო S.H.I.E.L.D.-ის უფროსი და აგენტი მარია ჰილი ეწვევიან კვლევით ცენტრს, სადაც ერიკ სელვიგი მართავს ტესერაქტის კვლევის პროცესს. ფილ კოულსონი განმარტავს, რომ ტესერაქტი გამოჰყოფს ენერგიის დიდ რაოდენობას. მოულოდნელად ტესერაქტი აქტიური ხდება და ხსნის პორტალს, საიდანაც ჩნდება ლოკი. იგი ტესერაქტს იპარავს და თავისი კვერთხით სელვიგსა და სხვა აგენტებს (მათ შორის, ქორისთვალსაც (კლინტ ბერტონი) იმორჩილებს.

პასუხად ამაზე ფიური თავს უყრის სუპერგმირებს: რკინის კაცი (ტონი სტარკი), კაპიტანი ამერიკა (სტივ როჯერსი), ჰალკი (ბრიუს ბანერი) და შავი ქვრივი (ნატალია რომანოვა). ქორისთვალი იპარავს ირიდიუმს, რომელიც ხელს უწყობს ტესერაქტის ძალის სტაბილიზებას, ხოლო ლოკი შტუტგარტშია, სადაც უპირისპირდება როჯერსს, სტარკსა და რომანოვას. ლოკის იჭერენ და S.H.I.E.L.D.-ის შტაბ-ბინაში გადაჰყავთ, მაგრამ ამ დროს ჩნდება მისი ძმა, თორი და მის გათავისუფლებას ცდილობს - იმ იმედით, რომ ლოკი საკუთარ გეგმებს შეცვლის და ასგარდში დაბრუნდება. სტარკი და როჯერსი ერთმანეთს უპირისპირდებიან. თორი თანხმდება ლოკის S.H.I.E.L.D.-ს საფრენ ბაზაზე, ჰელიკარიერზე გადაყვანაზე. იქ ლოკი გამოკეტილია და ბანერისა და სტარკის ზედამხედველობის ქვეშ იმყოფება. S.H.I.E.L.D. ცდილობს ტესერაქტის ადგილსამყოფელის დადგენას.

შურისმაძიებელთა გუნდი იშლება, ვინაიდან ერთსულოვნებას ლოკის საკითხის შესახებ ადგილი არ აქვს. გარდა ამისა ცნობილი ხდება, რომ S.H.I.E.L.D.-ს სურს ტესერაქტის უცხო რასების წინააღმდეგ გამოყენება. მათი კამათისას ხომალდს თავს ესხმიან ბერტონი და სხვა აგენტები. მათი მხრიდან საფრენი მექანიზმების შეფერხების შემდეგ ბანერი, მიღებული ტკივილების გამო, ჰალკად გარდაიქმნება. სტარკი და როჯერსი ცდილობენ მექანიზმების ამუშავებას, ხოლო თორი - ჰალკის აგრესიის შეჩერებას. რომანოვა ბერტონს ებრძვის და უკანასკნელი უგონოდ ეცემა. ლოკი გამოდის დამცავი კაბინიდან, კლავს კოულსონს და თორს, რომელსაც თავისივე კაბინაში ჩაკეტავს, ბაზიდან აგდებს. ჰალკი ეცემა მიწაზე. ფიური კოულსონის სიკვდილს იყენებს შურისმაძიებელთა გაერთიანების მორიგ საბაბად. სტარკისა და როჯერსის აზრით, ლოკის გეგმებში მხოლოდ მათი დამარცხება არ შედის, მას სურს დედამიწაზე ბატონობა. ლოკი იყენებს ტესერაქტს და სტარკის კოშკიდან პორტალს აღებს. ჩიტაურები ამ პორტალით ნიუ-იორკში უზარმაზარი ფლოტით შემოდიან.

შურისმაძიებლები ერთიანდებიან ქალაქის დასაცავად. მაგრამ ერთი-მეორეს შემდეგ, ჩნდება ჩიტაურთა ახალ-ახალი რაზმები. როჯერსი, სტარკი და თორი მოსახლეობას გონს მოსული ბერტონის დახმარებით ევაკუციას უტარებენ. ბანერი იქცევა ჰალკად და ლოკის ეძებს, რომელსაც საბოლოოდ უგონოდ ძირს დასცემს. რომანოვა პორტალის კონტროლს უახლოვდება. სელვიგი, რომელსაც ლოკი აღარ აკონტროლებს, მას უამბობს, რომ ლოკის კვერთხი შეიძლება გამოყენებული იქნას, როგორც პორტალის საკეტი. ამასობაში ფიურიზე მაღლა მდგომი პირები გადაწყვეტენ უცხო რასასთან ბირთვული იარაღით გამკლავებას და მანჰეტენზე ბირთვული რაკეტების გაშვებას. სტარკი იჭერს რაკეტას და მას პორტალში აგდებს. იგი ანადგურებს დამპყრობელთა მთავარ ხომალდსაც და მათ მიერ დედამიწაზე კონტროლი აღიკვეთება. სტარკის კოსტუმში ილევა ენერგია და იგი ეცემა პორტალიდან. მას ჰალკი გადაარჩენს. რომანოვა კეტავს პორტალს. თორი შემდგომში ლოკისა და ტესერაქტს ასგარდში აბრუნებს. ფიური აღნიშნავს, რომ შურისმაძიებლები დაბრუნდებიან მაშინ, როდესაც ეს საჭირო იქნება.

ფილმის დასასრულს, პერსონაჟების ტიტრების შემდეგ ნაჩვენებია ორი დამატებითი სცენა: ჩიტაურთა მეთაური ესაუბრება თავის მბრძანებელს, თანოსს. ისინი საუბრობენ დედამიწაზე თავდასხმის შესახებ. მეორე სცენაში შურისმაძიებლები სხედან რესტორანში და შაურმას მიირთმევენ.

როლები

რობერტ დაუნი უმცროსი - ტონი სტარკი / რკინის კაცი
კრის ევანზი - სტივ როჯერსი / კაპიტანი ამერიკა
მარკ რუფალო - ბრიუს ბანერი / ჰალკი
კრის ჰემსუორთი - თორი
სკარლეტ იოჰანსონი - ნატალია რომანოვა / შავი ქვრივი
ჯერემი რენერი - კლინტ ბერტონი / ქორისთვალი
ტომ ჰილდსტონი - ლოკი
კლარკ გრეგი - ფილ კოულსონი
კობი სმელდერსი - მარია ჰილი
სტელან სკარსგერდი - ექიმი ერიკ სელვიგი
სემუელ ლ. ჯექსონი - ნიკ ფიური
გვინეთ პელტროუ - პეპერ პოტსი
მაქსიმილიანო ჰერნანდესი - ჯასპერ სიტუელი
პოლ ბეტენი - ჯარვისი
ალექსის დენისოვი - სხვა
დემიონ პუატიე - თანოსი
სტენ ლი - ეპიზოდური როლი ახალი ამბების ბლოკის დროს

რესურსები ინტერნეტში

ოფიციალური საიტი
„შურისმაძიებლები“ — კინოფილმების ინტერნეტ-მონაცემთა ბაზა (ინგლისური)
„შურისმაძიებლები“ — Rotten Tomatoes
„შურისმაძიებლები“ — Box Office Mojo-ზე
შურისმაძიებლები დაარქივებული 2013-08-17 საიტზე Wayback Machine. საიტზე The Numbers

სქოლიო

↑ Breznican, Anthony (September 30, 2011). „'The Avengers': Your First Look at the Dream Team!“. Entertainment Weekly. Time (1175): 37. დაარქივებულია ორიგინალიდან — ივლისი 12, 2012. ციტირების თარიღი: ივნისი 24, 2012. ციტატა: „At risk is not only the movie's estimated $220 million budget, but also one of the most promising tent pole franchises in Hollywood.“
↑ The Avengers (2012). Box Office Mojo. დაარქივებულია ორიგინალიდან — ნოემბერი 2, 2012. ციტირების თარიღი: May 19, 2012.

[Budget1-1] Breznican, Anthony (September 30, 2011). „'The Avengers': Your First Look at the Dream Team!“. Entertainment Weekly. Time (1175): 37. დაარქივებულია ორიგინალიდან — ივლისი 12, 2012. ციტირების თარიღი: ივნისი 24, 2012. ციტატა: „At risk is not only the movie's estimated $220 million budget, but also one of the most promising tent pole franchises in Hollywood.“

[BOM-2] The Avengers (2012). Box Office Mojo. დაარქივებულია ორიგინალიდან — ნოემბერი 2, 2012. ციტირების თარიღი: May 19, 2012.

[1]

[2]