ამჰერსტის კოლეჯი

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
ამჰერსტის კოლეჯი
Amherst College
Amherst seal.png
ლათ.: Collegii Amherstiensis
დევიზი Terras irradient[1] (ლათ.) („დაე, გაანათლონ სამყარო“)
დაფუძნდა 1821[1]
ტიპი კერძო უნივერსიტეტი[2]
ფონდები $1.824 მილიარდი[1]
პრეზიდენტი ბიდი მარტინი[1]
პროვოსტი პიტერ უვინი[3]
პროფესორი 200-ზე მეტი[1]
სტუდენტი 1.785[1]
კურსდამთავრებული 21.500-ზე მეტი[1]
მდებარეობა ამჰერსტი[2], მასაჩუსეტსი აშშ
კამპუსი ქალაქგარეთ
4 კმ²[4]
ფერები იისფერი და თეთრი          [1]
მეტსახელი ჯეფები
ლორდ ჯეფები
ლედი ჯეფები
კავშირები ხუთი კოლეჯის კონსორციუმი[5]
პატარა სამეული[6]
თილისმა ლორდი ჯეფრი ამჰერსტი
საიტი amherst.edu

ამჰერსტის კოლეჯი (ინგლ. Amherst College წარმოითქმის /ˈæmərst ˈkɒlɪdʒ/) — კერძო უნივერსიტეტი ქალაქ ამჰერსტში აშშ-ის მასაჩუსეტსის შტატში. ამჰერსტი ექსკლუზიურად საბაკალავრო ოთხწლიანი საგანმანათლებლო დაწესებულებაა[7] და 2013 წლის შემოდგომის სემესტრის მონაცემებით 1.785 სტუდენტი ჰყავს.[1] ბაკალავრის დიპლომს ის 37 ფაკულტეტში გასცემს.[8] ამჰერსტი აშშ-ს ერთ-ერთი ყველაზე პრესტიჟული,[9] რეიტინგული[10] და სელექტიური[11] უნივერსიტეტია. ფორბსის საბაკალავრო დაწესებულებათა ყოველწლიური რეიტინგის თანახმად ის ვილიამსის კოლეჯთან, პრინსტონის უნივერსიტეტთან, აშშ-ს სამხედრო აკადემიასთან და სტენფორდის უნივერსიტეტთან ერთად საუკეთესო ხუთეულშია,[12] U.S. News & World Report-ის ყოველწლიური რეიტინგის თანახმად კი ამჰერსტი აშშ-ს რიგით მეორე ლიბერალური განათლების კოლეჯია.[13]

მიუხედავად მცირე ზომისა, ამჰერსტს მრავალი გამოჩენილი კურსდამთავრებული და კათედრის წევრი ჰყავს. მათ შორის არიან აშშ-ს ოცდამეათე პრეზიდენტი კალვინ კულიჯი,[14] მონაკოს პრინცი ალბერტ II,[14] სალვადორის ყოფილი პრეზიდენტი ფრანცისკო ფლორესი,[14] ნობელის პრემიის ოთხი[4] და პულიცერის პრიზის თორმეტი ლაურეატი, აკადემიის ჯილდოს ორი მფლობელი და ერთი ლაურეატი, მაკარტურის პრემიის ექვსი და ეროვნული სამეცნიერო მედლის ხუთი მფლობელი, მეცნიერებათა ეროვნული აკადემიის წევრი და სხვ.

ამჰერსტი 1821 წელს დაფუძნდა.[15] ის მასაჩუსეტსის ყველაზე ძველი უმაღლესი განათლების დაწესებულებებიდან მესამეა.[16] ისტორიულად ამჰერსტს ახლო კავშირი აქვს ვილიამსის კოლეჯსა და ვესლიანის უნივერსიტეტთან, რომელთან ერთად ის პატარა სამეულს ადგენს.[6] გარდა ამისა ამჰერსტი ხუთი კოლეჯის კონსორციუმის წევრია.[5]

სექციების სია

ისტორია[რედაქტირება]

ამჰერსტის აკადემია[რედაქტირება]

კონვერსის დარბაზი, ამჰერსტის მთავარი ადმინისტრაციული შენობა

ამჰერსტის კოლეჯი საშუალო განათლების სკოლა ამჰერსტის აკადემიიდან განვითარდა, რომელიც 1814 წლის დეკემბერში გაიხსნა.[17] შესაბამისად, აკადემის მეურვეები კოლეჯის მეურვეები იყვნენ, და კოლეჯის პირველი ოთხი წლის ჩანაწერები აკადემიის ჩანაწერებს ემთხვევა.[18] ამჰერსტის აკადემიის დამაარსებლები სამუელ ფოულერ დიკინსონი და ეზეკია ვრაით სტრონგი, ესკვაირები იყვნენ. მისი აშენებისთვის სახსრების მოძიებაში აქტიურად იყვნენ ჩართულნი კალვინ მერილი და იუსტუს ვილიამსი. აკადემიას მიწები დრ. პარსონსმა გადასცა, რომელიც კოლეჯის დაარსებამდე აკადემიის მეურვეთა საბჭოს ერთადერთი პრეზიდენტი იყო. თავისი არსებობის პირველ ფაზაში, ანუ გახსნიდან ათი-თორმეტი წლის მანძილზე, ამჰერსტის აკადემია როგორც მამაკაცებისთვის, ისე ქალებისთვის იყო ღია.[19] გახსნისთანავე ის ზომით დასავლეთ მასაჩუსეტსში ყველაზე დიდი გახდა.[20] თუმცა არსებობის მეორე ფაზაში აკადემიამ სკანდალის თავიდან ასარიდებლად მხოლოდ მამაკაცების მიღება დაიწყო და უნივერსიტეტისთვის მოსამზადებილი სკოლის სტატუსი შეიძინა. ამ დროისთვის მას უფრო და უფრო უჭირდა მიმდებარე ტერიტორიაზე გახსნილ უფრო დიდ აკადემიებთან კონკურენციის გაწევა, რის გამოც ამჰერსტის აკადემიის პრესტიჟი დაეცა. 1868 წლის ზაფხულში მისი შენობა ახალი სკოლით ჩაანაცვლეს.[21]

აკადემიის გახსნიდან სულ რაღაც სამი წლის შემდეგ, 1817 წლის 18 ნოემბერს, მეურვეთა საბჭოს გადაწყვიტა, თავიანთი საგანამნათლებლო საქმიანობა კიდევ უფრო გაევრცოთ.[22] თუმცა ამ იდეის განხორციელებას გაცილებით დიდი ზომის დაწესებულება დასჭირდებოდა, რის გამოც 1818 წლის 18 აგვისტოს მეურვეთა საბჭომ სრულიად ახალი ინსტიტუტის დაარსება გადაწყვიტა.[23]

ამჰერსტის კოლეჯის გახსნა და განვითარება[რედაქტირება]

ამჰერსტის კოლეჯი 1821 წელს დაარსდა. უნივერსიტეტის დამაარსებლები ამჰერსტის და მიმდებარე ქალაქის მაცხოვრებლები იყვნენ. დაარსებისთვის საჭირო ფულად, მატერიალურ და შრომით საწყის კაპიტალში წვლილი 1.300-ზე მეტმა ადამიანმა შეიტანა, კოლეჯის სახელად კი ქალაქის სახელი აირჩიეს. მეურვეთა საბჭოს პირველი პრეზიდენტი ნოა ვებსტერი იყო.[24]

ამჰერსტის ისტორიკოსის, უილიამ ტაილერის (ტაილერი 1895, გვ. 13–15) ცნობით, ვილიამსის კოლეჯის მასაჩუსეტსის ცენტრალურ ქალაქში გადატანის საკითხს მისი მეურვეები 1815 წელს განიხილავდნენ. კოლეჯის გადატანის მთავარი მიზეზი ვილიამსტაუნის მოუხერხებელი მდებარეობა იყო. 1818 წლის 10 ნოემბრის კრებაზე მეურვეებმა გადაწყვიტეს, რომ კოლეჯს ცენტრალურ მასაჩუსეტში მხოლოდ გარკვეული პირობებით გადაიტანდნენ. ამ იდეას ვილიამსის იმდროინდელი პრეზიდენტი, ზეფანაია სვიფტ მური, აქტიურად უჭერდა მხარს. თუმცა 1820 წელს საბოლოოდ გადაწყდა, რომ ვილიამსის კოლეჯი ვილიამსტაუნში დარჩებოდა. მიუხედავად ამისა, პრეზიდენტ მურს მაინც სჯეროდა, რომ ვილიამსტაუნი უნივერსიტეტისთვის შეუფერებელი ადგილი იყო და კოლეჯს გამოეყო. 1821 წლის 8 მაისს ის ამჰერსტის კოლეჯის პირველი პრეზიდენტი გახდა და ამავდროულად ვილიამსიდან 15 სტუდენტი ამჰერსტში გადმოიოყვანა. ამ დროისთვის ამჰერსტში სულ 47 სტუდენტი იყო.[24] მიუხედავად იმისა, რომ კოლეჯის თავდაპირველი მიზანი „ქრისტიანული სამსახურისთვის ხელმოკლე, ღვთისმოსავი და ნიჭიერი ახალგაზრდა ყმაწვილების კლასიკური განათლება“ იყო,[25] ის დამოუკიდებელი, დენომინაციის არმქონე ინსტიტუტი გახდა. 1825 წლიდან მოყოლებული, მასაჩუსეტსის კანონის თანახმად, სტუდენტების და ლექტორების მიღებისას მათი რელიგიის გათვალისწინებაც აიკრძალა.[24] პრეზიდენტი მური 1829 წლის 29 ივნისს გარდაიცვალა. მისი ადგილი ვილიამსის კოლეჯის მეურვემ, ჰემან ჰამფრიმ გააგრძელა.[26]

ამჰერსტი სწრაფად იზრდებოდა. 1830-იანი წლების შუაში, ორი წლის მანძილზე, ის აშშ-ს სიდიდით მეორე უნივერსიტეტი იყო, რითაც მხოლოდ იელი უსწრებდა. 1835 წელს ამჰერსტმა კლასიკური ლიბერალური განათლების პარალელურად ახალი კურიკულუმის შექმნა დაიწყო, რომელიც ბერძნულსა და ლათინურზე მეტად ინგლისურზე, ფრანგულზე, ესპანურზე, ქიმიაზე, ეკონომიკაზე და სხვ. იყო ორიენტირებული. თუმცა პარალელური კურსების რეჟიმმა შემდეგ საუკუნემდე ვეღარ მიაღწია.

უნივერსიტეტის ერთ-ერთი მნიშვნელოვანი საკუთრება „ქველმოქმედების ფონდი“ იყო, რომელიც გაჭირვებული სტუდენტებისთვის ფინანსური დახმარების გაწევის ადრეულ ფორმას წარმოადგენდა[27] მიუხედავად იმისა, რომ ამჰერსტს არ გააჩნდა დენომინაცია, მან კონსერვატიული რელიგიური დაწესებულების სახელი მოიპოვა, რომელსაც მჭიდრო კავშირი ჰქონდა კალვინიზმთან. ამის გამო მასაჩუსეტსის მთავრობაში აზრთა სხვადასხვაობა იყო იმაზე, უნდა მიეცათ თუ არა ახალი კოლეჯისთვის შტატისგან მინიჭებული სიგელი. სიგელის გადაცემა საბოლოოდ 1825 წლის 21 თებერვალს მოხდა.[27] რახან ამჰერსტმა შტატის ოფიციალური სიგელი დაარსებიდან ოთხი წლის შემდეგ მიიღო, მის გერბზე თარიღი 1825-ია (MDCCCXXV) გამოსახული. რელიგიური კონსერვატიზმის ტრადიცია ამჰერსტში მეცხრამეტე საუკუნის შუა წლებამდე შენარჩუნდა; ალკოჰოლის ან თამბაქოს მოხმარების გამო სტუდენტები კოლეჯიდან ირიცხებოდნენ. იყო შემთხვევები, როცა რელიგიურ სტუდენტთა დაჯგუფებებს ნაკლებად რელიგიური სტუდენტები ურწმუნოების გამო სასჯელად სამრეკლოში მიჰყავდათ.[27] თუმცა მეოცე საუკუნის მიწურულს ამჰერსტი თანდათან სეკულარული ხდებოდა, რის კულმინაციაც 1949 წელს უნივერსიტეტის ეკლესიის დანგრევა იყო.[28]

ამჰერსტის აშშ-ს ერთ-ერთი პირველი უნივერსიტეტი იყო, რომელმაც ლათინური ჯილდოს სისტემა (1881 წელს) გამოიყენა.[29]

კოლეჯი 1960-იანი წლების ბოლომდე მხოლოდ მამაკაცებისთვის იყო ღია. ამ პერიოდში ამჰერსტში ხუთი კოლეჯის კონსორციუმის რამდენიმე ქალი სტუდენტი ექსპერიმენტალურად სწავლობდა. 1974 წლის ოქტმობერში ამჰერსტის პროფესორებმა გადაწყვიტეს, რომ კოლეჯი ქალებისთვისაც უნდა გახსნილიყო. ამავე წლის ნოემბერში მეურვეთა საბჭომ საბოლოოდ გადაწყვიტა, რომ 1975-1976 სასწავლო წლიდან უნივერსიტეტში ქალებსაც მიიღებდნენ. 1975 წელს, 9 ქალი სტუდენტი, რომელიც ამჰერსტში ხუთი კოლეჯის კონსორციუმის გაცვლითი სტუდენტები იყვნენ ამჰერსტის ტრანსფერები გახდნენ. მომავალი წლის ივნისში კი ისინი ამჰერსტის პირველი ქალი კურსდამთავერბულები გახდნენ.[30]

კოლეჯის პრეზიდენტი[რედაქტირება]

კაროლინ „ბიდი“ მარტინი, უნივერსიტეტის პრეზიდენტი

2011 წლის ივნისში ამჰერსტის კოლეჯის მე-19 პრეზიდენტი კაროლინ „ბიდი“ მარტინი გახდა. 2008-დან 2011 წლამდე ის ვისკონსინის უნივერსიტეტი-მედისონის კანცლერი იყო, 2000-იდან 2008 წლამდე კი — კორნელის უნივერსიტეტის რექტორი. მარტინი ლინჩბურგის (ვირჯინია) გარეუბანში გაიზარდა და ბრუკვილის სკოლა დაამთავრა. ბაკალავრის დიპლმოი ინგლისური ენის ხარისხით მარტინმა უილიამის & მერის კოლეჯში მოიპოვა, მაგისტრის — მიდლბერის კოლეჯის მაინცის პროგრამაში, დოქტორის წოდება გერმანული ლიტერატურის ხარისხით კი — ვისკონსინის უნივერსიტეტ-მედისონში.[31] მარტინი მრავალი სტატიის და ორი წიგნის[32][33] ავტორია. კორნელის უნივერსიტეტში ის 20-ზე მეტი წელი ასწავლიდა. 2000 წლიდან მარტინი ამავე უნივერსიტეტის ხელოვნებათა და მეცნიერებათა კოლეჯის რექტორი გახდა. რექტორობის მანძილზე ბიდიმ მრავალი რეფორმა გაატარა: კურირებდა $150-მილიონიანი ბიოლოგიური მეცნიერებების შენობის კონსტრუქციის პროექტს, ჩაანაცვლა სტუდენტური სესხები გრანტებით ოჯახებისთვის, რომელთა წლიური შემოსავალი $75,000-ზე ნაკლები იყო და ა.შ. ვისკონსინის უნივერსიტეტ-მედისონოში მარტინმა, სხვა რეფორმებთან ერთად, სტუდენტებისთვის არსებული ფინანსური დახმარების გაზრდაში შეიტანა წვლილი.[31]

კოლეჯის წინა პრეზიდენტები იყვნენ:[34]

  1. ზეფანაია სვიფტ მური, 1821–1823
  2. ჰემან ჰამფრი, 1823–1845
  3. ედვარდ ჰიჩკოკი, 1845–1854
  4. უილიამ აუგუსტუს სტერნსი, 1854–1876
  5. ჯულიუს ჰოლი სილი, 1876–890
  6. მერილ ედუარდ გეიტსი, 1890–1899
  7. ჯორჯ ჰარისი, 1899–1912
  8. ალექსანდრ მაიკლჯონი, 1912–1924
  9. ჯორჯ დანიელ ოლდსი, 1924–1927
  10. არტურ სტენრი პისი, 1927–1932
  11. სტენლი კინგი, 1932–1946
  12. ჩარლზ ვ. კოლი, 1946–1960
  13. კელვინ პლიმპტონი, 1960–1971
  14. ჯონ უილიამ უარდი, 1971–1979
  15. ჯულიან გიბზი, 1979–1983
  16. პიტერ რ პაუნსი, 1984–1994
  17. ტომ გერეტი, 1994–2003
  18. ანტონი მარქსი, 2003–2011

განათლება და რესურსები[რედაქტირება]

რეპუტაცია[რედაქტირება]

ჯონსონის სამრეკლო, უნივერსიტეტის ერთ-ერთი მრავალფუნქციური შენობა

ამჰერსტი აშშ-ს ერთ-ერთ ელიტარულ უნივერსიტეტად ითვლება.[35][36][37][38] U.S. News & World Report-ის პირველი რეიტინგის გამოქვეყნებიდანვე ამჰერსტი აშშ-ში 266 ლიბერალური განათლების კოლეჯიდან პირველ პოზიციაზე ათჯერ აღმოჩნდა, დღეს კი მეორე ადგილზეა, ვილიამსის კოლეჯის შემდეგ.[13] QS-ის მონაცემებით, ამჰერსტი იელის უნივერსიტეტთან, პრინსტონის უნივერსიტეტთან, დართმუზის კოლეჯსა და მასაჩუსეტსის ტექნოლოგიის ინსტიტუტთან ერთად აშშ-ს იმ საუკეთესო უნივერსიტეტებს მიეკუთვნება,[39] რომლებიც უცხოელ სტუდენტებს უპირობო ფინანსური დახმარებას უწევენ.

2011 წელს ფორბსმა ამჰერსტი აშშ-ს საუკეთესო უნივერსიტეტებიდან მესამე პოზიციაზე განათავსა, რითაც მან მასაჩუსეტსის ტექნოლოგიის ინსტიტუტს, სტენფორდის უნივერსიტეტს, კალიფორნიის ტექნოლოგიის ინსტიტუტს, და პრინსტონის უნივერსიტეტის გარდა ყველა აივი ლიგის ინსტიტუტს გაუსწრო.[12]

American Enterprise Institute Study-ს 2009 წლის გამოკვლევის თანახმად, ამჰერსტი დამთავრების მაჩვენებლით აშშ-ს ყველა საგანმანათლებლო ინსტიტუციიდან მეორე ადგილზეა, რითაც მას მხოლოდ ჰარვარდის უნივერსიტეტი უსწრებს.[40]

2007 წელს ამჰერსტის კოლეჯმა National Collegiate Scouting Association-ის აშშ-ს უნივერსიტეტთა რეიტინგში მეორე ადგილი მოიპოვა.[41]

Washington Monthly-ს 2010 წლის რეიტინგში ამჰერსტმა მეხუთე ადგილი მოიპოვა.[42] რეიტინგის კრიტერიუმები სოციალური მობილობა (გაჭირვებული სტუდენტების მიღება), კვლევა (კურსდამთავრებულებიდან სადოქტორო ნამუშევრები) და სერვისი (სტუდენტების საჯარო აქტივობა) იყო.

2004 წელს The Wall Street Journal-ის რეიტინგში ამჰერსტმა მეცხრე პოზიცია მოიპოვა. ჟურნალის ეს კვლევა იმ სტუდენტების რაოდენობას ეფუძნებოდა რომლებიც ბაკალავრიატის შემდეგ აშშ-ს საუკეთესო ბიზნესის, სამართლის და სამედიცინო სკოლაში ხვდებოდნენ.[43]

მიუხედავად მაღალი ყოველწლიური გადასახადისა, 2013 წელს Princeton Review-მ ამჰერსტი აშშ-ს ერთ-ერთ ყველაზე მომგებიან უნივერსიტეტად დაასახელა.[44]

Carnegie Foundation-ის თანახმად ამჰერსტი „უფრო სელექტიური“ დაწესებულებაა,[7] რომლის პირველკურსელები მისაღები გამოცდების ქულების მიხედვით საბაკალავრო დაწესებულებების პირველკურსელთა ზედა მეხუთედში არიან.[45]

სტუდენტთა მიღება[რედაქტირება]

ამჰერსტის კოლეჯის მთავარი კვადრანტი, გარშემორტყმულია პირველკურსელთა საცხოვრებლებით

ამჰერსტის კოლეჯი აშშ-ს ყველაზე სელექტიური ლიბერალური განათლების კოლეჯია.[46] 2012 წელს ამჰერსტმა აპლიკანტთა 13% მიიღო: 8.565 აპლიკანტიდან ადგილი მხოლოდ 1.110-მა მოიპოვა. ტრანსფერთა მიღება კიდევ უფრო სელექტიურად მიმდინარეობდა: 509 აპლიკანტიდან უნივერსიტეტმა მხოლოდ 21 (4%) მიიღო.[47]

მსურველებს საშუალება ეძლევათ, ამჰერსტში აპლიკაცია როგორც პირველკურსელებად, ისე ტრანსფერებად გააგზავნონ. პირველკურსელებს შეუძლიათ აპლიკაცია როგორც სტანდარტულ (დედლაინი: 1 იანვარი[48]), ისე ადრეულ (დედლაინი: 15 ნოემბერი[48]) ციკლში გააგზავნონ, ტრანსფერებს კი — შემოდგომის ან გაზაფხულის სემესტრისთვის. სტანდარტულ შემთხვევაში, აშშ-ელი პირველკურსელის სტანდარტული ციკლის აპლიკაციის მოთხოვნებია:[49]

  • ზოგადი აპლიკაცია
  • ზოგადი აპლიკციის ამჰერსტის კოლეჯის დამატება
  • აპლიკაციის საფასური ($60) ან საფასურიდან გათავისუფლების პეტიცია
  • სკოლის მოხსენება
  • საშუალო სკოლის ნიშნების ფურცელი
  • დახასიათებები ორი მასწავლებლის (უცხო ენის, მათემატიკის, საბუნებისმეტყველო ან საზოგადოებრივი მეცნიერების, ან უცხო ენის) მიერ
  • სტანდარტიზებული გამოცდების შედეგები (SAT-ის და ორი SAT-ის საგნობრივი გამოცოდა, ან ACT-ის)
  • სკოლის უკანასკნელი სემესტრის, ტრიმესტრის ან მეოთხედის ნიშნების ფურცელი
  • როგორც კი შესაძლებელი იქნება: სკოლის შუალედური მოხსენება და ნიშნების ფურცელი

უცხოელ, სახლში განათლებამიღებულ, აშშ-ს ომის ვეტერან და საზოგადოებრივი კოლეჯების ტრანსფერ სტუდენტებს აპლიკაციისას განსაკუთრებული წესები ეხებათ.[50]

მიღებისას ამჰერსტი აპლიკანტში მაღალი ინტელექტუალური მონაცემების გარდა ეძებს ხასიათის თვისებებს, რომლებიც მას ამჰერსტის აკადემიურ და სოციალურ გარემოში წარმატების საშუალებას მისცემს.[50] უნივერსიტეტის აზრით, წარმატებული ამჰერსტის სტუდენტი მოერგება მისი ღია კურიკულუმით განპირობებულ აკადემიურ თავისუფლებას, დაამყარებს ურთიერთობას პროფესორებთან და სტუდენტებთან, რომელთა მრავალფეროვენბაც განათლების პროცესს ხელს როგორც კლასში, ისე კლასგარეშე შეუწყობს.[50]

2016 წლის გამოშვების კურსზე 49% მამაკაცია, 51% — ქალი, 39%-მა აპლიკაცია ადრეულ ციკლში გააგზავნა, 42% ფერადკანიანია, 21% გაჭირვებული ოჯახიდანაა, 10% კი — უცხოელი. სტუდენტების ნახევარმა SAT-ის 800-ბალიან შკალაზე შემდეგი ქულები მიიღო: კრიტიკულ კითხვაში — 680–780, მათემატიკაში — 680–780, წერაში — 680–790; ACT-ს 36-ბალიან შკალაზე კი — 31–34. ამავე გამოშვების კურსის სტუდენტების 83% საკუთარი საშუალო სკოლის პირველ დეცილში იყო, 95% კი — პირველ კვარტილში.[51]

აკადემიური პროგრამა[რედაქტირება]

ჩეპინის დარბაზი, ერთ-ერთი ოცზე მეტი აკადემიური შენობიდან

ამჰერსტის კოლეჯში 37 ფაკულტეტი[52] და 850 კლასია[53]: მეცნიერებების, ხელოვნების, ჰუმანიტარული საგნების, მათემატიკის, ინფორმატიკის, სოციალური მეცნიერებების, უცხო ენების, კლასიკის და ინტერდისციპლინარული საგნების (მაგ., სამედიცინო სკოლისთვის მოსამზადებელი[54]). უნივერსიტეტი განსაკუთრებით ღია კურიკულუმით გამოირჩევა, რაც სტუდენტებს საკუთარი ინტერდისციპლინარული მეიჯორის შექმნის საშუალებასაც კი აძლევს.[52] პირველკურსელებს რთული კლასების აღების უფლებაც აქვთ, მეოთხეკურსელებს კი — დაწყებითი.

პირველკურსელებისთვის ერთადერთი სავალდებულო კურსი ე.წ. „პირველკურსელების სემინარია“, რომელიც ამჰერსტში დაახლოებით ოცია. ამ სემინარებში მაქსიმუმ თხუთმეტი სტუდენტია[55] და, მიუხედავად სხვადასხვა თემატიკისა, ყველა მათგანი კრიტიკული ანალიზის და წერითი და სიტყვიერი არგუმენტის განვითარებას ეთმობა. პირველკურსელების სემინარის გარდა სტუდენტებს 31 კლასის[56] (სტანდარტულად სემესტრში ოთხის) გავლა უწევთ. მეიჯორის შესასრულებლად სტუდენტებმა დეპარტამენტის მიერ მოთხოვნილი კლასები უნდა გაიაროს და, საჭიროებისამებრ, საერთო საბოლოო გამოცდა ჩააბაროს.

როგორც მეიჯორის შერჩევამდე, ისე შერჩევის შემდეგ სტუდენტებს პირადი აკადემიური მრჩევლები ეხმარებიან.[57] თითოეულ მრჩეველს არაუმეტეს შვიდი პირველკურსელისა ჰყავს[58] განსაკუთრებული ყურადღება ეთმობა სხვადასხვა დისციპლინებიდან განათლების ინტეგრირებას. ყოველი ახალი მეიჯორის არჩევისას სტუდენტს დამატებითი მრჩეველი გამოეყოფა.[57]

ამჰერსტის 2012 წლის დამამთავრებელი კლასის სტუდენტების 38% ორმაგი მეიჯორი იყო.[47] სამმაგი მეიჯორი იშვიათობაა; მრჩევლების მეშვეობით პირადი ინტერდისციპლინარული მეიჯორის შექმნაც შეიძლება. სტუდენტთა ორმოცდაათი პროცენტი მეოთხე კურსზე საკურსო ნაშრომს წერს.[59] სტუდენტ[60]ებს, რომლებიც საკურსოზე მუშაობენ, დამატებითი პირადი მრჩეველი ენიშნებათ, რომელიც ნამუშევრის თემატიკაშია გამოცდილი. დამთავრებიდან ხუთი წლის შემდეგ ამჰერსტის კურსდამთავრებულთა 75% სწავლას მაგისტრატურაში ან დოქტორანტურაში აგრძელებს.[61]

ამჰერსტის პირველი უნივერსიტეტი იყო, რომელმაც საბაკალავრო დონეზე ამერიკული სწავლებების;[62] სამართლის, იურისპრუდენციის და სოციალური აზრის; და ნეირომეცნიერების[63] ინტერდისციპლინარული მეიჯორები დაუშვა.

სწავლება[რედაქტირება]

2012–2013 სასწავლოს წლის მონაცემებით, ამჰერსტში 1.817 სტუდენტი და 253 პროფესორია,[64] შესაბამისად ყოველ რვა სტუდენტზე ერთი ლექტორი მოდის, კლასის საშუალო ზომა კი 16 სტუდენტია.[65] ლექციების 89%-ს 30 სტუდენტეზე ნაკლები ჰყავს.[58] განათლების მაღალი სტანდარტის გამო გამო, ჰარვარდის და კოლუმბიის უნივერსიტეტებმა ამჰერსტს 2007 წელს საკუთარი სასწავლო პროგრამის განახლებისას მიმართეს.[66]

უნივერსიტეტის კლასები და ლაბორატორიული სამუშაოები 21 აკადემიურ შენობაში[60] ტარდება. სემესტრში სტუდენტები სტანდარტულად ოთხ კლასს გაივლიან, რომლებსაც მრჩეველთან კონსულტაციით ირჩევენ. აკადემიურ მრჩეველთან და დეკანთან კონსულტაციის საფუძველზე როგორც დამატებითი,[67] ისე ხუთი კოლეჯის კონსორციუმის[68] კლასების გავლაც შეიძლება.

კათედრის გამორჩეულ წევრებს შორის არიან თანამედროვე ლიტერატურის და პოეზიის კრიტიკოსი უილიამ ჰ. პრიჩერდი,[69] ბეოვულფის მთარგმნელი ჰოუელ ჩიკერინგი,[70] ებრაული და ლათინოამერიკული სწავლებების მკვლევარი ილან სტავანსი,[71] ნოველისტი ლორენს დუგლასი,[72] ფიზიკოსი ართურ ზაჯონკი,[73] პულიცერის პრიზის ლაურეატი, ნიკიტა ხრუშჩოვის ბიოგრაფი უილიამ ტაუბმანი,[74] აფრიკული ხელოვნების სპეციალისტი როულენდ აბიოდუნი,[75] სამართლის ექსპერტი ჰედლი არკსი,[76] მათემატიკოსი დანიელ ველემანი,[77] ბიბლიის მკვლევარი სიუზენ ნიდიჩი,[78] სამართლის და სოციოლოგიის ექსპერტი ოსტინ სერატი და პულიცერის პრიზის ლაურეატი ლუის სპრეტლენი[79] და ა.შ.

საზღვარგარეთ და კამპუსგარეშე სწავლა[რედაქტირება]

ამჰერსტის სტუდენტებს საზღვარგარეთ სწავლების 260-ზე მეტ პროგრამაზე მიუწვდებათ ხელი.[58] სტუდენტების 45%,[58] უმეტესწილად მესამეკურსელები, საზღვარგარეთ სწავლის სემესტრში იღებენ მონაწილეობას, მათი 83%[58] კი არაინგლისურენოვან ქვეყანაში სწავლობს. პროგრამები განთავსებულია მსოფლიოს მრავალ ქვეყანაში, მათ შორის არგენტინაში, ახალ ზელანდიაში, გერმანიაში, ეგვიპტეში, ესპანეთში, იაპონიაში, ინგლისში, ინდოეთში, კოსტა რიკაში, საფრანგეთში, სენეგალში[80] და ა.შ. ამჰერსტის ფინანსური დახმარების მეშვეობით,[81] საზღვარგარეთ სწავლა ყველა სტუდენტს შეუძლია. უცხოურ დაწესებულებაში სწავლა ამჰერსტის სტუდენტს სწავლას არ უხანგრძლივებს, რადგან საზღვარგარეთ მიღებულ კრედიტებს ამჰერსტიც აღიარებს.[82] პირადი მრჩეველები სტუდენტებს მეიჯორისთვის საჭირო საგნების გრაფიკის შედგენაში ეხმარებიან, რათა საზღვარგარეთ სწავლამ სტუდენტს მეიჯორის მოთხოვნების შესრულებაში არ შეუშალოს ხელი. ამჰერსტი უცხოეთში მოსწავლე ყველა სტუდენტს უზრუნველყოფს ყოვლისმომცველი დაზღვევის პაკეტით,[83] გამგზავრებამდე კი — უნივერსიტეტსა და ქვეყანაზე ინფორმაციული სესიით.

კამპუსის გარეთ ამჰერსტის სტუდენტებს აშშ-ს მრავალ დაწესებულებაში სწავლა შეუძლიათ. თორმეტი კოლეჯის გაცვლითი პროგრამის[84] წევრობის მეშვეობით ამჰერსტს განსაკუთრებული გაცვლითი პროგრამები აქვს ბოიდოინის, კონეკტიკუტის, დართმუზის, მაუნტ ჰოლიოკის, სმითის, ტრინიტის, ვასარის, უელესლის, უიტონის და ვილიამსის კოლეჯებთან; აგრეთვე ვესლიანის უნივერსიტეტთან. გარდა ამისა, სტუდენტებს რამდენიმე საზაფხულო პროგრამის გავლის საშუალებაც ეძლევათ.[85]

ხუთი კოლეჯის კონსორციუმი[რედაქტირება]

მასაჩუსეტსის უნივერსიტეტი ამჰერსტი, კამპუსის ცენტრი

ამჰერსტი ხუთი კოლეჯის კონსორციუმის წევრია, რომელიც პაიონერ ველის კიდევ ოთხ დაწესებულებას მოიცავს: მასაჩუსეტსის უნივერსიტეტ ამჰერსტს, სმითის, მაუნთ ჰოლიოკის და ჰემპშირის კოლეჯებს.[5] ამჰერსტში შემოთავაზებული 850 კლასის[53] გარდა, სტუდენტებს დამატებითი საფასურის გარეშე კონსორციუმის 6.000 დამატებიითი კლასის[53] და ჯამში 8 მილიონი ბიბლიოთეკის მასალის[86] გამოყენება შეუძლიათ.

ხუთი კოლეჯის კონსორციუმს საერთო რესურსები და აკადემიური პროგრამები აქვთ. Museums10 ადგილობრივი ხელოვნების, ისტორიის და მეცნიერების მუზეუმების კონსორციუმია[87]. ხუთი კოლეჯის ცეკვის დეპარტამენტი აშშ-ში ერთ-ერთი უდიდესია[88]. საერთო ასტრონომიის დეპარტამენტი ხუთი კოლეჯის რადიო ასტრონომიის ობსერვატორიას იყენებს, რომელმაც 1993 წელს ნობელის პრემიის მოპოვებაში შეიტანა წვლილი.[89]

ხუთი კოლეჯის სანაპირო და საზღვარო მეცნიერებების პროგრამა ხუთი კოლეჯის ინტერდისციპლინარული საბაკალავრო კურიკულუმის ნაწილია.[90] საზღვაო კვლევის ეროვნულ ცენტრებთან აქტიური თანამშრომლობით სტუდენტებს უშუალო კვლევაში მონაწილეობის საშუალება აქვთ. პროგრამაში საბუნებისმეტყველო და საზოგადოებრივი მეცნიერებების ფაკულტეტის ლექტორები ასწავლიან. სამეცნიერო დისციპლინები მოiცავს ბიოლოგიას, ბოტანიკას, ქიმიას, ეკოლოგიას, გეოლოგიას, ფიზიკას, ბუნების მენეჯმენტს და ზოოლოგიას, საზოგადოებრივი კი — ეკონომიკას, სამთავრობო და საჯარო პოლიტიკას.[91]

რესურსები[რედაქტირება]

კოლეჯის დარბაზი, ერთ-ერთი ათზე მეტი ადმინისტრაციული შენობიდან, მოიცავს ამჰერსტის კარიერის ცენტრს

ამჰერსტის 4 კმ²-იან კამპუსზე[4] განლაგებულ რესურსებს შორისაა 21 აკადემიური, 14 ადმინისტრაციული, 6 სპორტული, 37 სტუდენტთა საცხოვრებელის და 4 სტუდენტთა მომსახურების შენობა.[60], ბუნებრივი ნაკრძალი, ტყე ეკოლოგიის შესასწავლად, სასეირნო და საველოსიპედო ბილიკები და სხვ. გამორჩეულია მიდის ხელოვნების მუზეუმი[92] (მოიცავს 16.000-ზე მეტ ნამუშევარს[93]); ამჰერსტის რუსული კულტურის ცენტრი[94]; ოთხი ბიბლიოთეკა (1.517.000-ზე მეტი საკუთრებით და 595,296 მედია-მასალით[1]). ბიბლიოთეკებიდან მთავარია რობერტ ფროსტის ბიბლიოთეკა,[95] რომელიც მრავალ არქივს და სპეციალურ კოლექციას, მედია-ცენტრს და ენების ლაბორატორიას მოიცავს. ცალკეა მეცნიერების და მათემატიკის,[95] და მუსიკის[95] ბიბლიოთეკები. ამჰერსტს ეკუთვნის ბუნების ისტორიის მუზეუმი, რომელიც ჰიჩკოკის იქნოლოგიურ კაბინეტს და დინოზავრის ნაფეხურების მსოფლიოში ყველაზე დიდ კოლექციას მოიცავს;[96][97] ბასეტის პლანეტარიუმი; უაილდერის ობსერვატორია; სამეცნიერო ცენტრები (მათ შორის მერილის სამეცნიერო ცენტრი, ბენესკის გეოლოგიური მეცნიერებების შენობა და მაკგუაირის ბიოლოგიური მეცნიერებების შენობა); მათემატიკური შესაძლებლობების ცენტრი; წერის ცენტრი; სახელოსნოები; სარეპეტიციო და საგამოსვლო დარბაზი მუსიკის, თეატრისა და ცეკვისთვის, მათ შორის არმზის მუსიკის ცენტრი, კირბის მემორიალური თეატრი და ჰოლდენის ექსპერიმენტალური თეატრი; შემოქმედებითი წერის ცენტრი; საზოგადოებაში ჩართულობის ცენტრი; და სტუდენტური რადიო WAMH 89.3 FM. ყველა სტუდენტური საცხოვრებელი აღჭურვილია ინტერნეტით, უკაბელო ინტერნეტი კი კამპუსის ტერიტორიაზე თითქმის ყველგანაა. კამპუსზე სულ ოცდაჩვიდმეტი სტუდენტური საცხოვრებელი, ექვსი თემატური და ორი ენათა სახლია (რომლებიც ოთხი ენის შესწავლას ემსახურება).

ამჰერსტის კარიერის ცენტრი[წყარო არ არის მითითებული 275 დღე] სტუდენტებს სამუშაოს ძიებაში სხვადასხვა რესურსებით ეხმარება, მათ შორისაა კამპუსის გასაუბრებებითა და კურსდამთავრებულთა ქსელით.

ამჰერსტს ეკუთვნის[წყარო არ არის მითითებული 275 დღე] კამპუსის მიღმა არსებული ემილი დიკინსონის მუზეუმი და პოეტის ხელნაწერების ნახევარზე მეტი. ამჰერსტს კავშირი აქვს[წყარო არ არის მითითებული 275 დღე] იაპონიის დოშიშას უნივერსიტეტთან, რომელიც ამჰერსტის კურსდამთავრებულის ჯოსეფ ჰარდი ნეესიმას დაარსებულია. ამჰერსტის კურსდამთავრებულის ჰენრი კლეი ფოლგერის ანდერძის შესაბამისად, ამჰერსტის კოლეჯი მართავს[წყარო არ არის მითითებული 275 დღე] ვაშინგტონში არსებულ ფოლგერის შექსპირის ბიბლიოთეკას.

მდგრადი განვითარება[რედაქტირება]

ამჰერსტის კოლეჯი ენერგიის მოხმარებას განათების მონიტორინგის კომპიუტერიზებული სისტემის და კოგენერაციული სადგურის ეფექტური გამოყენებით ამცირებს. სადგური მოიცავს გაზის ტურბინას, რომელიც სითბოსთან ერთად (კამპუსის გასათბობად) ენერგიას გამოიმუშავებს.[98] ამჰერსტი ასევე უძღვება კომპოსტირების პროგრამას, რომლის მეშვეობით სასადილოს საჭმლის ნარჩენები ვერმონტის ფერმაზე იგზავნება.[98]

ფოლგერის შექსპირის ბიბლიოთეკა[წყარო არ არის მითითებული 275 დღე][რედაქტირება]

ფოლგერის შექსპირის ბიბლიოთეკა

ამჰერსტის კავშირი ფოლგერის შექსპირის ბიბლიოთეკასთან (ვაშინგტონი, კოლუმბიის ოლქი) სტუდენტებს და ლექტორებს კულტურულ და სახელოვნებო პროგრამებში ჩართვის, სწავლის და სწავლების საშუალებას აძლევს. ფოლგერი, თანამედროვე პერიოდის (1500-1750) უმნიშვნელოვანესი საცავი, უილიამ შექსპირის ნაბეჭდი ნაშრომების ყველაზე დიდ და რენესანსის ხანის წიგნების და ხელნაწერების იშვიათ კოლექციას შეიცავს. ფოლგერი საერთაშორისო დონეზე აღიარებული კვლევითი ბიბლიოთეკა და აკადემიური ცენტრია. ის იშვიათი მასალების შენახვის ტექნოლოგიის ნოვატორი და კულტურული თუ სახელოვნებო პროგრამების მოწინავე ავტორია; მათ შორისაა თეატრალური წარმოდგენები და ძველებური მუსიკის კონცერტები, პოეზიის და საოჯახო პროგრამები, გამოფენები და ლექციები. ფოლგერის თაოსნობით გამოდის აკადემიური ჟურნალი „Shakespeare Quarterly“, ბიბლიოთეკა კი პერიოდულად გამოსცემს Folger Library Shakespeare-ის პრესის წიგნებს.


გრანტები და სტაჟირება[წყარო არ არის მითითებული 275 დღე][რედაქტირება]

ამჰერსტის პროგრამების Tom Gerety Fellowships for Action და Winternship მეშვეობით 100-ზე მეტ სტუდენტს უნივერსიტეტისგან აშშ-ში ან საზღვარგარეთ საჯარო სერვისის გასაწევად გრანტის მიღება შეუძლია. Liberal Arts Center Network სტუდენტებს პირველივე კურსიდან 15.000-ზე მეტ სტაჟირებას სთავაზობს. საზოგადოებაში ჩართულობის ცენტრი სტუდენტებს პაიონერ ველიში არაერთ სტაჟირებას სთავაზობს. უნივერსიტეტის ერთ-ერთი გაზეთი, The Common, სტაჟირებებს ექსკლუზიურად ამჰერსტის სტუდენტებისთვის უზრუნველყოფს.

2008 წლის გაზაფხულს კოლეჯის საზოგადოებაში ჩართულობის ცენტრმა აქტიური მოქალაქეობის საზაფხულო პროგრამა დაიწყო, რომლის მეშვეობით პირველ-, მეორე- და მესამეკურსელებს ადგილობრივ, ეროვნულ ან საერთაშორისო არაკომერციულ ორგანიზაციებში სტაჟირების გავლა შეუძლიათ.

უნივერსიტეტის მიერ შემოთავაზებული შესაძლებლობების გარდა, ამჰერსტის სტუდენტებსა და კურსდამთავრებულებს სხვადასხვა გარე გრანტები აქვთ მიღებული; მათ შორისაა ფულბრაიტის, გოლდუოტერის, როუდზის და უოტსონის გრანტები.

ფასები და ფინანსური დახმარება[რედაქტირება]

2013–2014 სასწავლო წლისთვის ამჰერსტში სწავლის, ცხოვრების და კვების საფასური $57.970-ია. დამატებითი ხარჯების გათვალისწინებით კოლეჯში ერთი წელიწადი $63,293–$65,743 ჯდება.[99]

მიუხედავად მაღალი საფასურისა, ამჰერსტი აშშ-ს იმ იშვიათ უნივერსიტეტებს მიეკუთვნება, რომლებიც აპლიკანტებს ფინანსური მდგომარეობის გაუთვალისწინებლად იღებს: თითოეულ მიღებულ სტუდენტს გარანტირებული აქვს ფულადი დახმარება.[100] 2012–2013 სასწავლო წელს ამჰერსტის სტუდენტების 55% უნივერსიტეტისგან გრანტს იღებს, საშუალო ფინანსური დახმარება კი $45.000-ის ტოლია.[100] ამჰერსტის ფინანსური დახმარება ყოვლისმომცველია და საჭიროებისამებრ სწავლის საფასურიდან თვითმფრინავის ბილეთამდე ყველა ხარჯს ფარავს. წელიწადში კოლეჯი თითოეულ სტუდენტზე $85.000-ზე მეტს ხარჯავს.[101]

2007 წელს ამჰერსტმა მიიღო გადაწყვეტილება, 2008–2009 სასწავლო წლიდან მოყოლებული ყველა სესხი გრანტით ჩაენაცვლებინა.[100] ამ დროისთვის ის უკვე პირველი უნივერსიტეტი იყო[წყარო არ არის მითითებული 275 დღე], რომელმაც ყველა გაჭირვებულ სტუდენტს კრედიტი გრანტით ჩაუნაცვლა და ამ გადაწყვეტილებით პრინსტონის უნივერსიტეტს, კორნელის უნივერსიტეტსა და დავიდსონის კოლეჯს შეუერთა, რომლებიც მსგავს ფინანსურ პოლიტიკას ატარებდნენ. მეტი კვალიფიცირებული გაჭირვებული აპლიკანტების მიღებით ამჰერსტი უფრო მეტ შესაძლებლობებს სთავაზობს სტუდენტებს, ვიდრე აშშ-ს სხვა ელიტარული უნივერსიტეტები.[102]

2008–2009 სასწავლო წლიდან ამჰერსტმა უპირობო ფინანსური დახმარებით უცხოელი სტუდენტების მიღებაც დაიწყო.[100] ის აშშ-ს იმ ექვს უნივერსიტეტს მიეკუთვნება, რომლებიც მსგავს პოლიტიკას ატარებენ; ესენია ამჰერსტი, ჰარვარდი, იელი, პრინსტონი, მასაჩუსეტსის ტექნოლოგიის ინსტიტუტი და დართმუზის კოლეჯი.[103]

გარდა[წყარო არ არის მითითებული 275 დღე] ფინანსური დახმარების სტანდარტული პაკეტისა, გაჭირვებული სტუდენტები დამატებით დახმარებას სხვადასხვა ფორმებით იღებენ, რაც სასწავლო ინვენტარის და წიგნების შეძენაში ეხმარებათ. მოკლე არდადეგების მანძილზე ამჰერსტის სტუდენტური საცხოვრებლების ნაწილი და სასადილო ღია რჩება და თუ სტუდენტს არდადეგებზე მოგზაურბის საშუალება არ აქვს, კამპუსზე დარჩენა და კვება მას უფასოდ შეეძლება. გაჭირვებული სტუდენტები ასევე უფასოდ იღებენ წამლებს ამჰერსტის კიფის ჯანმრთელობის ცენტრისგან (ინგლ. Keefe Health Center). თუ სტუდენტი საზღვარგარეთ ან კამპუსგარეთ სწავლობს, მას ამჰერსტის დახმარება მოთხოვნისამებრ გაუგრძელდება.[81]

სტუდენტური ცხოვრება[წყარო არ არის მითითებული 275 დღე][რედაქტირება]

ლიპტონის სახლი, ერთ-ერთი ორმოცამდე სტუდენტური საცხოვრებლიდან

ამჟამად უნივერსიტეტში სულ 1.817 სტუდენტია (931 მამაკაცი და 886 ქალი[104]) აშშ-ს თითქმის ყველა შტატიდან და 40-ზე მეტი ქვეყნიდან. მათგან 178 (10%) უცხოელია, 729 (40%) — თეთრკანიანი აშშ-ელი, დანარჩენი (50%) — ფერადკანიანი აშშ-ელი.[104] მრავალფეროვნება ამჰერსტის კოლეჯის მისიის ნაწილია[105] და ბოლო ხუთი წლის მანძილზე ამჰერსტის სტუდენტთა 50%-ზე მეტი ფერადკანიანი იყო.[106][107][108][109][104] ამჰერსტს რესურსები საშუალებას აძლევს, მიიღოს სტუდენტები სხვადასხვა ნიჭით და ინტერესით. სტუდენტთა 99% და პირველკურსელთა 100% უნივერსიტეტის ტერიტორიაზე ცხოვრობს, ხოლო სტუდენტთა 2% 25 წელზე უფროსია.[110] პირველკურსელთა 97% სწავლას აგრძელებს, ხოლო სტუდენტთა 87% ოთხ წელიწადში ამთავრებს ბაკალავრიატს, რაც აშშ-ში ერთ-ერთი ყველაზე მაღალი მაჩვენებელია.[13]

ამჰერსტის თითოეული ახალი სტუდენტის სტუდენტური ცხოვრება ე.წ. ორიენტაციით იწყება, რომლის მიზანია, სტუდენტმა უნივერსიტეტის ტერიტორია გაიცნოს და მისი რესურსებით სარგებლობას ისწავლოს. უცხოელ სტუდენტების უნივერსიტეტამდე ტრანსპორტირებასაც ამჰერსტი უზრუნველჰყოფს. ორიენტაცია აგვისტოს ბოლოს იწყება დაახლოებით ერთი კვირა გრძელდება, რათა სექტემბრისთვის სტუდენტები სწავლის დასაწყებად მზად იყვნენ.

ამჰერსტის ყველა პირველკურსელი ე.წ. „პირველკურსელთა საცხოვრებელში“ ცხოვრობს: ესენია ჯეიმსი, სტერნზი, ჩარლზ პრეტი, ნორზი და საუზი, უილისტონი და ეპლტონი. მეორე კურსიდან დაწყებული, ამჰერსტის სტუდენტები დანარჩენ საცხოვრებლებში განაგრძობენ ცხოვრებას — საცხოვრებლის ამორჩევის საშუალება მათ ყოველ წელს ეძლევათ. ყველა სტუდენტს აქვს უფლება, იცხოვროს როგორც უალკოჰოლო და არამწეველთა საცხოვრებელში, ისე თანამაცხოვრებლის გარეშე.

ამჰერსტის სტუდენტებს კამპუსზე მუშაობის მრავალი შესაძლებლობა ეძლევათ — ბიბლიოთეკაში, ლაბორატორიაში, სპორტდარბაზში და სხვ. სამუშაოს შესრულებისთვის სტუდენტები სასწავლო კრედიტს ამჰერსტისგან არ მიიღებენ.

ამჰერსტის სპორტული დაწესებულებები სარგებლობა ყველა სტუდენტის და პროფესორისთვის ღიაა. ამჰერსტის ყველა სტუდენტი აღჭურვილია ელექტრონული ბარათით, რომელიც მას დღის ნებისმიერ დროს უნივერსიტეტის ნებისმიერ სტუდენტურ საცხოვრებელში, ასევე შესაბამის დროს ბიბლიოთეკებსა და აკადემიურ შენობებში უშვებს.

სტუდენტური წვეულებები ამჰერსტის მრავალ საცხოვრებელში ეწყობა, თუმცა ამისთვის ყველაზე ხშირად უნივერსიტეტის ე.წ. „სოციალური“ საცხოვრებლები (ინგლ. The Socials) — სტოუნი, კროსეტი, პონდი და კულიჯი — გამოიყენება. დამატებით, უნივერსიტეტი საკუთარი ნებით აწყობს რამდენიმე ყოველწლიურ წვეულებას კამპუსზე — მათ შორის, TAP-ს (ინგლ. The Amherst Party), GAP-ს (ინგლ. Gay Amherst Party), მეოთხეკურსელთა ბალს (ინგლ. The Senior Ball) და სხვ. ხუთი კოლეჯის კონსორციუმის უნივერსიტეტების მდებარეობის გამო, ამჰერსტის სტუდენტებს წვეულებებში სხვა უნივერსიტეტის სტუდენტები ხშირად უერთდებიან.

სასწავლო წლის მანძილზე, ამჰერსტის სტუდენტებს საშუალება აქვთ, დაესწრონ კამპუსზე მოწყობილ სხვადასხვა კლასგარეშე ლექციას და პრეზენტაციას გამოჩენილი საზოგადო მოღვაწეების მიერ. ამჰერსტში ასევე რეგულარულად ეწყობა გამოჩენილი ინსტრუმენტალისტების და ვოკალისტების მუსიკალური კონცერტები, რომლებზე დასწრება უნივერსიტეტის ყველა სტუდენტს შეუძლია. ხშირია ამჰერსტის სტუდენტური მუსიკალური კლუბების კონცერტებიც, რომლებზეც სტუდენტებს უმეტესწილად უფასოდ შეუძლიათ დასწრება.

სასწავლო პროცესში არსებული ნებისმიერი შეფერხების გამო, ყველა სტუდენტს აქვს უფლება, უნივერსიტეტის დეკანის ნებართვით ამჰერსტიდან ერთი ან მეტი სემესტრით შეისვენოს. ნაკლებსერიოზული აკადემიური პრობლემების მოგვარებაში სტუდენტებს პირადი მრჩეველები ეხმარებიან, რომლებსაც მეორე კურსიდან მოყოლებული სტუდენტები თავად ირჩევენ.

სტუდენტური ორგანიზაციები[რედაქტირება]

ამჰერსტის კოლეჯის მამაკაცთა გუნდი, ერთ-ერთჲ 115-ზე მეტი სტუდენტური ორგანიზაციიდან

მეწარმეთა საზოგადოებით დაწყებული, შუა საუკუნეების ხმლით ბრძოლის კლუბით[წყარო არ არის მითითებული 275 დღე] დამთავრებული, ამჰერსტში 115-ზე მეტი სტუდენტური ორგანიზაციაა.[1] სტუდენტებს საკუთარი ინტერესისებრ შეუძლიათ ამ ავტონომიურ, სტუდენტების მიერ მართულ ორგანიზაციებში მონაწილეობა, რომლებსაც სტუდენტური თვითმმართველობა აფინანსებს. ეს მოიცავს რამდენიმე აკადემიურ გაერთიანებას, აქტივისტურ და სოციალურ, იდენტობის, კულტურულ, მმართველ, მუსიკალურ, სპორტულ და სხვა ჯგუფებს, ასევე გამომცემლობებს.

აკადემიურ სტუდენტურ ორგანიზციებს მიეკუთვნება ამჰერსტის დებატების საზოგადოება, უნივერსიტეტის პოლიტიკური კავშირი, სასწრაფო სამედიცინო დახმარების სერვისი, რომელიც მომავალ სამედიცინო სტუდენტებს პრაქტიკული გამოცდილების მიღების საშუალებას აძლევს, და სხვ. აქტივისტურ და სოციალურ ორგანიზაციებშჲ შედის მწვანე ამჰერსტის პროექტი (ინგლ. Green Amherst Project), ამჰერსტის ქალები (ინგლ. The Women of Amherst), ასევე Results, Inc. და სხვ. იდენტობის ორგანიზაციებია შავკანიან სტუდენტთა კავშირი, უცხოელ სტუდენტთა ასოციაცია, სამხრეთ-აზიელ სტუდენტთა ასოციაცია, სექსუალური უმცირესობების კავშირი და სხვ. კულტურულ ჯგუფებში შედის არგენტინული ტანგოს, კულინარიის, რუსული ენის და სხვა კლუბები. მმართველი ორგანიზაცია ამჰერსტის სტუდენტთა ასოციაციაა (ინგლ. Association of Amherst Students). მუსიკალურ ჯგუფებს მიეკუთვნება ამჰერსტის გუნდი (რომელიც მოიცავს ქალთა, მამაკაცთა და შერეულ გუნდს), ამჰერსტის ორკესტრი, აკაპელას სტილის ჯგუფები — დი ქიუ (ინგლ. DQ) და ბლუსტოკინგზი (ინგლ. Bluestockings) და ა.შ. გამოცემებს გაზეთი ამჰერსტის სტუდენტი (ინგლ. The Amherst Student), ამჰერსტის ელემენტი (ინგლ. The Amherst Element), ინდიკატორი (ინგლ. The Indicator) და სხვ. სპორტული კლუბებია ჭადრაკის, ნაოსნობის, ზღვაოსნობის, ბადმინტონის და სხვა კლუბები.[111]

ამჰერსტში განსაკუთრებით ბევრი საჯარო მომსახურების სერვისია, რომელიც ადგილობრივ (საზოგადოებაში ჩართულობის ცენტრის მეშვეობით), ეროვნულ და საერთაშორისო დონეზე მუშაობენ[წყარო არ არის მითითებული 275 დღე]. საჯარო მომსახურება ამჰერსტის და მისი ყოფილი პრეზიდენტის, ანტონი მარქსის, პრიორიტეტია, რომელმაც აპართეიდულ სამხრეთ აფრიკაში შავკანიანი სტუდენტებისთვის საშუალო სკოლის აშენებაში შეიტანა წვლილი.[112]

საძმოები[რედაქტირება]

ამჰერსტმა კამპუსის ტერიტორიაზე საძმოები 1984 წელს აკრძალა და სტუდენტურ საცხოვრებლებს უნივერსიტეტის ყოფილი პრეზიდენტების, პერსონალის და კურსდამთავრებულების სახელები დაარქვა,[15] თუმცა კამპუსის მიღმა მაინც შენარჩუნდა რამდენიმე საძმო. 2010 წლის ნოემბერში პრეზიდენტმა ტონი მარქსმა კამპუსის მიღმა არსებული ფსი ეფსილონის საძმოც გააუქმა; მიზეზად „ხელმძღვანელების და წევრების მხრიდან სერიოზული დარღვევები“ დასახელდა.[113]

ბიბლიოგრაფია[რედაქტირება]

რესურსები ინტერნეტში[რედაქტირება]

სქოლიო[რედაქტირება]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 ფაქტები ამჰერსტზე (en). ამჰერსტის კოლეჯი. წაკითხვის თარიღი: 2013-11-24.
  2. 2.0 2.1 2012-2013 წლის საერთო მონაცემთა ბაზა, ზოგადი ინფორმაცია (en) (PDF). ამჰერსტის კოლეჯი. წაკითხვის თარიღი: 2013-11-24.
  3. კოლეჯს პირველი პროვოსტი ჰყავს (en). ამჰერსტის კოლეჯი. წაკითხვის თარიღი: 2013-11-24.
  4. 4.0 4.1 4.2 ამჰერსტის პროფილი (en). ამჰერსტის კოლეჯი. წაკითხვის თარიღი: 2013-11-24.
  5. 5.0 5.1 5.2 მოკლე ისტორია და მიმოხილვა (en). ხუთი კოლეჯის კონსორციუმი. წაკითხვის თარიღი: 2013-11-24.
  6. 6.0 6.1 პატარა სამეულის ისტორია (en). ვესლიანის უნივერსიტეტი. წაკითხვის თარიღი: 2013-11-24.
  7. 7.0 7.1 კარნეგის კლასიფიკაციები - ამჰერსტის კოლეჯი (en). Carnegie Foundation for the Advancement of Teaching. წაკითხვის თარიღი: 2013-08-15.
  8. სწავლების სფეროები (en). ამჰერსტის კოლეჯი. წაკითხვის თარიღი: 2013-08-15.
  9. კვინტონი, სოფი. “რა მოხდებოდა, რომ მეტი კოლეჯი დაემსგავსოს ამჰერსტს?“, National Journal, 2014-01-20. წაკითხვის თარიღი: 2014-02-25. (en) 
  10. როჯერსი, ები. ; ლუბინი, გუს (2011-11-28)აშშ-ს 50 საუკეთესო კოლეჯი (en). Business Insider. წაკითხვის თარიღი: 2013-08-15.
  11. გროუვი, ალენ. აშშ-ს 20 ყველაზე სელექტიური კოლეჯი და უნივერსიტეტი (en). About.com. წაკითხვის თარიღი: 2013-08-15.
  12. 12.0 12.1 ნორი, მაიკლ. (2011-08-03)ამერიკის 20 საუკეთესო კოლეჯი (en). ფორბსი. წაკითხვის თარიღი: 2013-08-15.
  13. 13.0 13.1 13.2 ამჰერსტის კოლეჯი (en). U.S. News & World Report. წაკითხვის თარიღი: 2013-08-14.
  14. 14.0 14.1 14.2 2009-10 წლის მამაკაცთა ჰოკეის მედიის მეგზური (en) (PDF). ამჰერსტის კოლეჯი. წაკითხვის თარიღი: 2013-11-24.
  15. 15.0 15.1 ამჰერსტის კოლეჯი: ქრონოლოგია (en). ამჰერსტის კოლეჯი. წაკითხვის თარიღი: 2013-08-16.
  16. მასაჩუსეტსის უძველესი კოლეჯები (en). College Prowler. წაკითხვის თარიღი: 2013-11-24.
  17. ტაილერი 1873, გვ. 34
  18. ტაილერი 1873, გვ. 34
  19. ტაილერი 1873, გვ. 35
  20. ტაილერი 1873, გვ. 37
  21. ტაილერი 1873, გვ. 39
  22. ტაილერი 1873, გვ. 40
  23. ტაილერი 1873, გვ. 41
  24. 24.0 24.1 24.2 შესავალი (en). ამჰერსტის კოლეჯი. წაკითხვის თარიღი: 2013-11-23.
  25. ვებსტერი, LL.D., ნოა. (1862)ამჰერსტის ისტორიის ხელნაწერის ტრანსკრიპცია (en). ამჰერსტის კოლეჯი. წაკითხვის თარიღი: 2013-11-21.
  26. ტაილერი 1873, გვ. 41
  27. 27.0 27.1 27.2 ფუესი, კლოდ მურ (09 1935). „ამჰერსტი: ნიუ ინგლენდის კოლეჯის ისტორია“ (en). The New England Quarterly 8 (3): გვ. 439–441. ISSN 00284866. წაკითხვის თარიღი: 2013-11-22. 
  28. კინგი 1951, გვ. 5
  29. ყოველწლიური ფონდების მოხსენება (en) (PDF). ამჰერსტის კოლეჯი (2007-05-29). წაკითხვის თარიღი: 2013-08-15.
  30. ერთად სწავლება: 25 წელი (en). ამჰერსტის კოლეჯი. წაკითხვის თარიღი: 2013-11-23.
  31. 31.0 31.1 კაროლინ ა. „ბიდი“ მარტინის, Ph.D. შესახებ (en). ამჰერსტის კოლეჯი. წაკითხვის თარიღი: 2013-11-23.
  32. მარტინი, ბიდი (1991-09-24). ქალი და თანამედროვეობა: ლუ ანდრეას-სალომეს (ცხოვრების) სტილი (en). ნიუ-იორკი: კორნელის უნივერსიტეტის პრესა. ISBN 978-0801499074. წაკითხვის თარიღი: 2013-11-23. 
  33. მარტინი, ბიდი (1997-02-16). სწორად ნათამაშები ქალურობა: ლესბიანის მნიშვნელობა, 1-ლი (en), რუტლეჯი. ISBN 978-0415916813. წაკითხვის თარიღი: 2013-11-23. 
  34. წინა პრეზიდენტები (en). ამჰერსტის კოლეჯი. წაკითხვის თარიღი: 2013-11-24.
  35. პერეზ-პენია, რიჩარდ. “გაჭირვებული სტუდენტების მიღება რამდენიმე ელიტაურ კოლეჯში ნელა მიმდინარეობს“, New York Times, 2013-07-30. წაკითხვის თარიღი: 2013-11-25. (en) 
  36. ლაზერი, დანიელ. “ელიტარულ კოლეჯებში ნამდვილი მრავალფეროვნების მიღწევა“, Washington Monthly, 2011-05-25. წაკითხვის თარიღი: 2013-11-25. (en) 
  37. ელიტარულ კოლეჯებში მიღების შემთხვევითობა (en). The Princeton Review (2011-03-28). წაკითხვის თარიღი: 2013-08-14.
  38. მური, მერი. “ელიტარულ ამჰერსტის კოლეჯს ახალი პრეზიდენტი ჰყავს“, Boston Business Journal, 2011-06-17. წაკითხვის თარიღი: 2013-08-15. (en) 
  39. რა ღირს აშშ-ში განათლება? (en). QS (2012-02-29). წაკითხვის თარიღი: 2013-08-14.
  40. დიპლომები და კოლეჯიდან გამოსვლა: რომელი კოლეჯები ამთავრებინებენ სტუდენტებს სწავლას (და რომლები - არა) (en) (PDF) pp. 15. American Enterprise Institute for Public Policy Research. წაკითხვის თარიღი: 2013-11-25.
  41. National Collegiate Scouting Association Announces 2007 Collegiate Power Rankings (en). PR Newswire (2007-08-20). წაკითხვის თარიღი: 2013-11-25.
  42. ლიბერალური განათლების კოლეჯების რეიტინგი (en). Washington Monthly. წაკითხვის თარიღი: 2013-08-14.
  43. ელიზაბეთ ბერნშტაინი. “გინდა ჰარვარდის სამართლის სკოლაში მოხვედრა?“, The New York Times, 2003-09-26. წაკითხვის თარიღი: 2013-08-15. (en) 
  44. 2013 წლის Princeton Review-ს ყველაზე მომგებიანი კოლეჯები (en). USATODAY. წაკითხვის თარიღი: 2013-11-25.
  45. Carnegie-ს კლასიფიკაცია (en). Carnegie Foundation. წაკითხვის თარიღი: 2013-11-25.
  46. ეროვნული ლიბერალური განათლების კოლეჯი (en). U.S. News & World Report. წაკითხვის თარიღი: 2013-11-25.
  47. 47.0 47.1 ამჰერსტის კოლეჯის სამოცდამეექვსე მოხსენება საშუალო სკოლებისთვის (en) (PDF). ამჰერსტის კოლეჯი (2012-10-01). წაკითხვის თარიღი: 2013-08-15.
  48. 48.0 48.1 ამჰერსტის აპლიკაცია | ამჰერსტის კოლეჯი (en). ამჰერსტის კოლეჯი. წაკითხვის თარიღი: 2013-11-22.
  49. პირველკურსელი აპლიკანტები | ამჰერსტის კოლეჯი (en). ამჰერსტის კოლეჯი. წაკითხვის თარიღი: 2013-11-22.
  50. 50.0 50.1 50.2 ამჰერსტის აპლიკაცია | ამჰერსტის კოლეჯი (en). ამჰერსტის კოლეჯი. წაკითხვის თარიღი: 2013-11-22.
  51. მიღების სტატისტიკა | ამჰერსტის კოლეჯი (en). ამჰერსტის კოლეჯი. წაკითხვის თარიღი: 2013-11-22.
  52. 52.0 52.1 ფაკულტეტები (en). ამჰერსტის კოლეჯი. წაკითხვის თარიღი: 2013-08-15.
  53. 53.0 53.1 53.2 მეტის სწავლა (en) (PDF) pp. 20. ამჰერსტის კოლეჯი. წაკითხვის თარიღი: 2013-11-24.
  54. ნაწილი I: სამედიცინო სკოლის აპლიკაციისთვის მომზადება (en). ამჰერსტის კოლეჯი. წაკითხვის თარიღი: 2013-08-15.
  55. პირველკურსელების სემინარი (en). ამჰერსტის კოლეჯი. წაკითხვის თარიღი: 2013-08-15.
  56. ძირითადი წესები, ხარისხის მოთხოვნები (en) (PDF) pp. 65. ამჰერსტის კოლეჯი. წაკითხვის თარიღი: 2013-11-24.
  57. 57.0 57.1 მრჩევლები (en). ამჰერსტის კოლეჯი. წაკითხვის თარიღი: 2013-11-24.
  58. 58.0 58.1 58.2 58.3 58.4 ამჰერსტი აღებს კარს 1821 წლიდან (en) (PDF) pp. 2. ამჰერსტის კოლეჯი. წაკითხვის თარიღი: 2013-11-24.
  59. მეტის სწავლა (en) (pdf). ამჰერსტის კოლეჯი. წაკითხვის თარიღი: 2013-08-15.
  60. 60.0 60.1 60.2 ინფორმაცია შენობებზე (en). წაკითხვის თარიღი: 2013-11-25.
  61. Graduate Programs (en). ამჰერსტის კოლეჯი. წაკითხვის თარიღი: 2013-08-15.
  62. ამერიკული სწავლებების დეპარტამენტის შესახებ (en). ამჰერსტის კოლეჯი. წაკითხვის თარიღი: 2013-08-15.
  63. ნეირომეცნიერების პროგრამა (en). ამჰერსტის კოლეჯი. წაკითხვის თარიღი: 2013-08-15.
  64. საერთ მონაცემთა ბაზა 2012-2013, პროფესორების და სტუდენტების რაოდენობა (en) (PDF). ამჰერსტის კოლეჯი. წაკითხვის თარიღი: 2013-08-13.
  65. სწავლება (en). წაკითხვის თარიღი: 2013-08-14.
  66. სარა რაიმერი. “Harvard Task Force Calls for New Focus on Teaching and Not Just Research“, The New York Times, 2007-05-10. წაკითხვის თარიღი: 2013-08-15. (en) 
  67. ნებართვის ფორმა (en) (DOC). ამჰერსტის კოლეჯი. წაკითხვის თარიღი: 2013-12-02.
  68. ხუთი კოლეჯის ნებართვის ფორმა (en) (PDF). ამჰერსტის კოლეჯი. წაკითხვის თარიღი: 2013-12-02.
  69. პრიტჩერდი, უილიამ ჰ. (en). ამჰერსტის კოლეჯი. წაკითხვის თარიღი: 2013-11-24.
  70. ჩიკერინგი, ჰოუელ დ. (en). ამჰერსტის კოლეჯი. წაკითხვის თარიღი: 2013-11-24.
  71. სტავანსი, ილან (en). ამჰერსტის კოლეჯი. წაკითხვის თარიღი: 2013-11-24.
  72. დუგლასი, ლორენს რ. (en). ამჰერსტის კოლეჯი. წაკითხვის თარიღი: 2013-11-24.
  73. ზაჯონკი, ართურ გ. (en). ამჰერსტის კოლეჯი. წაკითხვის თარიღი: 2013-11-24.
  74. ტაუბმანი, უილიამ კ. (en). ამჰერსტის კოლეჯი. წაკითხვის თარიღი: 2013-11-24.
  75. აბიოდუნი, როულანდ ო. (en). ამჰერსტის კოლეჯი. წაკითხვის თარიღი: 2014-11-24.
  76. არკსი, ჰედლი პ. (en). ამჰერსტის კოლეჯი. წაკითხვის თარიღი: 2013-11-24.
  77. ველემანი, დანიელ ჯ. (en). ამჰერსტის კოლეჯი. წაკითხვის თარიღი: 2013-11-24.
  78. ნიდიჩი, სიუზენ (en). ამჰერსტის კოლეჯი. წაკითხვის თარიღი: 2013-11-24.
  79. სპრეტლენი, მ. ლუის (en). ამჰერსტის კოლეჯი. წაკითხვის თარიღი: 2013-11-24.
  80. პროგრამების სია (en). ამჰერსტის კოლეჯი. წაკითხვის თარიღი: 2013-11-24.
  81. 81.0 81.1 საზღვარგარეთ სწავლისთვის დახმარება (en). ამჰერსტის კოლეჯი. წაკითხვის თარიღი: 2013-11-24.
  82. კრედიტი & ტრანსკრიპტები (en). ამჰერსტის კოლეჯი. წაკითხვის თარიღი: 2013-11-24.
  83. The AIG Benefits Travel Assist℠ Advantage (en) (PDF). ამჰერსტის კოლეჯი (2013-07-01). წაკითხვის თარიღი: 2013-11-24.
  84. 12 კოლეჯის გაცვლითი პროგრამა (en). ტრინიტის კოლეჯი. წაკითხვის თარიღი: 2013-11-24.
  85. აშშ-ში სწავლა & განსაკუთრებული პროგრამები (en). 2013-11-24. წაკითხვის თარიღი: 2013-11-24.
  86. შესავალი (en) (PDF) pp. 3. ხუთი კოლეჯის კონსორციუმი. წაკითხვის თარიღი: 2013-11-24.
  87. Museums10 (en). Museums10. წაკითხვის თარიღი: 2013-11-24.
  88. ხუთი კოლეჯის ცეკვის დეპარტამენტი (en). ხუთი კოლეჯის კონსორციუმი. წაკითხვის თარიღი: 2013-08-15.
  89. ხუთი კოლეჯის რადიოასტრონომიის ობსერვატორია (en). მასაჩუსეტსის უნივერსიტეტი ამჰერსტი. წაკითხვის თარიღი: 2013-08-15.
  90. ხუთი კოლეჯის სანაპირო და საზღვაო მეცნიერების პროგრამა (en). ხუთი კოლეჯის კონსორციუმი. წაკითხვის თარიღი: 2013-08-15.
  91. 2014 წლის გაზაფხულის სანაპირო და საზღვაო მეცნიერებების პროგრამა (en). ამჰერსტის კოლეჯი. წაკითხვის თარიღი: 2013-11-24.
  92. მიდის ხელოვნების მუზეუმი (en). ამჰერსტის კოლეჯი. წაკითხვის თარიღი: 2013-11-25.
  93. საჩუქარი მიდის ხელოვნების მუზეუმს (en). ამჰერსტის კოლეჯი. წაკითხვის თარიღი: 2013-11-25.
  94. ამჰერსტის რუსული კულტურის ცენტრი (en). ამჰერსტის კოლეჯი. წაკითხვის თარიღი: 2013-11-25.
  95. 95.0 95.1 95.2 ბიბლიოთეკა (en). ამჰერსტის კოლეჯი. წაკითხვის თარიღი: 2013-11-25.
  96. მედიასთან ურთიერთობის დირექტორი. “საინტერესო ნაფეხურები: ახალი წიგნი ნენსი პიკის და ფრენკ უორდის მიერ ამჰერსტის დინოზავრის ნაკვალევის და ბუნებრივი ისტორიის კოლექციის შესახებ“, ამჰერსტის კოლეჯი, 2006-06-09. წაკითხვის თარიღი: 2013-08-15. (en) 
  97. პიკი, ნენსი; უორდი, ფრენკ მ. (2006-09-30). საინტერესო ნაფეხურები: პროფესორ ჰიჩკოკის დინოზავრის ნაფეხურები და ბუნებრივი ისტორიის სხვა საგანძურები ამჰერსტის კოლეჯში (en). ამჰერსტის კოლეჯის პრესა. ISBN 978-0-943184-09-8. 
  98. 98.0 98.1 It’s Easy Being Green: ამჰერსტის კოლეჯის პროგრესი მდგრადი განვითარების კუთხით“, ამჰერსტის კოლეჯი, 2008-09-08. წაკითხვის თარიღი: 2013-08-16. (en) 
  99. საფასურები და ხარჯები 2013-2014 (en). ამჰერსტის კოლეჯი. წაკითხვის თარიღი: 2013-08-16.
  100. 100.0 100.1 100.2 100.3 ფინანსური დახმარება & ხარჯები: შემიძლია თუ არა ამჰერსტში სწავლა? (en). ამჰერსტის კოლეჯი. წაკითხვის თარიღი: 2013-08-16.
  101. ხშირად დასმული კითხვები აშშ-ს და კანადის მოქალაქეებისა და მუდმივი მაცხოვრებლებისთვის (en). ამჰერსტის კოლეჯი. წაკითხვის თარიღი: 2013-08-16.
  102. დეივიდ ლეონჰარდტი. “საუკეთესო კოლეჯები, უმეტესწილად ელიტისთვის“, The New York Times, 2011-05-24. წაკითხვის თარიღი: 2013-08-16. (en) „The result of these changes is that Amherst has a much higher share of low-income students than almost any other elite college.“ 
  103. დაწესებულებები, რომლებიც გასცემენ ფინანსურ დახმარებას (en). International Student. წაკითხვის თარიღი: 2013-08-16.
  104. 104.0 104.1 104.2 საერთო მონაცემთა ბაზა 2012-2013, ჩარიცხვა და გაგრძელება (en) (PDF). ამჰერსტის კოლეჯი. წაკითხვის თარიღი: 2013-08-13.
  105. ამჰერსტის კოლეჯის მისია (en). ამჰერსტის კოლეჯი. წაკითხვის თარიღი: 2013-08-15.
  106. საერთო მონაცემთა ბაზა 2008-09, ჩარიცხვა და გაგრძელება (en) (pdf). ამჰერსტის კოლეჯი. წაკითხვის თარიღი: 2013-08-13.
  107. საერთო მონაცემთა ბაზა 2009-10, ჩარიცხვა და გაგრძელება (en) (pdf). ამჰერსტის კოლეჯი. წაკითხვის თარიღი: 2013-08-13.
  108. საერთო მონაცემთა ბაზა 2010-11, ჩარიცხვა და გაგრძელება (en) (PDF). ამჰერსტის კოლეჯი. წაკითხვის თარიღი: 2013-08-13.
  109. საერთო მონაცემთა ბაზა 2011-2012, ჩარიცხვა და გაგრძელება (en) (PDF). ამჰერსტის კოლეჯი. წაკითხვის თარიღი: 2013-08-13.
  110. საერთო მონაცემთა ბაზა 2012-2013, სტუდენტური ცხოვრება (en) (PDF). ამჰერსტის კოლეჯი. წაკითხვის თარიღი: 2013-08-13.
  111. სტუდენტური ჯგუფები & გამომცემლობები (en). ამჰერსტის კოლეჯი. წაკითხვის თარიღი: 2013-11-22.
  112. კამპუსის რევოლუციონერი“, Businessweek, 2006-02-26. წაკითხვის თარიღი: 2013-08-15. (en) 
  113. ტენგი, ელეინ. “კოლეჯი კრძალავს ფსი-ეფსილონის საძმოს“, The Amherst Student. წაკითხვის თარიღი: 2013-08-16. (en) დაარქივებულია ორიგინალიდან 2011-08-11-ში. „College President Anthony Marx sent a campus-wide email banning all membership in the fraternity Psi Upsilon (Psi-U) for their “serious violation involving the leadership and members.”“