საქართველოს საპარლამენტო არჩევნები 1999

1995‹   2003 ›
საქართველოს საკანონმდებლო ორგანოს არჩევნები
31 ოქტომბერი 1999
პარტია		საქართველოს მოქალაქეთა კავშირი	დემოკრატიული აღორძინების კავშირი
მოსახლეობის ხმები		890,915	537,297
პროცენტი		41,75%	25,18%
მმართველი პარტია			არჩეული პარტია
საქართველოს მოქალაქეთა კავშირი			საქართველოს მოქალაქეთა კავშირი

საქართველოს საკანონმდებლო ორგანოს არჩევნები (1999) — რიგით მეორე საპარლამენტო არჩევნები საქართველოში კონსტიტუციის მიღების შემდგომ. არჩევნებში გაიმარჯვა საქართველოს მოქალაქეთა კავშირმა, პრეზიდენტ ედუარდ შევარდნაძის პარტიამ.

არჩევნები

არჩევნები ტარდებოდა პროპორციული და მაჟორიტარული სისტემით. პარლამენტის 235 მანდატიდან 150 მანდატი მიღებული ხმების პროპორციულად ნაწილდებოდა იმ პარტიებზე, რომლებმაც მიიღეს არჩევნებში მონაწილე ამომრჩეველთა ხმების 7%-ზე მეტი. 85 დეპუტატი კი აირჩეოდა საქართველოს ადმინისტრაციული ერთეულებიდან. მათგან 12 მაჟორიტარ დეპუტატს ავტომატურად მიენიჭა უფლებამოსილება, რადგანაც ისინი წარმოადგენდნენ აფხაზეთის რაიონების მაჟორიტარ დეპუტატებს, ხოლო დანარჩენ 73 მაჟორიტარულ ოლქში არჩევნები ჩატარდა ჩვეულებისამებრ.

არჩევნებში მონაწილეობდა მმართველი პარტია, საქართველოს მოქალაქეთა კავშირი, რომლის სლოგანი იყო „სტაბილურობიდან კეთილდღეობამდე“ და აქცენტს სოციალური პრობლემების მოგვარებასა და ნატოში ინტეგრაციაზე აკეთებდა. მის ძირითად კონკურენტად მოიაზრებოდა ბლოკი „აღორძინება“, რომელიც წარმოადგენდა აჭარის მმართველის, ასლან აბაშიძის და მისი პარტიის, დემოკრატიული აღორძინების კავშირის ირგვლივ გაერთიანებულ რამდენიმე მემარცხენე და ნაციონალისტურ პარტიას, მათ შორის იყვნენ: „საქართველოს სოციალისტური პარტია“, „ქართველ ტრადიციონალისტთა კავშირი“, „კონსტანტინე გამსახურდიას საზოგადოება“ და საქართველოს თავისუფლებისა და ერთიანობის მოძრაობა „ჭყონდიდელი“ (მოძრაობა „ჭყონდიდელი“). მათ გარდა არჩევნებში კიდევ 30 პარტია მონაწილეობდა.

შედეგები

რეგისტრირებულ ამომრჩეველთა საერთო რაოდენობა იყო - 2 882 646. არჩევნებში მონაწილეობა მიიღო - 1 948 659, ანუ ამომრჩეველთა 68%-მა. დადგენილი 7%-იანი ბარიერი მხოლოდ სამმა პარტიამ გადალახა. არჩევნებში გამოვლენილი დარღვევების გამო 14 ნოემბერს ცალკეულ საარჩევნო უბნებზე ხელახალი კენჭისყრა გაიმართა.

პარტია	%	მიღებული მანდატების რაოდენობა	მაჟორიტარული მანდატების რაოდენობა
საქართველოს მოქალაქეთა კავშირი	41,75	85	47
დემოკრატიული აღორძინების კავშირი	25,18	51	7
მრეწველობა გადაარჩენს საქართველოს	7,08	14	1
საქართველოს ლეიბორისტული პარტია	7,02	-	2
ეროვნულ-დემოკრატიული ალიანსი (ეროვნულ-დემოკრატიული პარტია და საქართველოს რესპუბლიკური პარტია)	4,45	-	-
სახალხო პარტია - დიდგორი	4,11	-	-
გაერთიანებული კომუნისტური პარტია	1,35	-	-
დანარჩენი 25 პარტია	<1	-	-
დამოუკიდებელი კანდიდატები	-	-	16

ახლადარჩეული პარლამენტის პირველი სხდომა გაიმართა 20 ნოემბერს, პარლამენტის თავმჯდომარე გახდა ზურაბ ჟვანია.

რესურსები ინტერნეტში

• GEORGIA Parliamentary Chamber
• REPUBLIC OF GEORGIA, LEGISLATIVE ELECTIONS OF OCTOBER
• არჩევნების შედეგების რუკა დაარქივებული 2016-03-05 საიტზე Wayback Machine. ჟურნალი „ტაბულა"