ბ, ⴁ, Ⴁ, Ბ[1] (ბანი) — ქართული ანბანის მეორე ასო. მისი სახელია „ბანი“. გრაფიკული სიმბოლო ბაგისმიერი (წყვილბაგისმიერი) ხშულმსკდომი მჟღერი თანხმოვნისა. ასომთავრულში იწერებოდა Ⴁ, ნუსხურში — ⴁ. ძველ ქართულ სათვალავში აღნიშნავდა რიცხვ ორს (2). მხედრული დამწერლობის ოთხხაზოვან სისტემაში მისი მოხაზულობა ზედა სამ ხაზში თავსდება.
ბ-ს მოხაზულობა ასომთავრულში ხაზებისა და წრის კომბინაციაა, რომელიც კვადრატულ არეს იკავებს. VII საუკუნეში თავგახსნილი იწერებოდა. ბ ნუსხურში მარჯვნივაა გადახრილი და ქვედა სამ ხაზშია მოთავსებული. მხედრული ბ-ს ქვედა ნაწილი წრეს კრავს და ზედა სამ ხაზში იწერება.