ავქსენტი მეგრელიძე

მასალა ვიკიპედიიდან — თავისუფალი ენციკლოპედია
Jump to navigation Jump to search
Disambig-dark.svg სხვა მნიშვნელობებისთვის იხილეთ მეგრელიძე.
ავქსენტი მეგრელიძე
Aqvsenti megrelize.jpeg
ბიოგრაფია
დაბ. თარიღი 1 იანვარი, 1877
დაბ. ადგილი გურია
გარდ. თარიღი 12 დეკემბერი, 1953 (76 წლის)
ჟანრ(ებ)ი ფოლკლორი
საქმიანობა ლოტბარი

ავქსენტი მეგრელიძე (დ. 1877, ხრიალეთი — გ. 1953) — ქართველი ლოტბარი, ხალხური სიმღერების შემსრულებელი.

ბიოგრაფია[რედაქტირება | წყაროს რედაქტირება]

სოფლის დაწყებითი სკოლის დასრულების შემდეგ 1885 წელს შეიყვანეს ოზურგეთის სასულიერო სასწავლებელში, ხოლო შემდეგ კი ქუთაისის სასულიერო სემინარიაში შეიყვანეს. სწავლისას ავქსენტი მუსიკისადმი დიდ მიდრეკილებას იჩენდა, გარდა იმისა, რომ გუნდში მღეროდა, ეცნობოდა კიდეც სანოტო ანბანს. მალე იმდენად გაიწაფა, რომ ცნობილმა ლოტბარმა კორნელი მაღრაძემ თავის თანაშემწედ დანიშნა.

1893 წელს ის სემინარიიდან გარიცხეს რევოლუციურ გამოსვლებში მონაწილეობის გამო. 20 წლის ავქსენტი მეგრელიძემ მუშაობა დაიწყო ოზურგეთის სასულიერო სასწავლებელში, სადაც სხვა საგნებთან ერთად სიმღერა-გალობას ასწავლიდა. პარალელურად იგი ქალაქის პირველდაწყებით სკოლაში და ქალთა პროგიმნაზიაში მოღვაწეობდა. 1900-1918 წლებში წლიდან ავქსენტი მეგრელიძე ფოთში მოღვაწეობდა. ის საეკლესიო გუნდს ლოტბარობდა და თან პედაგოგიურ მუშაობას ეწეოდა. მან ფოთში ჩამოაყალიბა ქართული სიმღერისა და ცეკვის ანსამბლი. იგი მრავალი წლის მანძილზე უანგაროდ ხელმძღვანელობდა ანსამბლს, რომელიც დიდი პოპულარობით სარგებლობდა მთელ საქართველოში. 1913 წლის ნოემბერში ანსამბლმა აქტიური მონაწილეობა მიიღო დიდი მსახიობის ლადო მესხიშვილის პატივსაცემად ფოთში გამართულ იუბილეზე. 1917 წელს ფოთში მცხოვრებ საზოგადო მოღვაწეთა ინიციატივით ჩამოყალიბდა მომღერალთა ოცდაათ კაციანი გუნდი, რომელსაც სათავეში ავქსენტი მეგრელიძე ჩაუდგა. ავქსენტი ინტერესდება ხალხური საკრავებით. მას დიდი დამსახურება მიუძღვის ქართული ხალხური საკრავების მოძიების, შესწავლისა და განვითარების საქმეში.

1920-იან წლებში მან გურიაში შექმნა მეჩონგურეთა ანსამბლი, რომელმაც 1929 წელს მეორე რესპუბლიკურ ოლიმპიადაზე მიიღო მონაწილეობა. 1933 წელს ავქსენტი მეგრელიძე დამკვიდრდა თბილისში. თბილისში მან ჩამოაყალიბა მეჩონგურე ქალთა მწყობრი, რომელშიც ოცამდე ქალი იყო; სწორედ აქ დახელოვნდნენ შემდგომში ჩონგურზე დაკვრის ისეთი ოსტატები, როგორებიც იყვნენ: ელენე ჭუბაბრია, მარგო თედიაშვილი, ნინო მილორავა და სხვანი. მეჩონგურე ქალთა ანსამბლი, რომელსაც ავქსენტი მეგრელიძე ხელმძღვანელობდა მთელი შემადგენლობით შეუერთდა დასავლეთ საქართველოს ეთნოგრაფიულ გუნდს, რომელიც ემზადებოდა საქართველოს ლიტერატურისა და ხელოვნების დეკადაში მონაწილეობის მისაღებად. 19367 წელს მოსკოვში გამართულ ქართული ხელოვნების დეკადაზე კირილე პაჭკორიასთან ერთად ხელმძღვანელობდა დასავლეთ საქართველოს ანსამბლს. 1940-1946 წლებში ავქსენტი მეგრელიძე იყო სიმღერისა და ცეკვის სახელმწიფო ანსამბლის ინსტრუმენტული ჯგუფის ხელმძღვანელი. ავქსენტი მეგრელიძე უკანასკნელი ათი წლის განმავლობაში ხელმძღვანელობდა საქართველოს რადოიკომიტეტთან არსებულ ქართულ ხალხურ გუნდს.

1953 წელს იგი გარდაიცვალა, დაკრძალულია თბილისში, ვაკის სასაფლაოზე. ქართულ ფოლკლორისტიკაში შეტანილი წვლილისათვის ავქსენტი მეგრელიძეს საქართველოს ხელოვნების დამსახურებული მოღვაწის წოდება მიენიჭა. აქვსენტი მეგრელიძის მიერ ჩამოყალიბებულ სიმღერისა და ცეკვის ანსამბლს ორი ათეული წლის მანძილზე ჩინებულად ხელმძღვანელობდა ხელოვნების დამსახურებული მოღვაწე, შესანიშნავი ლოტბარი მიხეილ ხავთასი. ანსამბლში წლების განმავლობაში მოღვაწეობდა ცნობილი ქართველი მომღერალი ძუკუ ლოლუა. აქ მღეროდნენ ქართული სიმღერის ოსტატები: ვ. გუგუშვილი, ძმები ქოიავები, გ.აბრალავა, რ.მიმინოშვილი და სხვები.

რესურსები ინტერნეტში[რედაქტირება | წყაროს რედაქტირება]