Total War: Warhammer

მასალა ვიკიპედიიდან — თავისუფალი ენციკლოპედია
Jump to navigation Jump to search
Total War: Warhammer
Total War Warhammer cover art.jpg
დეველოპერ(ებ)ი Creative Assembly
გამომცემელი Sega
სერია „Total War“
პლატფორმ(ებ)ი Microsoft Windows
Linux
macOS
გამოსვლის თარიღი
  • Windows
    • მსოფლიო 24 მაისი, 2016
  • Linux
    • მსოფლიო 24 ნოემბერი, 2016
  • macOS
    • მსოფლიო 18 აპრილი, 2017
ჟანრ(ებ)ი რეალური დროის ტაქტიკა
რიგითობაზე დამყარებული სტრატეგია
რეჟიმ(ებ)ი ერთმოთამაშიანი
მრავალმოთამაშიანი
რეჟისორ(ებ)ი
  • მაიკლ მ. სიმფსონი
  • იენ როქსბურგი
სცენარისტი ენდი ჰოლი
კომპოზიტორი
  • რიჩარდ ბედოუ
  • იენ ლივინგსტონი
  • ტიმოთი მაიკლ უინი
  • ტილმან სილესქუ
ვერსია 1.6.0
საიტი ოფიციალური საიტი

Total War: Warhammer (ქართ. ტოტალური ომი: საომარი ურო) — „Total War“-ის სერიის რიგით მეათე სტრატეგიული თამაში და პირველი, რომელიც დაფუძნებულია არა ისტორიულ, არამედ Games Workshop-ის კუთვნილი ფენტეზი Warhammer Fantasy Battles-ის თემატიკაზე. შექმნილია Creative Assembly-ს და გამოქვეყნებულია Sega-ის მიერ 2016 წელს. ეს არის პირველი თამაში დაგეგმილ Warhammer-ის ტრილოგიაში[1]. მეორე ნაწილი გამოვიდა 2017 წლის 28 სექტემბერს.

გეიმპლეი[რედაქტირება | წყაროს რედაქტირება]

გეიმპლეი დაფუძნებულია რიგითული სტრატეგიის რუკაზე ბრძოლების რეალური დროის ტაქტიკის რეჟიმში მართვაზე. მოქმედება მიმდინარეობს Warhammer Fantasy Battles-ის გამოგონილ სამყაროში, კონტინენტზე სახელად ძველი სამყარო (ადგილობრივი ევროპის ანალოგი), იმპერიის კალენდრით 2500-იან წლებში. მოთამაშის კონტროლის ქვეშ გადადის კონტინენტის ერთ-ერთი ფრაქცია და მისი მოვალეობაა გამარჯვების მიღწევა ამ ფრაქციასთან დაკავშირებული პირობების შესრულების შედეგად. წინა, ისტორიული თემატიკის მქონე თამაშებისგან განსხვავებით, გენერლები ბრძოლებში მონაწილეობენ პირადი გვარდიის გარეშე, მაგრამ ისინი უნიკალურ საომარ ერთეულებს წარმოადგენენ.

თამაშში შემოიტანეს ჯადოქრობის მექანიკა, მფრინავი და მითური არსებები საომარი ერთეულების სახით და უნიკალური უნარები სხვადასხვა სახის აგენტებისა და რაზმებისთვის. გენერლებს შორის გამოიყოფიან ლეგენდარული ლორდები — განსაკუთრებული შესაძლებლობების მქონე უნიკალური პერსონაჟები (ყოველი თამაში იწყება ერთი ლეგენდარული ლორდის არჩევით, დანარჩენები დაბლოკილები არიან და მათი გახსნა კამპანიის მსვლელობისას შეიძლება). ჯარებთან შეერთებული აგენტები ასევე მონაწილეობენ ბრძოლებში. ასევე დაემატა სიბილწის ეფექტი: ქაოსის მიმდევრები და ვამპირები ავრცელებენ, შესაბამისად, ქაოსისა და ვამპირების სიბილწეს, რაც უარყოფითად მოქმედებს სხვა ფრაქციების რეგიონებზე. იმ მიწებზე, სადაც სიბილწე დიდი რაოდენობითაა, სხვა ფრაქციის არმიები მუდმივ დანაკარგს განიცდიან, ხოლო ვამპირების არმიები დანაკარგს განიცდიან „სუფთა“ მიწებზე გადაადგილებისას (ქაოსის მეომრებისგან განსხვავებით). ორკებისა და მხეცხალხის არმიებს აქვთ სპეციალური აგრესიის სკალა, რომელიც შევსებისას წარმოქმნის ხელოვნური ინტელექტის მიერ კონტროლირებად მოკავშირე არმიას (რომელსაც ჰქვია „ვააა!“ ორკების არმიისთვის და „ბღავილა ჯოგი“ მხეცხალხისთვის), რომელიც გამუდმებით თან მიჰყვება მას.

როგორც Total War-ის ბოლო დროის სტრატეგიებში, ასევე Warhammer-ში რუკა დაყოფილია პროვინციებად, რომლებიც შედგება რამდენიმე (ერთიდან ოთხის ჩათვლით) რეგიონისგან, რომელთაგან ერთი წარმოადგენს ცენტრალურს. პროვინციაში, რომელიც მთლიანად ერთი ფრაქციას ეკუთვნის, შესაძლებელია გარკვეული ბრძანების გატარება, რომელიც გაზრდის შემოსავალს, შეამცირებს შენობების მშენებლობის ან რაზმების დაქირავების ფასს, გაუმჯობესებს წესრიგს ან ექნება სხვა ეფექტი. ასევე, საერთო კულტურის მქონე ფრაქციებს (იმპერიის სამთავროებს, ჯუჯების კარაკებს, ბრეტონიის საჰერცოგოებს, ვამპირთა კლანებს, ორკების ტომებს) შეუძლიათ კონფედერაციის გზით გაერთიანება, მაგრამ კონფედერაციის ინიციატორი შეიძლება იყოს მხოლოდ სათამაშოდ ხელმისაწვდომი ფრაქცია — მაგალითად, მიდენლანდი ან შტირლანდი კონფედერაციას ვერ შექმნის მაშინ, როდესაც ანგრუნდის კლანსა და არგუილონს შეუძლიათ სხვა ჯუჯებისა (ანგრუნდის შემთხვევაში) და ტყის ელფების (არგუილონის შემთხვევაში) ფრაქციების შეერთება მაშინაც კი, როდესაც მათ მოთამაშე არ აკონტროლებს.

სიუჟეტის მიხედვით, იმპერიაში იწყება შინადაპირისპირება სხვადასხვა სამთავროებს შორის კარლ ფრანცის, რაიკლანდის კურფიურსტის, იმპერატორად არჩევის გამო, აღმოსავლეთით, სილვანიის სამთავროში, ფონ კარშტაინების ვამპირთა საგვარეულო დაბრუნდა და აღზევებას იწყებს, მსოფლიოს კიდის მთებში ჯუჯების სამეფოები ებრძვიან ორკებისა და გობლინების შემოსევას, სამხრეთის უდაბურ მიწებში ორკების დიდი ბელადი გრიმგორ რკინისტყავა მწვანეკანიანთა ურდოებს აგროვებს, ხოლო უკიდურეს ჩრდილოეთში ქაოსის საომარი ბანდები არქაონ მარადრჩეულის მახვილის ქვეშ ერთიანდებიან.

ფრაქციები[რედაქტირება | წყაროს რედაქტირება]

კამპანიაში თავდაპირველად ხელმისაწვდომი იყო მხოლოდ ოთხი ფრაქცია: ადამიანთა იმპერია, მწვანეკანიანები, ჯუჯები და ვამპირი გრაფები[2]. დროთა განმავლობაში, სხვადასხვა DLC-ის გამოშვებასთან ერთად, მათი რაოდენობა გაიზარდა.

საბოლოოდ კამპანიაში ხელმისაწვდომია შემდეგი ფრაქციები და ლეგენდარული ლორდები:

  • ადამიანთა იმპერია: იმპერატორი კარლ ფრანცი, უზენაესი პატრიარქი ბალთაზარ გელტი და დიადი თეოგონისტი ფოლკმარ პირქუში;
  • მწვანეკანიანები: გრიმგორ რკინისტყავა და აჟაგ გამჟლიტავი;
    • ქვეფრაქცია სისხლხელიანები: დიადი მწვანე წინასწარმეტყველი ვურზაგი;
    • ქვეფრაქცია დაბრეცილი მთვარე: სკარსნიკი;
  • ჯუჯები: უზენაესი ხელმწიფე თორგრიმ საჩივართმცველი, უნგრიმ რკინის მუშტი და თეთრი ჯუჯა გრომბრინდალი;
    • ქვეფრაქცია კლანი ანგრუნდი: მეფე ბელეგარ რკინის ურო;
  • ვამპირი გრაფები: მანფრედ ფონ კარშტაინი, ჰაინრიხ კემლერი და ჰელმან გორსტი;
    • ქვეფრაქცია ფონ კარშტაინების კლანი: ვლად ფონ კარშტაინი და იზაბელა ფონ კარშტაინი;
  • ქაოსის მეომრები: არქაონ მარადრჩეული, ხოლეკ მზემშთანთქმელი და ზიგვალდ დიდებული;
  • ბრეტონიის სამეფო: მეფე ლუან ლეონკური (ლომგული);
    • ქვეფრაქცია ბორდელო: ჰერცოგი ალბერიკ დ'ბორდელო;
    • ქვეფრაქცია კარკასონი: ფერია-შემლოცველი მორგიანა;
  • ტყის ელფები: ორიონი;
    • ქვეფრაქცია არგუილონი: დურთუ;
  • მხეცხალხი: ხაზრაკ ცალთვალა, მალაგორ ავბედითი და მორღურ ჩრდილგამცემი.
  • ნორსკას ტომები: ვულფრიკ მოხეტიალე;
    • ქვეფრაქცია ზამთრის ეშვი: თროგი.

გეოგრაფიული თავისებურებების გამო ადამიანებს (უფრო ზუსტად, იმპერიელებს და ბრეტონებს) და ვამპირებს არ შეუძლიათ ჯუჯების, ორკების, ნორსკებისა და ტყის ელფების ტერიტორიებზე დასახლება, ჯუჯებსა და ორკებს არ შეუძლიათ ადამიანებისა და ელფების მიწების დაკავება, ხოლო ნორსკებს შეუძლიათ მხოლოდ სანაპირო დასახლებებისა და ქვეყნების დედაქალაქების დაპყრობა (DLC „ნორსკას“ გამოშვებამდე მათ ესეც არ შეეძლოთ, სახლობდნენ მხოლოდ თავიანთ მშობლიურ ნახევარკუნძულზე). მარტო ელფებს შეუძლიათ სხვა ხალხების მიწებზე დასახლება, მაგრამ სინამდვილეში ისინი ქმნიან მხოლოდ ავანპოსტებს — ნამდვილი დასახლებები მხოლოდ მათი მშობლიური ტყის, ათელ ლორენის, ფარგლებში არსებობს. მხეცხალხსა და ქაოსის არმიებს არ შეუძლიათ დასახლებების დაკავება — ისინი ურდოს სახით არსებობენ, ამიტომ შეუძლიათ მხოლოდ დაპყრობილი ქალაქების ძარცვა და ნგრევა.

დამატებები[რედაქტირება | წყაროს რედაქტირება]

გამოშვებიდან ერთ კვირაში თამაშს დაემატა DLC „Chaos Warriors“ (ქაოსის მეომრები), რომელმაც კამპანიისთვის ხელმისაწვდომი გახადა ხსენებული ფრაქცია.

30 ივნისს გამოვიდა კოსმეტიკური „Blood for Blood God“[3] (სისხლი სისხლის ღმერთს), რომელმაც დაამატა სისხლიანი ეფექტები და იერიშის ბონუსი ბრძოლის დროს.

28 ივლისს გამოვიდა „Call of Beastmen“[4] (მხეცხალხის ძახილი) ახალი მხეცხალხის ფრაქციით და მინიკამპანიით „An Eye for an Eye“ (თვალი თვალის წილ). მინიკამპანიაში მოქმედება მიმდინარეობს მიდენლანდის სამთავროში, სიუჟეტი ბრუნავს ხაზრაკ ცალთვალასა და ბორის ტოდბრინგერის მტრობაზე.

ოქტომბრის დასაწყისში გამოვიდა „The Grim and the Grave“[5] (პირქუში და შემზარავი) იმპერიისთვის და ვამპირებისთვის, რომელმაც დაამატა ახალი საომარი რაზმები (ფლაგელანტები და სახალხო მილიცია იმპერიისთვის, გვამების ურემი და მიცვალებულთა ეტლი ვამპირებისთვის) ელიტური დაქირავებული რაზმები, ახალი ლორდების ტიპები (მთავარლექტორი იმპერიისთვის, სტრიგოი მეფე ვამპირებისთვის) და ორი უნიკალური ლორდი (ფოლკმარ პირქუში და ჰელმან გორსტი. ვლად ფონ კარშტაინი რამდენიმე დღით ადრე გახდა ხელმისაწვდომი, ამიტომაც დამატების ნაწილად არ ითვლება). „The Grim and the Grave“ ასევე შემოიტანა ე.წ. „დიდების პოლკები“ იმპერიისთვისა და ვამპირებისთვის — უნიკალური და ძლიერი რაზმები, რომელთა დაქირავება შესაძლებელია ნებისმიერ ადგილას, საჭირო შენობების აშენების გარეშე.

20 ოქტომბერს, უფასო DLC-ის (სახელად „Wurrzag“ (ვურზაგი)) შემდეგ, რომელმაც დაამატა სისხლხელიანების ფრაქცია, გამოვიდა „The King and the Warlord“[6] (მეფე და სარდალი), რომელმაც ხელმისაწვდომი გახადა ორი ფრაქცია: მწვანეკანიანების ტომი დაბრეცილი მთვარე (ლეგენდარული ლორდი სკარსნიკი) და ჯუჯათა კლანი ანგრუნდი (ლეგენდარული ლორდი ბელეგარ რკინის ურო). კამპანიაში ამ ფრაქციების ძირითად მიზანს წარმოადგენს არა მხოლოდ გაფართოება, არამედ კარაკ რვა მწვერვალის (რომელიც ასევე ცნობილია როგორც სვეტების ქალაქი) დაკავება — ამ მდიდარი მიწისქვეშა გრანდიოზული ქალაქის დასაუფლებად ჯუჯებს მრავალი მტერი ებრძოდა, მათ შორის მწვანეკანიანები და სკავენები. კამპანიაში ბელეგარი წინ უნდა წაუძღვეს თავის კლანს და დაიბრუნოს მშობლიური სამეფო, ხოლო სკარსნიკის მიზანი ოდნავ განსხვავებულია — ოდესღაც ჯუჯები სწორედ მან გაყარა კარაკ რვა მწვერვალიდან, მაგრამ მისი არყოფნის განმავლობაში იქ განთავსებული დაბრეცილი მთვარის ტომი აჯანყდა, მის მიზანს წარმოადგენს აჯანყებულების განადგურება და სვეტების ქალაქზე კონტროლის აღდგენა.

22 ოქტომბერს გამოვიდა უფასო „Grombrindal The White Dwarf“ (თეთრი ჯუჯა გრომბრინდალი), რომელმაც დაამატა ჯუჯების მესამე ლეგენდარული ლორდი.

8 დეკემბერს გამოვიდა „Realm of the Wood Elves“[7] (ტყის ელფების სამფლობელო), რომელმაც დაამატა ტყის ელფების ფრაქცია, მათი დასახლებები სტრატეგიულ რუკაზე და ფრაქციის უნიკალური ლოკაცია — საუკუნეთა მუხა. ასევე დაემატა მინიკამპანია „Season of Revelation“ (გაცხადების დრო), სადაც მოქმედება მიმდინარეობს ათელ ლორენის რეგიონში, სიუჟეტის მიხედვით მოთამაშემ ტყის ელფების (ლეგენდარული ლორდი — ორიონი) ან არგუილონის (ლეგენდარული ლორდი — დურთუ) მართვით უნდა გაერთიანოს მეზობელი ფრაქციები და შეაჩეროს ჯადოსნური ტყის დაუძინებელი მტერი — მორღურ ჩრდილგამცემი.

იმავდროულად გამოვიდა ორი უფასო დამატება: „Jade Wizard“ (ზურმუხტის ჯადოქარი) და „Grey Wizard“ (რუხი ჯადოქარი), რომლებმაც შემოიტანეს ორი ახალი აგენტი იმპერიისთვის.

2017 წლის 28 თებერვალს გამოვიდა უფასო „Bretonnia“[8] (ბრეტონია), რომელმაც თამაშისთვის ხელმისაწვდომი გახადა ბრეტონიის ფრაქციები. იმავდროულად გამოვიდა კიდევ ერთი უფასო კონტენტი, რომელმაც ჩაანაცვლა ვამპირთა ფრაქცია შვარცჰაფენი თამაშისთვის ხელმისაწვდომი ფონ კარშტაინების კლანით (ლეგენდარული ლორდები — ვლად და იზაბელა ფონ კარშტაინები). ვლად ფონ კარშტაინი ვამპირი გრაფების ძირითადი ფრაქციიდან გადავიდა ფონ კარშტაინების ფრაქციაში.

10 აგვისტოს გამოვიდა „Norsca“[9] (ნორსკა), რომელმაც გაამრავალფეროვნა ჩრდილოეთის ბარბაროსების ფრაქციები და თამაშისთვის ხელმისაწვდომი გახადა ორი მათგანი.

მიმოხილვა[რედაქტირება | წყაროს რედაქტირება]

 შეფასება
საერთო შეფასება
აგრეგატორი შეფასება
Metacritic 86/100[10]
ქულები
წყარო რეიტინგი
GameSpot 9/10[11]
GamesRadar 4.5/5 stars[12]
IGN 8.6/10[13]

თამაშმა მიიღო დადებითი შეფასებები ვიდეო თამაშების მიმოხილველებისგან. საერთო განხილვების საიტ Metacritic-ზე ფლობს 86/100.[14] ასევე წარმატებული აღმოჩნდა კომერციულადაც. ის იქცა ყველაზე სწრაფად გაყიდვად თამაშად სერიიდან. გამოსვლიდან რამდენიმე დღეში გაიყიდა ნახევარი მილიონი ასლის ოდენობით.[15]

რესურსები ინტერნეტში[რედაქტირება | წყაროს რედაქტირება]

სქოლიო[რედაქტირება | წყაროს რედაქტირება]