ნატალია ჟუკოვა

მასალა ვიკიპედიიდან — თავისუფალი ენციკლოპედია
ნავიგაციაზე გადასვლა ძიებაზე გადასვლა
ნატალია ჟუკოვა
Zhukova Natalia (30148036255) (cropped).jpg
ნატალია ჟუკოვა 2016 წელი
სახელი ნატალია ჟუკოვა
ქვეყანა (სპორტი) უკრაინის დროშა უკრაინა
ეროვნება უკრაინელი
დაბადების თარიღი 5 მაისი, 1979 (1979-05-05) (42 წლის)
დაბადების ადგილი დრეზდენი, გდრ.
წოდება დიდოსტატი (2010)
ფიდე რეიტინგი 2336 (თებერვალი 2021)[1]
მაქსიმალური რეიტინგი 2499 (მაისი 2010)
ჯილდოები და პრემიები Order of Princess Olga, 2nd class და Order of Princess Olga, 3rd class

ნატალია ჟუკოვა(უკრ. Наталія Олександрівна Жукова) დ. 5 მაისი, 1979, დრეზდენი,გდრ) - უკრაინელი მოჭადრაკე, დიდოსტატი (2010), ქალთა შორის მსოფლიოს ვიცე-ჩემპიონი ბლიცში (2012). უკრაინის ქალთა ნაკრების შემადგენლობაში მოიგო საჭადრაკო ოლიმპიადა, მსოფლიოს გუნდური და ევროპის ჩემპიონატები. ქალთა შორის ევროპის ინდივიდულური ორგზის ჩემპიონი (2000, 2015) და უკრაინის დამსახურებული სპორტსმენი.

ბიოგრაფია[რედაქტირება | წყაროს რედაქტირება]

ჟუკოვა დრეზდენში დაიბადა და ბავშვობა კაოვკაში გაატარა. მსოფლიოს ახალგაზრდულ ჩემპიონატზე დებიუტი 1991 წელს მამაიაში, 12 წლამდელ გოგონათა ჯგუფში ჰქონდა, სადაც 11 შესაძლებლობიდან 7,5 ქულა დააგროვა და მესამე-მეოთხე ადგილები გაინაწილა. 1993 წელს სომბატჰეი-ში ევროპის 14-წლამდელ გოგონებში იჩემპიონა 9-დან 7,5 ქულით. 1994 წელი ბარაქიანი გამოდგა მისთვის და 16 წლამდელ გოგონების პირველობებზე ორი ოქროს მედალი მოიგო, ჯერ ბეილე-ერკულანე-ში ევროპის პირველობაზე იყოჩაღა 7/9, შემდეგ სეგედში მსოფლიოზე 7/9. 1995 წელს 20 წლამდელ გოგონათა პირველობაზე ჰალეში 12-დან 9 ქულით ვერცლის მედალს დასჯერდა. 1995 წელს კიშინიოვში ქალთა მსოფლიოს ჩემპიონატზე საერთაშორისო ზონალურ ტურნირზე გამოვიდა, თუმც წარუმატებლად. იმავე წელს ქალთა შორის საერთაშორისო ოსტატის წოდება მიენიჭა. 1996 წელს უკრაინის ქალთა პირველობაზე პირველი ადგილი გაინაწილა და ეროვნულ ნაკრებშიც მიიწვიეს, სადაც ოლიმპიადაზე იასპარეზა. 1997 წელს ქალთა შორის დიდოსტატი გახდა. 1998 წელს ბელგრადის ქალთა ტურნირზე 9 შესაძლებლობიდან 6 ქულით პირველ-მეორე ადგილები გაინაწილა და გრონინგენის ქალთა ფესტივალი 7/10 მოიგო. 1999 წელს ევროპის საკლუბო ჩემპიონატზე ნოვა-გორიცაში „Rudenko School Kherson“-ის შემადგენლობაში პირველ ადგილზე გავიდა და თავის პოზიციაზე (პირველ დაფაზე) მცირე ოქროც მიიღო. იმავე წელს ალუშტაში ზონალურ ტურნირზე მეორე ადგილი დაიკავა. 2000 წელს ბათუმში ქალთა ევროპის ჩემპიონატზე ოქრო აიღო. ფინალში ეკატერინა კოვალენსკაია დაამარცხა 2,5:1,5. ევროპის ჩემპიონი მეორედ 2015-ში კვლავ საქართველოს ზღვისპირეთში ამჯერად ჩაქვში გახდა[2]. [3].

ნატალია ჟუკოვა, 2008 წელი, დრეზდენი,ქალთა საჭადრაკო ოლიმპიადა

ქალთა მსოფლიოს ჩემპინატი[რედაქტირება | წყაროს რედაქტირება]

1999[რედაქტირება | წყაროს რედაქტირება]

ქალთა მსოფლიოს ჩემპიონატზე დებიუტი 1995 წელს კიშინიოვში ჰქონდა. შესარჩევ, საერთაშორისო ზონალურ ტურნირზე 13-დან 6,5 ქულით 52 ქალში 31-ე იყო და კანდიდატთა ტურნირზე ვეღარ გადავიდა.

2000[რედაქტირება | წყაროს რედაქტირება]

ამ წელს ფიდემ ქალთა მსოფლიოს ჩემპიონატების წესი შეცვალა და ნიუ-დელიში 64 მოჭადრაკე ქალი ნოკაუტ-სისტემით დაუპირისპირა ერთმანეთს. ჟუკოვა მე-12 ნომრად იყო განთესილი და მეოთხედფინალამდე მივიდა. პირველ ეტაპზე ერიკა სზივას სძლია 1,5:0,5, მეორეში პოლონელ ჯოანა დვორაკოვსკას 2:0, მესამეში ჩინელ ქსუ იუჰუას 2,5:1,5 და მეოთხეში ასევე ჩინელ ქსუ ჟუნთან დამარცხდა 0,5:1,5.

2004[რედაქტირება | წყაროს რედაქტირება]

2004 წელს მეათე ნომერი იყო და ორი ეტაპი გადალახა. ჯერ მოლდოველი სვეტლანა პეტრენკო დაამარცხა 2,5:1,5, შემდეგ რუსი ნადეჟდა კოსინცევა 4:3, მესამეში კი მომავალ ჩემპიონ, ბულგარელ ანტოანეტა სტეფანოვასთან დამარცხდა 1:3.

2006[რედაქტირება | წყაროს რედაქტირება]

ეკატერინბურგში 24-ე ნომრად იყო განთესილი და მეორე ეტაპიდან გამოვარდა ჩინელ ჰოუ იფანთან 0:2. მანამდე ასევე ჩინელი შენ იანგი დაამარცხა 3,5:2,5.

2008[რედაქტირება | წყაროს რედაქტირება]

ნალჩიკში პირველივე ეტაპიდან გამოვარდა კატერინა როჰონიანთან 1,5:2,5. ჩემპიონატზე 21-ე ნომრად იყო განთესილი.

2010[რედაქტირება | წყაროს რედაქტირება]

პირველივე ეტაპზე დაასრულა ასპარეზობა ანთაქიაშიც. თურქეთში 35-ე ნომრად იყო განთესილი და მარინა რომანკოსთან დამარცდა 0,5:1,5.

2012[რედაქტირება | წყაროს რედაქტირება]

ხანტი-მანსიისკში 31-ე ნომრად იყო და მესამე ეტაპამდე მივიდა. პირველ მატჩში ჩინელ გუო ქის 1,5:0,5 სძლია, შემდეგ ინდუს ჰამპი კონერუს 2:0 და ჩინელ ჟუ ვენჟუნთან გამოვარდა 1,5:2,5.

2015[რედაქტირება | წყაროს რედაქტირება]

სოჭში 24-ე ნომერი იყო და პირველივე მატჩში თანამემამულე ინა გაპონენკოსთან შეწყვიტა ასპარეზობა 0,5:1,5.

2017[რედაქტირება | წყაროს რედაქტირება]

თეირანშიც პირველივე ეტაპიდან გამოვარდა. იგი 23-ე ნომერი იყო და ქართველ ნინო ხურციძესთან 0,5:1,5 დამარცხდა.

2018[რედაქტირება | წყაროს რედაქტირება]

ცუდ „ტრადიციას“ არც ამჯერად უღალატა და პირველივე ეტაპზე შეწყვიტა ასპარეზობა. იგი 37-ე ნომერი იყო და ჩინელ ნი შიქუნთან 2,5:3,5 წააგო.

უკრაინის ნაკრები[რედაქტირება | წყაროს რედაქტირება]

ქალთა ოლიმპიადა[რედაქტირება | წყაროს რედაქტირება]

ჟუკოვას უკრაინის ნაკრებში დებიუტი 1996 წელს, 17 წლისას ჰქონდა. ერევანში ქალთა ოლიმპიადაზე სათადარიგო დაფაზე გამოვიდა და მეოთხე ადგილს დასჯერდა. მას შემდეგ პირველ დაფაზე გადაჯდა და 2006 წლამდე ჯილდო არ მოუპოვებია. 2006 წელს ტურინში უკრაინის ნაკრები საუკეთესო იყო და გუნდური ოქრო მოიგეს, ჟუკოვა კი ინდივიდუალურში მეოთხე იყო. 2008 წელს მეორე დაფაზე ითამაშა და ნაკრებთან ერთად ვერცხლი მოიგო. ინდივიდუალურადაც არ უთამაშია ურიგოდ და მცირე ვერცხლით დააჯილდოვეს. გუნდური ბრინჯაო მოიგო მესამე დაფაზე 2010-ში სტამბულში. 2012 წელს ტრომსოში კვლავ ბრინჯაო დაისაკუთრა, თვითონ კი მეოთხე დაფაზე ოქრო აიღო. კვლავ გუნდური ბრინჯაო აიღო 2016-ში ბაქოში, ხოლო 2018-ში ბათუმში ვერცხლი.

მსოფლიოს გუნდური ჩემპიონატი[რედაქტირება | წყაროს რედაქტირება]

2009 წელს ნინგბოში ნაკრები ბრინჯაოს შესწვდა, ჟუკოვა კი მეორე დაფაზე გამოვიდა. სამაგიეროდ 2013-ში ჩემპიონები გახდნენ ასტანაში, სადაც ნატალია მეოთხე დაფაზე თამაშობდა და ინდივიდუალურ ოქროსაც დაეუფლა.

ევროპის გუნდური ჩემპიონატი[რედაქტირება | წყაროს რედაქტირება]

ევროპის გუნდურ ჩემპიონატზე 1999 წლიდან გამოდის, 10 გათამაშებაში მიიღო მონაწილეობა და ოთხი გუნდური მედალი მოიპოვა. 2009-ში ნოვო-სადში და 2017-ში კრეტაზე ბრინჯაო აიღო, 2013-ში ვარშავაში ოქრო, ხოლო 2015-ში რეიკიავიკში ვერცხლი. ინდივიდუალურადაც ყოჩაღობდა ნატალია, 2003-ში პირველ დაფაზე მცირე ოქრო დაისაკუთრა, 2015-ში მესამე დაფაზე და 2017-ში მეორე დაფაზე კი ვერცხლები.

ოჯახი[რედაქტირება | წყაროს რედაქტირება]

ჟუკოვა დრეზდენში დაიბადა და ოდესაში ცხოვრობს. გათხოვილი იყო რუს დიდოსტატ ალეკსანდრ გრიშჩუკზე, რომელთანაც 2007 წელს გოგონა შეეძინა. წყვილი განქორწინებულია.

პოლიტიკური მოღვაწეობა[რედაქტირება | წყაროს რედაქტირება]

2019 წელს უკრაინის საპარლამენტო არჩევნებში პარტია „ახალ ძალთა მოძრაობა“-ში მეექვსე ნომერი იყო, თუმც პარტიამ ბარიერი ვერ გადალახა და რადაში ვერ მოხვდნენ[4]. 2020 წლის ოქტომბერში ადგილობრივ არჩევნებში მოსინჯა ძალები. პარტიაში „ხალხის მსახური“ მეოთხე ნომერი იყო და ოდესის საკრებულოში მოხვდა[5].

სქოლიო[რედაქტირება | წყაროს რედაქტირება]

  1. [1]. February 2021.
  2. [2]. Украинка Наталья Жукова во второй раз в карьере стала чемпионкой Европы по шахматам.
  3. [3]. 16th European Individual Women's Chess Championship.
  4. [4]. CEC counts 100 percent of vote in Ukraine's parliamentary elections.
  5. [5]. "Слуги народу" висунули Степанова першим у списку в Одеську облраду.

რესურსები ინტერნეტში[რედაქტირება | წყაროს რედაქტირება]