ჯონი რეპი

ჯონი რეპი
	ჯონი რეპი 1974 წელს
პირადი მონაცემები
სრული ; სახელი	ჯონ ნიკოლას რეპი
დაბადების ; თარიღი	25 ნოემბერი, 1951 (73 წლის)
დაბადების ; ადგილი	ზაანდამი, ნიდერლანდები
სიმაღლე	182 სმ
სათამაშო ; პოზიცია	მარჯვენა გარემარბი
ახალგაზრდული კარიერა
	აიაქსი
პროფესიონალური კარიერა*
ეროვნული ნაკრები
სამწვრთნელო კარიერა
1994–2001	ომნივორლდი
	* პროფესიონალურ კლუბებში გამოსვლა და გოლები მხოლოდ ეროვნული ლიგებისთვის იანგარიშება;

ჯონ ნიკოლას რეპი (ნიდერლ. John Nicholaas Rep; დ. 25 ნოემბერი, 1951, ზაანდამი, ნიდერლანდები) — ნიდერლანდელი ფეხბურთელი, თავდამსხმელი. ფეხბურთის გულშემატკივრებში უფრო ცნობილია როგორც ჯონი რეპი. 1974 და 1978 წლების მსოფლიოს ვიცე-ჩემპიონი ნიდერლანდების ეროვნული ნაკრების შემადგენლობაში. სათამაშო კარიერის დასრულების შემდეგ მუშაობდა საფეხბურთო მწვრთნელად.

საკლუბო კარიერა

საკლუბო დონეზე სხვადასხვა დროს იცავდა ნიდერლანდური, ესპანური და ფრანგული საფეხბურთო კლუბების: ამსტერდამის „აიაქსის“, „ვალენსიას“, „ბასტიას“, „სენტ-ეტიენის“ „პეკ ზვოლეს“, „ფეიენოორდისა“ და „ჰაარლემის“ ღირსებას. მისი ძლიერი მხარეები იყო სიჩქარე, ბურთის კონტროლი და მოედანზე სწორი პოზიციის შერჩევა.

აიაქსი

1971–1975 წლებში ჯონი რეპი იყო ამსტერდამის „აიაქსის“ ახალგაზრდა ვარსკვლავი. ამ პერიოდში „აიაქსი“ ტოტალური ფეხბურთის ფლაგმანი იყო და ევროპის ერთ-ერთ საუკეთესო კლუბად ითვლებოდა. რეპმა „აიაქსში“ ორჯერ მოიპოვა ევროპის ჩემპიონთა თასი (1971–72, 1972–73). თავი დაიმკვიდრა, როგორც გუნდის ერთ-ერთმა გამორჩეულმა მოთამაშემ, რომელიც იოჰან კრუიფთან და იოჰან ნეესკენსთან ერთად იმ პერიოდის ერთ-ერთ საუკეთესო შემტევ ტრიოს ქმნიდა. რეპმა „აიაქსში“ ჩატარებულ 97 მატჩში 41 გოლი გაიტანა.

ვალენსია

„აიაქსის“ შემდეგ ჯონი რეპმა ესპანეთში გადაინაცვლა და „ვალენსიას“ შეუერთდა. თუმცა მისი ესპანური კარიერა შედარებით ხანმოკლე და ნაკლებად წარმატებული გამოდგა.

ბასტია

„ვალენსიასთან“ განშორების შემდეგ რეპმა კარიერა საფრანგეთში, კერძოდ „ბასტიას“ რიგებში განაგრძო. ფრანგულ კლუბში მას მნიშვნელოვანი როლი ჰქონდა, განსაკუთრებით ევროპულ ასპარეზზე, სადაც გუნდმა 1978 წლის უეფა-ს თასის გათამაშების ფინალამდე მიაღწია.

სენტ-ეტიენი

იმ პერიოდის საფრანგეთის ტოპ-კლუბში გადასვლა მისი კარიერის ერთ-ერთი მნიშვნელოვანი ეტაპი იყო. „სენტ-ეტიენში“ მას მიშელ პლატინისთან ერთად მოუწია თამაში. რეპი კლუბს 1980–81 წლების სეზონში ლიგა 1-ის ტიტულის მოპოვებაში დაეხმარა.

ფეიენორდი

კარიერის დასასრულს რეპი ნიდერლანდებში დაბრუნდა და „ფეიენორდის“ რიგებში განაგრძო თამაში. მის საკლუბო კარიერაში ეს იყო ბოლო დიდი კლუბი, სადაც ის გამოდიოდა.

სანაკრებო კარიერა

1973–1981 წლებში ნიდერლანდების ეროვნული ნაკრების ღირსებას იცავს, რომლის შემადგენლობაში 42 შეხვედრას ატარებს და 12 ბურთი გააქვს.^[1] ეროვნული ნაკრების შემადგენლობაში მონაწილეობდა 1974 და 1978 წლის მსოფლიო ჩემპიონატებში, სადაც ორივეჯერ შეძლო ფინალში გასვლა, თუმცა ორივეჯერ დამარცხდა — პირველად გფრ-სთან 1974 წელს და მეორედ არგენტინასთან 1978 წელს .

სტატისტიკა

ნიდერლანდები
წელი	მატჩი	გოლი
1973	3	1
1974	12	4
1976	3	1
1977	4	2
1978	9	3
1979	3	0
1980	3	1
1981	5	0
ჯამში	42	12

მსოფლიო ჩემპიონატებზე

ჯონი რეპმა მსოფლიო ჩემპიონატების 14 შეხვედრაში მიიღო მონაწილეობა და 7 ბურთი გაიტანა.^[2]

^{ჩემპ.}	^{მასპინძელი}	^№	^{პოზიცია}	^შ	^ბ	^მ	^ფ	^წ	^{შედეგი}
1974	გერმანია	16	თავდამსხმელი	7	4	5	1	1	ვიცე-ჩემპიონი
1978	არგენტინა	16	თავდამსხმელი	7	3	3	2	2	ვიცე-ჩემპიონი

თამაშის სტილი

ჯონი რეპი სწრაფი და მობილური მოთამაშე იყო, რომელიც ფლანგებზე შესანიშნავად თამაშობდა. ჰქონდა განსაკუთრებული დარტყმის უნარი და ხშირად გაჰქონდა შორეული დარტყმებით გოლები. რეპი იყო ნიდერლანდური ტოტალური ფეხბურთის სრულფასოვანი მონაწილე და ერთ-ერთი შემოქმედი — ხშირად იცვლიდა პოზიციებს, მონაწილეობდა დაცვაში და კომბინაციურ თამაშში. მის ანგარიშზეა არაერთი გადამწყვეტი გოლი. ნიდერლანდური ფეხბურთის ისტორიაში ჯონი რეპი დარჩა, როგორც თავისი თაობის ერთ-ერთი საუკეთესო მოთამაშე, რომელიც არა მხოლოდ შედეგზე, არამედ ესთეტიკურ სილამაზეზეც იყო ორიენტირებული. ის იყო ფეხბურთელი, რომელიც ყოველთვის გაოცებას იწვევდა გულშემატკივრებში თავისი გამორჩეული საფეხბურთო უნარებითა და გამბედაობით.^[3]