ჯიმ კერი

ჯიმ კერი
ჯიმ კერი
	; ჯიმ კერი 2008 წელს
დაბადების სახელი	ჯეიმზ იუჯინ კერი
დაბადების თარიღი	17 იანვარი, 1962 (62 წლის); ნიუმარკეტი, ტორონტო, პროვინცია, კანადა
აქტიური	1979-დღემდე
მეუღლე(ები)	მელისა უომერი (1987-1995); ლორენ ჰოლი (1996-1997) ჯენი მაკარტი (2005-2010)
ოქროს გლობუსი	საუკეთესო მსახიობი კაცი დრამაში; 1998 — ტრუმენის შოუ; საუკეთესო მსახიობი კაცი მიუზიკლსა ან კომედიაში; 1999 — ადამიანი მთვარეზე
საიტი	JimCarrey.com

ჯეიმზ იუჯინ „ჯიმ“ კერი (ინგლ. Jim Carrey; დ. 17 იანვარი, 1962) — ორგზის ოქროს გლობუსის მფლობელი კანადელ-ამერიკელი მსახიობი და კომიკოსი. ჯიმ კერი ცნობილი გახდა ფილმებით: „ეის ვენტურა - ცხოველების დეტექტივი“ (1994) და „ეის ვენტურა - როდესაც ბუნება გიხმობს“ (1995), ასევე ფილმებით „ნიღაბი“ (1994), „მეკაბელე“ (1996) და „მატყუარა, მატყუარა“ (1997). 1998 და 1999 ჯიმ კერიმ მიიღო ოქროს გლობუსი ფილმებისთვის „ტრუმენის შოუ“ (1998) და „ადამიანი მთვარეზე“ (1999). წარმატებით სარგებლობდა კერის შემდგომი ფილმებიც, ისეთები როგორიცაა „ყოვლისშემძლე ბრიუსი“ (2003), „დიკის და ჯეინის გართობა“ (2005) და „ყოველთვის თქვი დიახ“ (2008).

ბიოგრაფია

ადრეული ცხოვრება

ჯიმ კერი კანადის ქალაქ ნიუმარკეტში, ონტარიოს პროვინციაში დაიბადა. მისი მშობლები იყვნენ დიასახლისი კეტლინ კერი და მუსიკოსი და ბუღალტერი პერსი კერი. ჯიმს ჰყავს სამი უფროსი და-ძმა: ჯონი, პატრიცია და რიტა. მისი მშობლები რელიგიური აღმსარებლობით კათოლიკეები იყვნენ. დედამისი შოტლანდიელთა შთამომავალი იყო, მამა კი ფრანგი კანადელი. ჯიმი 14 წლის იყო, როდესაც მისი ოჯახი შტატ ონტარიოს ქალაქ სკარბოროში გადავიდა საცხოვრებლად. ერთი წლის შემდეგ ჯიმი სასწავლებლად გადავიდა ქალაქ ბერლინგტონში და იქ 8 წლის განმავლობაში ცხოვრობდა და სწავლობდა ელდერშოთის უნივერსტეტში.

ტელევიზია

1979 წელს კერიმ დაიწყო მონაწილეობა ტორონტოს იუკი-იუკის კომედიურ შოუში, ერთი წლის შემდეგ კი გახდა ამ შოუს წამყვანი. 1981 წელს ჯიმი გადავიდა ლოს-ანჯელესში და დაიწყო მუშაობა კომედი სთორში. სწორედ ამის შემდეგ მიაქციეს ყურადღება ჯიმ კერის ტელევიზიებმა და 1981 წელს ის შეუერთდა NBC-ის პოპულარული შოუს შაბათ ღამეს პირდაპირ ეთერში სცენარისტთა ჯგუფს. 1983 წლამდე იგი ასრულებდა ეპიზოდურ როლებს სხვადასხვა ფილმებში.

კინო

ჯიმმა პირველი დიდი როლი მიიღო ფილმში „კუპერის მთები“. 90-იან წლებამდე მან მონაწილეობა მიიღო რამდენიმე ნაკლებად ცნობილ ფილმში. პირველი დიდი წარმატება კი კერის მოუტანა ფილმმა „ეის ვენტურა-ცხოველების დეტექტივი“. მიუხედავად კრიტიკოსთა მხრიდან ფილმის დაბალი შეფასებისა, ჯიმ კერი მალე იქცა ერთ-ერთ ყველაზე პოპულარულ ახალგახრდა მსახიობად. იმავე წელს გამოვიდა ფილმები „ნიღაბი“ და „ჩლუნგი და უფრო ჩლუნგი“, რომლებმაც კიდევ უფრო გაზარდა კერის პოპულარობა. კრიტიკოსებმა დაიწუნეს კერის მომდევნო ფილმი „მეკაბელე“, თუმცა მან მალევე მოახდინა რეაბილიტაცია ფილმით „მატყუარა, მატყუარა“. ჯიმს კრიტიკოსთა აღიარება მოუტანა ფილმებმა „ტრუმენის შოუ“ და „ადამიანი მთვარეზე“. „ტრუმენის შოუმ“ მიიღო ოსკარის სამი ნომინაცია, თავად ჯიმ კერიმ კი ამ ფილმისთვის ოქროს გლობუსი მიიღო. 1999 წელს მან შეასრულა კომიკოს ენდი კაუფმანის როლი ფილმში „ადამიანი მთვარეზე“. მიუხედავად კრიტიკოსთა მაღალი შეფასებისა ფილმი არ იყო ნომინირებული ოსკარზე, სამაგიეროდ ჯიმ კერიმ ზედიზედ მეორედ მიიღო ოქროს გლობუსი მამაკაცის საუკეთესო როლის შესრულებისთვის. 2003 წელს ჯიმმა მთავარი როლი შეასრულა ფილმში „ყოვლისშემძლე ბრიუსი“, რომლის მოგებამაც 485 მილიონი დოლარი შეადგინა და ამ მაჩვენებლით გახდა მეორე ყველაზე მომგებიანი კომედია. მან შეასრულა მთავარი როლი ფილმში „ყოველთვის თქვი დიახ“, ასევე აახმოვანა მთავარი პერსონაჟი ჰორტონი ანიმაციურ ფილმში „ჰორტონს ესმის“ (2008) და რამდენიმე სხვადასხვა პერსონაჟი, მათ შორის მთავარი გმირი სკრუჯი ანიმაციურ ფილმში „საშობაო ისტორია“ (2009). მიუხედავად იმისა რომ ჯიმი ცნობილია თავისი კომიკური როლებით მას ნათამაშები აქვს რამდენიმე სერიოზულ ფილმში, მათ შორისაა ფილმები „მაჯესტიკი“ (2001), „ბრწყინვალე გონების მუდმივი ნათება“ (2004), რომელსაც კრიტიკოსებმა მაღალი შეფასება მისწეს და ტრილერი „რიცხვი 23“ (2007).

ფილმოგრაფია

წელი		ქართულად	მშობლიური სახელწოდება	როლი
1983	ფ	სექსი და ძალადობა ოჯახში	The Sex and Violence Family Hour	სხვადასხვა როლები
1983	ფ	კუპერის მთები	Copper Mountain	ბობი ტოდი
1983	ფ	ყველაფერი გემრიელად	All in Good Taste	რალფ პარკერი
1984	ფ	მაძებრები და მცველები	Finders Keepers	ლეინ ბიდლეკოვი
1985	ფ	ერთხელ დაჭერილი	Once Bitten	მარკ კენდალი
1986	ფ	პეგი სიუ ქორწინდება	Peggy Sue Got Married	უოლტერ გეტსი
1988	ფ	მკვდარი აუზი	The Dead Pool	ჯონი სქუარსი
1989	ფ	დედამიწელ გოგონებს ხელში იოლად ჩაიგდებ	Earth Girls Are Easy	ვიპლოკი
1989	ფ	ვადისფერი კადილაკი	Pink Cadillac	კომიკოსი
1991	ფ	მაღალი ძაბვა	High Strung	სიკვდილი
1994	ფ	ეის ვენტურა-ცხოველების დეტექტივი	Ace Ventura: Pet Detective	ეის ვენტურა
1994	ფ	ნიღაბი	The Mask	სტენლი იპკისი/ნიღაბი
1994	ფ	ჩლუნგი და უფრო ჩლუნგი	Dumb and Dumber	ლოიდ ქრისტმასი
1995	ფ	ბეტმენი სამუდამოდ	Batman Forever	რიდლერი/ედუარდ ნიგმა
1995	ფ	ეის ვენტურა-როდესაც ბუნება გიხმობს	Ace Ventura: When Nature Calls	ეის ვენტურა
1996	ფ	მეკაბელე	The Cable Guy	ერნი "ჩიპ" დაგლასი
1997	ფ	მატყუარა, მატყუარა	Liar Liar	ფლეტჩერ რიდი
1998	ფ	ტრუმენის შოუ	The Truman Show	ტრუმენ ბერბანკი
1998	ფ	საიმონ ბირჩი	Simon Birch	ჯო უენთუორსი
1999	ფ	ადამიანი მთვარეზე	Man on the Moon	ენდი კაუფმანი
2000	ფ	მე, ისევ მე და ირენი	Me, Myself & Irene	ჩარლი ბეილიგეიტსი/ჰენკი
2000	ფ	როგორ მოიპარა გრინჩმა შობა	Dr. Seuss' How the Grinch Stole Christmas	გრინჩი
2001	ფ	მაჯესტიკი	The Majestic	პიტერ ეიფლეტონი
2003	ფ	ყოვლისშემძლე ბრიუსი	Bruce Almighty	ბრიუს ნოლანი
2004	ფ	ბრწყინვალე გონების მუდმივი ნათება	Eternal Sunshine of the Spotless Mind	ჯოელ ბერიში
2004	ფ	ლემონი სნიკეტი: 33 უიღბლობა	Lemony Snicket's A Series of Unfortunate Events	ოლაფი
2005	ფ	დიკის და ჯეინის გართობა	Fun with Dick and Jane	დიკ ჰარპერი
2007	ფ	რიცხვი 23	The Number 23	უოლტერ სფეროუ
2008	ანფ	ჰორტონს ესმის	Horton Hears a Who!	ჰორტონი
2008	ფ	ყოველთვის თქვი დიახ	Yes Man	კარლ ალენი
2009	ანფ	საშობაო ისტორია	A Christmas Carol	ებენეზერ სკრუჯი
2009	ფ	მე შენ მიყვარხარ ფილიპ მორის	I Love You Phillip Morris	სტივენ ჯეი რასელი
2011	ფ	მისტერ პოპერის პინგვინები	Mr. Popper's Penguins	ტომ პოპერი
2013	ფ	არაჩვეულებრივი ბარტ ვანდერსტოუნი	The Incredible Burt Wonderstone	ტომ პოპერი
2013	ფ	გაინძერი 2	Kick-Ass 2	სტივ გრეი
2013	ფ	ტელეწამყვანი 2: ლეგენდის გაგრძელება	Anchorman 2: The Legend Continues	სკოტ რაილზი
2014	ფ	ჩლუნგი და უფრო ჩლუნგი 2	Dumb and Dumber To	ლოიდ ქრისტმასი

პირადი და ოჯახური ცხოვრება

ჯიმ კერი არის მეტალ-ჯგუფ კანიბალ კორპსის ფანი. 2004 წელს კერიმ მიიღო ამერიკის შეერთებული შტატების მოქალაქეობა და ამჟამად ორმაგი მოქალაქეობა აქვს. 1990 წლიდან მისი ოჯახი გახდა პრესბიტერიანიზმის აღმსარებელი. ცნობილია რომ ჯიმს არ უყვარს ამა თუ იმ ფილმების გაგრძელებებში თამაში, რადგან მიაჩნია რომ როლს უკეთ ვეღარ შეასრულებს. ერთადერთი ფილმი რომლის გაგრძელებაშიც კერიმ ითამაშა „ეის ვენტურაა“. ხოლო ფილმების „ნიღაბის“ და „ყოვლისშემძლე ბრიუსის“ გაგრძელებებში მონაწილეობაზე მან უარი განაცხადა.

ჯიმ კერის პირველი მეუღლე იყო კომედი სთორის ოფიციანტი მელისა უომერი. ისინი 1987 წელს დაქორწინდნენ და იმავე წელს ეყოლათ შვილი, ჯეინ ერინი კერი. ჯიმი და მელისა ერთმანეთს 1995 წელს ოფიციალურად დაშორდნენ, რისი მიზეზიც გახდა კერის რომანტიკული ურთიერთობა მსახიობ ლორენ ჰოლთან. ჯიმმა ლორენი „ჩლუნგი და უფრო ჩლუნგის“ გადაღებებისას გაიცნო. ისინი 1996 წელს დაქორწინდნენ. თუმცა ამ ქორწინებამ ერთ წელსაც ვერ გასტანა. მალევე ჯიმმა დაიწყო შეხვედრა „მე, ისევ მე და ირენში“ თანაპარტნიორ რენე ზელვეგერთან. თუმცა მათი ურთიერთობა 2000 წელს დასრულდა. 2005 წლიდან ჯიმი ხვდებოდა მოდელ ჯენი მაკარტის. 2010 წელს წყვილმა ოფიციალურად განაცხადა დაშორების შესახებ.

რესურსები ინტერნეტში