ვილიანდი (ესტ.Viljandi) — ქალაქი ესტონეთში. მდებარეობს ქვეყნის სამხრეთ ნაწილში, ვილიანდის ტბის ნაპირზე, ტალინიდან 161 კმ-ში. ვილიანდიმაას მაზრის ადმინისტრაციული ცენტრი. 1283 წელს მიიღო ქალაქის სტატუსი. მოსახლეობის რაოდენობის მიხედვით (17 868 კაცი; 2012 წ.) არის ესტონეთის მეშვიდე ქალაქი.
დაარსდა XIII საუკუნეში, როგორც ტევტონთა ერთ-ერთი რეზიდენცია ესტონეთში. ცნობილია ვილიანდის ციხესიმაგრე, რომელიც თავის დროზე ერთ-ერთი უძლიერესი იყო მთელ ჩრდილოეთ ევროპაში. უმოწყალოდ განადგურდა ჩრდილოეთის ომის დროს. დღეს ამ ციხიდან მხოლოდ ნანგრევებია შემორჩენილი. 1931 წელს ციხესიმაგრის წინ არსებულ თხრილზე ქვეითთა დაკიდებული ხიდი აიგო.
ნანგრევების გვერდით XV საუკუნის წმ. იოანეს ეკლესია (იაანი კირიკ) მდებარეობს. თავდაპირველად იგი აშენდა როგორც ფრანცისკანული სააბატო, შემდეგ რამდენიმე ხანს წმ. პავლეს სახელს ატარებდა. ძველ ქალაქში შემორჩენილია რამდენიმე XVIII საუკუნის დროინდელი შენობა, ყოფილი აფთიაქის (1779–1780) ჩათვლით, რომელშიც დღეს ვილიანდის მუზეუმი მდებარეობს. ფუნქციონალური სტილის შესანიშნავი ნიმუშია 1931 წელს აგებული რატუშა. (არქ. ი. ფუკსი).
ქალაქის ჩრდილოეთით მდებარეობს ესტონეთის სიდიდით მეორე ტბა ვილიანდი, რომელიც სამრეწველო და ტურისტულ-რეკრეაციული მიზნებით გამოიყენება.