Innocence + Experience: Live in Paris (სტილიზებული, როგორც iNNOCENCE + eXPERIENCE: Live in Paris) — ირლანდიური როკ-ჯგუფ U2-ს 2016 წლის საკონცერტო ფილმი. გადაღებულია 2015 წლის 7 დეკემბერს, AccorHotels Arena-ზე (პარიზი, საფრანგეთი), ჯგუფის ტურნეს Innocence + Experience Tour უკანასკნელ დღეს. თავდაპირველად კონცერტი გადაიცა HBO-ს ეთერში, მოგვიანებით კი, შემდეგ წლის 10 ივნისს, გამოვიდა DVD, Blu-ray და ციფრულ ფორმატებში.
ვიდეოში ასახულია ჯგუფის კონცერტი, რომელიც გაიმართა 2015 წლის 13 ნოემბრის პარიზის ტერაქტებიდან თითქმის ერთი თვის შემდეგ. ტერაქტის პერიოდში ჯგუფს უკვე ჰქონდა ჩატარებული ოთხიდან ორი დაგეგმილი კონცერტი, ამიტომ შემდეგი ორი დროებით გადაიდო. 7 დეკემბრის კონცერტის დროს ჯგუფმა გამოხატა პატივისცემა დაღუპულების მიმართ. მას სცენაზე შეუერთდა Eagles of Death Metal, რომლის ბატაკლანის თეატრში გამართული კონცერტის დროს მომხდარ ტერაქტს ყველაზე მეტი ადამიანი შეეწირა.