რაფსი

რაფსი (Brassica napus, Brassica napus ssp. oleifera) — ერთწლოვანი საშემოდგომო და საგაზაფხულო მცენარე ჯვაროსანთა ოჯახისა. ველურად არ გვხვდება. მიღებულია საშემოდგომო ან საგაზაფხულო შალგისა და ბოსტნის კომბოსტოს შეჯვარებით. მისი სიმაღლე 50-150 სმ აღწევს, დატოტვილია. ქვედა ფოთოლი ყუნწიანია, ზედა — მჯდომარე, ყვავილედი — მტევანია, ყვავილი — წვრილი, ყვითელი, იშვიათად თეთრი, ნაყოფი — ჭოტი; თესლი მრგვალია და 40-50%-ზე მეტ ზეთს შეიცავს. მცენარე დაფარულია ცვილისებრი ნაფიფქით;

საშემოდგომო რაფსი უმთავრესად უკრაინის ტყე-ველის ზონაში მოჰყავთ, საგაზაფხულო — უკრაინის ტყე-ველის ზონის ჩრდილოეთ ნაწილში. საქართველოში ორივე ფორმა საშემოდგომო შუალედური საკვები კულტურის სახით გვხვდება. რაფსის ზეთს იყენებენ მარგარინისა და საპნის დასამზადებლად, მეტალურგიაში, ტყავისა და საფეიქრო მრეწველობაში. რაფსის კოპტონი, როდესაც მავნე გლიკოზოდებს მოაცილებენ, ცხოველთა მაღალკონცენტრირებული საკვებია.

ლიტერატურა

• ქართული საბჭოთა ენციკლოპედია, ტ. 8, გვ. 310, თბ., 1984 წელი.