ზოგიში

სოფელი
ზოგიში
ქვეყანა	საქართველო
მხარე	რაჭა-ლეჩხუმისა და ქვემო სვანეთის მხარერაჭა-ლეჩხუმისა და ქვემო სვანეთის მხარე
მუნიციპალიტეტი	ცაგერის მუნიციპალიტეტი
თემი	ალპანა
კოორდინატები	42°32′54″ ჩ. გ. 42°50′03″ ა. გ.
ცენტრის სიმაღლე	520 მ
მოსახლეობა	148 კაცი (2014)
ეროვნული შემადგენლობა	ქართველები 99,3 %
სასაათო სარტყელი	UTC+4
სატელეფონო კოდი	+995

ზოგიში — სოფელი დასავლეთ საქართველოში, ცაგერის მუნიციპალიტეტის ალპანის ადმინისტრაციულ ერთეულში (რაჭა-ლეჩხუმისა და ქვემო სვანეთის მხარე).

მდებარეობს მდ. რიონის მარცხენა მხარეს, ზღვის დონიდან 520 მ-ზე, ცაგერიდან 23 კმ-ში. მინიჭებული აქვს მაღალმთიანი დასახლების სტატუსი.

ზოგიში ისტორიული ლეჩხუმის ნაწილია. წყაროებში პირველად მოხსენიებულია ლაბეჭინის ოთხთავის მინაწერში (XIII საუკუნე). სოფლის ტერიტორიაზე, შემთხვევით აღმოჩენილია გვიანდელი ანტიკური ხანის ბრინჯაოს საკიდი, რომელიც ფრინველის გამოსახულებას წარმოადგენს; ქვის კვირისტავი; ზოომორფულ სახელურებიანი ქოთანი; ბრინჯაოს კოლხური ცული.

ზოგიშის სამხრეთით, მთის წვერზე, შემორჩენილია შუა საუკუნეების ციხის ნანგრევები. გადმოცემით, ციხე ახვლედიანებს ეკუთვნოდათ. ციხის გალავანი რელიეფს მიჰყვება. კედლის სიმაღლე ზოგან 5 მ-მდე აღწევს. ნაგებია უხეშად დამუშავებული სწორხაზოვნად და მტკიცედ ნაწყობი კლდის ქვითა და ბათქაშით. გალავნის შიგნით 2 კოშკის ნაკვალევი შეინიშნება. აქვეა საგანგებოდ მოწყობილი წყლის რეზერვუარი, რომელიც პერიოდულად თავისით ივსება. სოფლის ძველ სასაფლაოსთან, მცირე შემაღლებაზე, შუა საუკუნეების მარიობის ეკლესიის ნანგრევებია, მის ირგვლივ კი — გალავნის ნაშთები.

დემოგრაფია

2014 წლის აღწერის მონაცემებით სოფელში ცხოვრობს 148 ადამიანი.

აღწერის წელი	მოსახლეობა	კაცი	ქალი
2002	293	140	153
2014	148	74	74

ლიტერატურა

• სულავა ნ., ენციკლოპედია „საქართველო“, ტ. 3, თბ., 2014. — გვ. 373.

• ქართული საბჭოთა ენციკლოპედია, ტ. 4, თბ., 1979. — გვ. 525.