ჰერმიონ გრეინჯერი

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
ჰერმიონ ჯინ გრეინჯერი
ჰარი პოტერის სამყაროს პერსონაჟი
სქესი მდედრობითი
თმის ფერი წაბლისფერი
ფაკულტეტი გრიფინდორი
სისხლის სიწმინდე მაგლი
მხარე ფენიქსის ორდექნი, დამბლდორის არმია
პატრონუსი წავი
ბოგარტი პროფესორი მაკგონაგელი, რომელიც მას აუწყებს, რომ ყველა გამოცდა წარუმატებლად ჩააბარა
ჯადოსნური ჯოხი 12 დიუმი, ყურძნის ტოტი
პირველი გამოჩენა ჰარი პოტერი და ფილოსოფიური ქვა
ოჯახი მისტერ და მისის გრეინჯერები (სახელები უცნობია)
მეუღლე რონ უისლი
შვილები როუზი და ჰიუგო
მსახიობი ემა უოტსონი

ჰერმიონ ჯინ გრეინჯერი (ინგლ. Hermione Granger) — „ჰარი პოტერის“ სამყაროს ერთ-ერთი პერსონაჟი.

ბიოგრაფია[რედაქტირება]

ჰერმიონი დაიბადა 1979 წლის 19 სექტემბერს. 1991 წელს იგი ჩაირიცხა გრიფინდორის ფაკულტეტზე, ჰოგვორტსის მაგიისა და ჯადოსნობის სკოლაში.

1995-1997 წლებში ჰერმიონი გრიფინდორის ფაკულტეტის პრეფექტად იყო დანიშნული 1997-1998 წლებში (ეს პერიოდი აღწერილია წიგნში ჰარი პოტერი და სიკვდილის საჩუქრები) ჰერმიონი ჰარი პოტერს ჰორკრუქსების ძიებაში ეხმარებოდა, ამიტომ გამოტოვა მთლიანი სასწავლო წელი. თუმცა მან მაინც აანაზღაურა დანაკარგი და შემდეგ წელს დაბრუნდა სკოლაში.

თვისებები[რედაქტირება]

სწავლის პერიოდში ჰერმიონი გამოირჩეოდა სხვადასხვა სფეროში აქტიურობით. დააარსა შინაურ ელფთა დამოუკიდებლობის აღდგენის მოძრაობა (ედამ) და იყო დაბმლდორის არმიის თანადამფუძნებელი. იგი ასევე იცავდა სხვა ჩაგრულ არსებებს, მაგალითად, ჰაგრიდს ჰიპოგრიფ ბაკბიკის სასამართლო პროცესისთვის დასაცავ სიტყვას უწერდა.

ვოლდემორის საბოლოო დამხობის შემდეგ ჰერმიონმა მუშაობა დაიწყო მაგიის სამინისტროს ჯადოსნურ არსებათა აღრიცხვისა და კონტროლის დეპარტამენტში. მისი ძალისხმევით საგრძნობლად იქნა გაუმჯობესებული შინაური ელფებისა და სხვა მაგიური არსებების ცხოვრება. მოგვიანებით გრეინჯერი გადავიდა სამართლის დეპარტამენტში და მონაწილეობა მიიღო წმინდა სისხლის დასაცავი კანონპროექტების გაუქმებაში.

წიგნის მიხედვით მკითხველს შეუძლია დაასკვნას, რომ ჰერმიონი ნათელი მაგალითია წმინდა სისხლის მითიურობისა, ვინაიდან, მაგლად დაბადებულის მიუხედავად, იგი ავლენს ბევრ დადებით თვისებას. მას დახვეწილი ლოგიკური აზროვნება და გამჭრიახი გონება გააჩნია. დაინტერესებულია ბევრი სასარგებლო საკითხით, როგორიც არის ძველი რუნები და ნუმეროლოგია. მესამე კურსზე (ეს პერიოდი აღწერილია წიგნში ჰარი პოტერი და აზკაბანის ტყვე) ჰერმიონი, იმ მიზეზით, რომ ჰარის ეხმარება, ვერ ასწრებს ყველა გაკვეთილზე დასწრებას. ამიტომ პროფესორი მაკგონაგელი მას გადასცემს დროის მდევარს. მისი დახმარებით ჰერმიონი ესწრება ყველა გაკვეთილს, რომელთა ჩატარების დრო ერთმანეთს ემთხვევა.

ჰერმიონმა შესანიშნავად იცის მრავალი ჯადოსნური შელოცვა, რისი წყალობითაც რთულ სიტუაციებში არაერთხელ გადაურჩენია თავისი თავიც და მეგობრებიც. მეხუთე კურსზე (ეს პერიოდი აღწერილია წიგნში ჰარი პოტერი და ფენიქსის ორდენი) მას უკვე შეუძლია ფორმაცვალებადი ჯადოს გამოყენება, რაც მეშვიდე კურსზე ჩასაბარებელი კ.ა.ტ.ა.ს პირობას წარმოადგენს. თავისუფალ დროს ჰერმიონი ხოლმე უთმობს შინაური ელფებისათვის ქუდებისა და წინდების ქსოვას.

ჰორკრუქსების მოპოვება და განადგურება მეტწილად ჰერმიონის დაგეგმილი მუშაობის დამსახურებაა. მან მიიღო წინასწარ ზომები: გამოძახების შელოცვით მოიპოვა წიგნები ჰორკრუქსების შესახებ, რომელიც დამბლდორს არც თუ საიმედოდ ჰქონდა შენახული (ამ წიგნებშივე იყო მოცემული ინფორმაცია, თუ როგორ უნდა განადგურდეს ჰორკრუქსი); მოიმარაგა და პატარა ხელჩანთაში ჩაატია ყველაფერი, რაც მოგვიანებით ხეტიალის დროს გამოადგებოდა სამეულს. ამ ნივთებს შორის იყო: კარავი, წამლები, ყურების დამაგრძელებლები, მრავალწვნიანი სასმელი, ტანსაცმელი და ჰარის სახელგანთქმული უჩინმაჩინის მოსასხამი.

პირადი ცხოვრება[რედაქტირება]

ოჯახი[რედაქტირება]

წიგნის სიუჯეტის მიხედვით, ჰერმიონი მაგლური წარმოშობისაა. მისი მშობლები არიან მისტერ და მისის გრეინჯერები (მათი სახელები უცნობია). ორივე მათგანი პროფესიით კბილის ექიმია.

მეშვიდე კურსზე ჰერმიონმა თავისი მშობლების უსაფრთხოებაზეც იზრუნა: შეუცვალა მათ მეხსიერება, ისე რომ დაავიწყა საკუთარი სახელი და ის ფაქტი, რომ შვილი ჰყავდათ და საცხოვრებლად ავსტრალიაში გაგზავნა. ასეთი ზომების მიღება მას დასჭირდა სიკვდილის მხვრელებისგან მათ თავდასაცავად.

ვოლდემორის სიკვდილის შემდეგ ჰერმიონამ მოძებნა მშობლები და მეხსიერება აღუდგინა.

ვიქტორ კრამი[რედაქტირება]

ჰერმიონის პირადი ცხოვრების შესახებ წიგნებიდან ძირითადად, ორი ფაქტია ცნობილი. თავდაპირველად, მეოთხე კურსზე (ეს პერიოდი აღწერილია წიგნში ჰარი პოტერი და ცეცხლოვანი თასი) მან მსოფლიო მასშტაბით სახელგანთქმულ, ქვიდიჩის ბრწყინვალე მოთამაშე ვიქტორ კრამს დაახვია თავბრუ.

რონ უისლი[რედაქტირება]

მიუხედავად იმისა, რომ სხვადასხვა დროს ჰერმიონს რონ უისლისთან დაძაბული ურთიერთობა ჰქონდა (განსაკუთრებით, მეექვსე კურსზე, როდესაც რონს ლავანდა ბრაუნი შეუყვარდა), მასთან ურთიერთობა საბოლოოდ ჰოგვორტსისათვის უკანასკნელი ბრძოლის წინ მოაგვარა. მანამდე ადგილი ჰქონდა ორმხრივ ეჭვიანობას: რონი ეჭვიანობდა ვიქტორ კრამზე, ჰერმიონი კი - ლავანდაზე. გაბრაზებულმა ჰერმიონმა ერთხელ, მათი ერთად დანახვისთანავე, რონს დაუშინა ავი ჩიტები, რის გამოც, ამ უკანასკნელს ხელებზე კარგა ხანს დარჩა ნაიარევები.

ჰორკრუქსების საძებნელად ხეტიალის დროს ჰერმიონს რონთან უსიამოვნო ფაქტი შეემთხვა. რონი წაეჩხუბა მეგობრებს და დატოვა ისინი. ჰერმიონა მის წასვლას ძალიან განიცდიდა. ის და ჰარი თითქმის არ ელაპარაკებოდნენ ერთმანეთს. მაგრამ, როდესაც რონი დაბრუნდა, ჰერმიონს მოულოდნელი რეაქცია ჰქონდა - იგი მივარდა და რონს მუშტებით ურტყამდა. რამდენიმე კვირის მანძილზე მას უისლისთან არც უსაუბრია.

როდესაც ჰოგვორტსისათვის ფინალური ბრძოლის წინ რონს გაახსენდა, რომ არ შეიძლებოდა დაუცველი შინაური ელფების ჰოგვორტსში დატოვება, აღფრთოვანებულმა ჰერმიონმა მას პირველად აკოცა.

წიგნის ჰარი პოტერი და სიკვდილის საჩუქრები ბოლოსიტყვაობის მიხედვით ირკვევა, რომ იგი ცოლად რონ უისლის გაჰყვა. მათ ორი შვილი, როუზი და ჰიუგო ეყოლათ.

რესურსები ინტერნეტში[რედაქტირება]