საერთაშორისო გეოგრაფიული კავშირი

საერთაშორისო გეოგრაფიული კავშირი (ინგლ. International Geographical Union; ფრანგ. Union Géographique Internationale; IGU) — მსოფლიოს გეოგრაფთა საერთაშორისო სამეცნიერო გაერთიანება. პირველი საერთაშორისო კონგრესი ჩატარდა 1871 წელს ქალაქ ანტვერპენში. თანამედროვე სახით ოფიციალურად დაარსდა 1922 წელს ბელგიის ქალაქ ბრიუსელში.^[1] ხელმძღვანელი ორგანოა — აღმასრულებელი კომიტეტი, რომელიც შედგება პრეზიდენტის, 8 ვიცე-პრეზიდენტის, გენერალური მდივნისა და ხაზინადარისგან. ადრეული წლებიდანვე გეოგრაფთა სამეცნიერო გაერთიანებამ გამოიმუშავა საერთაშორისო ორგანიზაციის სტრუქტურა, რომელიც დღემდე არსებობს.

დღეს, ისევე როგორც XIX საუკუნის მიწურულს, საერთაშორისო გეოგრაფიული კავშირის სტრუქტურა შეიცავს 3 ძირითად კომპონენტს: გენერალური ასამბლეა, რომელიც გვევლინება კავშირის უმაღლეს ორგანოდ და შედგება დელეგატებისაგან. გენერალური ასამბლეის სხდომა იმართება კონგრესის მსვლელობისას. აღმსასრულებელი კომიტეტი შედგება პრეზიდენტის, 8 ვიცე-პრეზიდენტის, გენერალური მდივნისა და ხაზინადარისგან. კომისიები და კვლევითი ჯგუფები მოქმედებენ მუდმივ საფუძველზე. საერთაშორისო გეოგრაფიული კავშირმა თავისი არსებობის მანძილზე მსოფლიოს სხვადასხვა ქვეყანაში ჩაატარა დაახლოებით 30-მდე საერთაშორისო კონგრესი, რომელიც თავის მხრივ, იმართება 4 წელიწადში ერთხელ.^[1]

საერთაშორისო გეოგრაფიული კავშირის მიზანია გეოგრაფიული კვლევის კოორდინაცია მსოფლიო მასშტაბით, გეოგრაფიული კვლევის შედეგების მოსმენა გეოგრაფიულ კონგრესებსა და რეგიონულ კონფერენციებზე და მათი პუბლიკაცია.^[2]

ამჟამად საერთაშორისო გეოგრაფიული კავშირი აერთიანებს გეოგრაფებს მსოფლიოს 87 ქვეყნიდან. კონგრესებს შორის მუშაობს 34 კომისია და 4 კვლევითი ჯგუფი, რომლებიც მოიცავენ გეოგრაფიის პრობლემების ფართო სპექტრს.^[1]

საერთაშორისო გეოგრაფიული კავშირის სამუშაო ენებია ინგლისური და ფრანგული. საერთაშორისო გეოგრაფიული კავშირის საქმიანობის შედეგები რეგულარულად ქვეყნდება ბიულეტენებში, რომელიც გამოიცემა 2 ენაზე წელიწადში რამდენიმეჯერ და აგრეთვე საერთაშორისო გეოგრაფიული კავშირის ოფიციალურ საიტზე.^[1]

აღსანიშნავია, რომ საერთაშორისო გეოგრაფიული კავშირის ვიცე-პრეზიდენტი 1972-1979 წლებში იყო ქართველი გეოგრაფი თეოფანე დავითაია.^[3]

პრეზიდენტები

**საერთაშორისო გეოგრაფიული კავშირის პრეზიდენტები**
რცხ.	წლები	პრეზიდენტი
1	1922 – 1924	პრინცი ბონაპარტი
2	1924 – 1928	გენერალი ვაჩელი
3	1928 – 1931	გენერალი ბურჟუა
4	1931 – 1934	ისაია ბოუმანი
5	1934 – 1938	ჩარლზ კლოუზი
6	1938 – 1949	ემანუელ დე მარტონი
7	1949 – 1952	ჯორჯ კრესი
8	1952 – 1956	ლორენს დადლი სტამპი
9	1956 – 1960	ჰანს ალმანი
10	1960 – 1964	კარლ ტროლი
11	1964 – 1968	შიბა ჩატერჯი
12	1968 – 1972	სტანისლავ ლეშიცკი
13	1972 – 1976	ჟან დრეში
14	1976 – 1980	მაიკლ ჯონ უაიზი
15	1980 – 1984	აკინ მაბოგუნჯე
16	1984 – 1988	პიტერ სკოტი
17	1988 – 1992	რონალდ ფუკსი
18	1992 – 1996	ჰერმან ვერსტაპენი
19	1996 – 2000	ბრუნო მესერლი
20	2000 – 2004	ენ ბატიმერი
21	2004 – 2006	ადალბერტო ვალეგა^[4]
22	2008 – 2012	რონალდ ფრენსის აბლერი
23	2012 – 2016	ვლადიმერ კოლოსოვი
24	2016 – დღემდე	იუკიო ჰიმიიამა