ავა გარდნერი

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
ავა გარდნერი
Ava Lavinia Gardner
Ava Gardner barefoot contessa.jpg
დაბ. სახელი ავა ლავინია გარდნერი
დაბ. ადგილი ბროგდენი, ჩრდილოეთ კაროლინა, დროშა: ამერიკის შეერთებული შტატები აშშ
დაბ. თარიღი 24 დეკემბერი, 1922
გარდ. თარიღი 25 იანვარი, 1990
ვესტმისტერი, ლონდონი, ინგლისი, დიდი ბრიტანეთი
წლები 1941-1986
მეუღლე(ები) მიკი რუნი (1942-1943)
არტი შაუ (1945-1946)
ფრენკ სინატრა (1951-1957)

ავა გარდნერი (Ava Lavinia Gardner, დ. 24 დეკემბერი, 1922) — ამერიკელი მსახიობი, რომელიც შეყვანილია „American Film Institute“-ის ყველა დროის საუკეთესო ვარსკვლავების სიაში.

პირადი ცხოვრება[რედაქტირება]

ის ეკრანზეც ისეთივე გახსნილი და გულღია იყო, როგორც ცხოვრებაში. „იდუმალი ქალის“ პოზა უცხო იყო მისთვის და საზოგადოებისგან პირადი ცხოვრების დამალვა არასოდეს უცდია. მისი ბედი წინააღმდეგობების და უკიდურესობათა მთელი ჯაჭვია, - ვნება და ინდიფერენტულობა, მწუხარება და დილამდე დროსტარება, მელანქოლია და იუმორი, მარტოობა და ხმაურიანი თავყრილობა, შვილების გაჩენის შიში და მყარი ოჯახის ქონის მანიაკალური სურვილი - ყველაფერის ეს ერთად აღებული ავა გარდნერია.

„არც მეტყველება უვარგა, არც მოძრაობა, ვერც თამაშობს, - არაფერი იცის... მაგრამ ღმერთო ჩემო, რა არაჩვეულებრივია! რა ლამაზია!“ - დიდხანს იბუზღუნა ლუის მაიერმა, კინოსტუდია „MGM”-ის პროდიუსერმა და გარდნერის შვიდწლიანი კონტრაქტს მოაწერა ხელი. კონტრაქტის თანახმად ავა გარდნერს, დამწყებ მსახიობს კვირაში 50 დოლარს გადაუხდიდნენ. თვრამეტი წლის პროვინციელი გოგონასთვის, რომელიც მამამისის მიყრუებული ფერმისა და ყავისფერი თუთუნის პლანტაციების გარდა არაფერი ენახა, ეს ნამდვილი ფუფუნება იყო.

სტუდია „MGM”-ის ერთმა ახალგაზრდა კლერკმა ავა შემთხვევით აღმოაჩინა, როცა ნიუ-იორკელი ფოტოგრაფის - ლარი ტერის სახელოსნოს ჩაუარა და ვიტრინაში გამოფენილი ულამაზესი უცნობი გოგონას ფოტო შენიშნა. „ოო, რა მაღალი მკერდი აქვს, როგორც ვიწრო, გამოყვანილი წელი, თანაც როგორი ფოტოგენურია! არა, თქვენს ნათესავს დიდი მომავალი აქვს. შემახსენეთ - რა ჰქვია?“ კლერკის აღფრთოვანებამ სახელოსნოს მეპატრონე გააკვირვა კიდეც, - ნუთუ მისი ცოლის უმცროსი და - ავა, რომელიც სტუმრად ახლახანს ჩამოვიდა და რომელსაც სიძემ გასართობად გადაუღო სურათი და არა კომერციული მიზნით, - მართლაც ასეთი მნიშნელოვანი იყო?!

„ძალიან კარგი, წავალ ჰოლივუდში და პირველად რასაც გავაკეთებ - გავთხოვდები. ცოლად ყველაზე ცნობილ და დიდ ვარსკვლავს გავყვები და ბედნიერი ვიქნები“. - მისი სიტყვები წინასწარმეტყველებასავით ახდა. მას წინ ბოჰემური ცხოვრება, უამრავი პატარ-პატარა რომანი, რამდენიმე ქორწინება და დიდი სიყვარული ელოდა.

ავა გარდნერი და გრეგორი პეკი

1950 წელს ოცდაექვსი წლის ავა გარდნერი და ოცდაცამეტი წლის ფრენკ სინატრა ერთმანეთს პირველად შეხვდნენ. ამ დროისთვის გარდნერი - ცნობილი კინოვარსკვლავი - უკვე კაშკაშებდა და მას „მსოფლიოს ყველაზე ლამაზ მტაცებელს“ ეძახდნენ. მეორე ქმართან, სახელგანთქმულ კლარნეტისტ არტი შოუსთან ერთად უკვე აღარ ცხოვრობდა, თუმცა ოფიციალურად გაყრილები არ იყვნენ. არტი თავს ინტელექტუალურ ადამიანად თვლიდა და ცოლის „მდაბიოობას“ წყობიდან გამოჰყავდა, თუმცა მისი ჩამოქნილი სხეული უყვარდა. განშორების შემდეგ ავას დამოკიდებულება მამაკაცის მიმართ შეიცვალა, - თითო ღამე თითო ახალგაცნობილთან. იმ პროვინციელი გოგონასგან, რომლის ერთადერთი ოცნებაც ღირსეულ ადამიანთან ერთად ბედნიერი ცხოვრება იყო, აღარაფერი დარჩა. ფრენკს კი ჰქონდა ყველაფერი, რად ოდესმე უნატრია გარდნერს - საყვარებული მეუღლე და სამი ანგელოზივით ბავშვი.

„ჯელტმენები ქერებს ამჯობინებენ“, – ასე ერქვა ფილმს, რომლის პრემიერაზეც ავა გარდნერმა ფრენკ სინატრა გაიცნო. სინატრამ, სიმპათიურმა იტალიელმა თავისი მოქნილი, ძლიერი სხეულით და სექსუალობით პირველი დანახვისთანავე მოხიბლა ავა, – „ეს სექსუალობა ხმაში, მოძრაობაში, გამოხედვაშიც იგრძნობოდა და როგორც კი გვერდიგვერდ აღმოვჩნდით – თავი დავკარგე“. იმ საღამოს მათ შორის არაფერი მომხდარა. გარდნერმა თქვა, რომ ეს „ძალიან იაფფასიანი და არასწორი“ იქნებოდა. ახალგაცნობილმა წყვილმა საყვარლობა შემდეგისთვის გადადო, თუმცა მოზღვავებული გრძნობები დიდხანს ვეღარ დამალა... თითქოს ოცნება ასრულდა და ავა ოცნების მამაკაცს შეხვდა!

„თავს დაიღუპავ, სინატრა აუცილებლად მიგატოვებს“ – აფრთხილებდნენ ისი, ვინც უკეთ იცნობდა ფრენკს. იგი ჰოლივუდის პირველი მექალთანე იყო და ამ „ტიტულის“ განშორებას არც აპირებდა: „მინდა, სანამ ახალგაზრდა და ჯანმრთელი ვარ, ყველაფერი გამოვცადო“. „მან სიყვარული არ იცის“ – წუწუნებდნენ სინატრას ყოფილი საყვარლები, მაგრამ ავა არავის უსმენდა. გაცნობიდან ერთი კვირის შემდეგ ისინი პალმ-სფრინგსის სანაპიროზე კაბრიოლეტში დაინახეს.

ერთმანეთს ძალიან ჰგავდნენ: მხიარულები, გულგახსნილები, ემოციურები იყვნენ. უბრალო იტალიური კერძები, ვისკი, კრივის მატჩებზე სიარული და ღამის ცხოვრება უყვარდათ.

მათი ცეცხლოვანი რომანი სკანდალით დაიწყო. პრესა ავა გარდნერს გარყვნილ ქალს და ოჯახის დამანგრეველს უწოდებდა. რეპორტიორები ფეხდაფეხ დაჰყვებოდნენ შეყვარებულებს და ფოტო-კამერების ჩხაკა-ჩხუკით ნერვებს უშლიდნენ. მათ შორის ყველაზე თავხედებს სინატრა კბილების ჩამტვრევითად კი დაემუქრა. ამ სიყვარულს საზოგადოებრივი აზრი აშკარად დაუპირისპირდა. საკმარისი იყო სინატრას კონცერტზე მოსულ მსმენელს დარბაზში შემოსული ავა გარდნერი დაენახა და მათ სტვენას ყურთასმენა მიჰქონდა.

აგვისტოს ბოლოს ავასთან ერთად მექსიკიდან დაბრუნებული ფრენკი თავისი გადაწყვეტილების შესახებ – გაეყაროს ცოლს და დაქორწინდეს საყვარელ ქალზე – ოფიციალურად გამოაცხადებს. 7 ნოემბერს ფილადელფიაში გარდნერისა და სინატრას ბედნიერი ოჯახი შეიქმნა.

ნეფემ ძვირფასი ბეწვის პალანტინი აჩუქა პატარძალს, მან კი – ოქროს მედალიონი თავისი ფოტოსურათით. პრესასთან შეხვედრის თავიდან ასაცილებლად ახალდაქორწინებულებმა ქალაქი სასწრაფოდ დატოვეს. სიჩქარეში წყვილს ბარგის წაღებაც კი დაავიწყდა და ჩემოდნების მოლოდინში რამდენიმე საათი ფლორიდაში შეჩერდნენ. მაიამის სანაპირო უკაცრიელი იყო და ცივი ქარი ქროდა. ისინი თეთრ ქვიშაზე სეირნობდნენ და ოკეანის ტალღების ხმაურში საკუთარი ხმაც კი არ ესმოდათ. იმ გასეირნების წამები ორ თუ სამ ფოტოსურათზეღა შემორჩა. კამერას ასეთი ბედნიერი გარდნერი და სინატრა ერთად ან ცალ-ცალკე აღარასოდეს დაუფიქსირებია.

ფილმოგრაფია[რედაქტირება]

რესურსები ინტერნეტში[რედაქტირება]

Commons-logo.svg
ვიკისაწყობში? არის გვერდი თემაზე: