ნიჩბისის სერი

ნიჩბისის სერი
სერის ჩრდილოეთი ბოლო (ხედი სოფ. ძეგვიდან)
კოორდინატები: 41°47′03″ ჩ. გ. 44°30′23″ ა. გ.
ქვეყანა	საქართველო
ტერიტორიული ერთეული	მცხეთის მუნიციპალიტეტი
უმაღლესი წერტილი	ნატბეურის მთა
სიმაღლე	1560 მ
ამგებელი ქანები	ტუფ-ბრექჩია, ტუფ-ქვიშაქვა, ანდეზიტური ტუფ-ბრექჩია, კონგლომერატი, ქვიშაქვა, თიხა, კირქვა, მერგელი და ფერადი თიხა
სურათები ვიკისაწყობში

ნიჩბისის სერი — ქედი საქართველოში, მცხეთის მუნიციპალიტეტში. წარმოადგენს თრიალეთის ქედის ჩრდილოეთ განშტოებას, მდინარე მტკვრის მარჯვენა შენაკადების — ხეკორძულისა და ნიჩბისისწყლის წყალგამყოფს. იწყება ნატბეურის მთიდან (1560 მ) და მთავრდება ჩრდილოეთით ზღვის დონიდან 632,5 მ სიმაღლის მაღლობით. აგებულია პალეოცენური და შუაეოცენური ტუფ-ბრექჩიებით, ტუფ-ქვიშაქვებით, ანდეზიტური ტუფ-ბრექჩიებით, კონგლომერატებით, ქვიშაქვებით და თიხებით, აგრეთვე ზედაცარცული კირქვებით, მერგელებითა და ფერადი თიხებით. კალთები ძლიერ დახრილია, შემოსილია ფართოფოთლოვანი ტყით (მუხნარი, მუხნარ-რცხილნარი, წიფლნარი), სამხრეთი მონაკვეთი — ჯაგრცხილნარითა და ჯაგეკლიანი ბუჩქნარით. ნიჩბისის სერის ძირას გაშენებულია სოფლები ქვემო ნიჩბისი და სასხორი.