Radical Action to Unseat the Hold of Monkey Mind — პროგრესული როკ-ჯგუფ King Crimson-ის 2016 წლის ბოქს-სეტი.[3][4]
გამოცემაში შეტანილია საკონცერტო მასალა, ძირითადად გადაღებული და ჩაწერილი იაპონიაში 2015 წლის 19 დეკემბერს. ვინაიდან ჯგუფის საკონცერტო ტურნეს მსვლელობისას სხვა სიმღერებიც სრულდებოდა, გამოცემაში დამატებით წარმოდგენილია ეს კომპოზიციებიც, ჩაწერილი იაპონიაში, კანადაში და საფრანგეთში. მასალა ძირითადად მოიცავს კოლექტივის 1969–1974 წლების პერიოდს. მისი დიდი ნაწილი ჯგუფის მიერ 1970-იანების შემდეგ არ შესრულებულა, თუმცა, King Crimson-ის ახალი შემადგენლობის გათვალისწინებით, ზოგიერთის არანჟირება შეიცვალა.[3] გარდა რამდენიმე ახალი კომპოზიციის, შეტანილია მასალა 1995 და შემდგომი წლების ალბომებიდან. თავად გამოცემის სახელწოდება ეფუძნება ამავე სახელწოდების ინსტრუმენტულ ნამუშევარს, რომელსაც King Crimson ტურნეს მსვლელობისას ასრულებდა.[5]
ბოქს-სეტი გამოიცა ორი სახით: როგორც 4 დისკიანი სტანდარტული ვერსია, Blu-ray-ის და 3 CD-ის ფორმით (მათ ეწოდებათ „ვირტუალური სტუდიური ალბომები“, ვინაიდან უკანა ფონზე არ ჟღერს ხალხის ხმაური) და 6 დისკიანი დელუქს-გამოცემის სახით, იგივე შიგთავსით, რასაც ემატება ორი DVD სრული კონცერტით და ვრცელი ბუკლეტით. თავად Blu-ray-ს შემთხვევაში არსებობს გამოსახულების გათიშვის საშუალებაც, რათა შესაძლებელი იყოს მხოლოდ აუდიოს მოსმენა.