კოკუმ პროფესიონალური კარიერა 1988 წელს დაიწყო „ალკმარში“, სადაც ორი სეზონის განმავლობაში 50 მატჩში 8 გოლი გაიტანა. შემდეგ გადავიდა „ვიტესში“, რომლის მაისურითაც 1990–95 წლებში 137 მატჩში 25 გოლი შეაგდო. წარმატებული გამოსვლების შემდეგ, 1995 წელს „პსვ ეინდჰოვენს“ შეუერთდა, სადაც 95 შეხვედრაში 31-ჯერ შეძლო მეტოეთა კარის აღება და 1996–97 წლების სეზონში ქვეყნის ჩემპიონობა მოიპოვა.
1998 წელს კოკუ შეუერთდა ესპანურ გრანდ „ბარსელონას“. იქ მან 205 მატჩში 31 გოლი გაიტანა და 1998–99 წლებში მოიგო ლა ლიგა. იყო გუნდის კაპიტანი და ორჯერ გავიდა ჩემპიონთა ლიგის ნახევარფინალში.
2004 წელს კოკუ დაბრუნდა „პსვ“-ში, სადაც კიდევ სამჯერ მოიგო ერედივიზია და 2004–05 წლებში ნიდერლანდების თასი მოიპოვა. საკლუბო კარიერის ბოლო ეტაპზე, 2006–07 წლებში, თამაშობდა არაბთა გაერთიანებული საამიროების კლუბ „ალ-ჯაზირაში“, სადაც 17 მატჩში 4 გოლი გაიტანა.
ნიდერლანდების ეროვნული ნაკრების შემადგენლობაში კოკუმ 1996−2006 წლებში 101 მატჩში 10 გოლი გაიტანა. მონაწილეობდა მსოფლიოს 1998 და 2006 წლების ჩემპიონატებზე, ასევე ევროპის 1996, 2000 და 2004 წლების ჩემპიონატებზე.
საფეხბურთო კარიერის დასრულების შემდეგ, კოკუმ სამწვრთნელო საქმიანობა დაიწყო. 2008–12 წლებში იყო ნიდერლანდების ნაკრების მთავარი მწვრთნელის ასისტენტი, შემდეგ „პსვ“-ს მთავარი მწვრთნელის ასისტენტი, ხოლო 2013–18 წლებში „პსვ“-ს მთავარი მწვრთნელი. მის ხელმძღვანელობით „პსვ“-მ სამჯერ მოიგო ერედივიზია.
2018 წელს კოკუ გახდა თურქული „ფენერბახჩეს“ მთავარი მწვრთნელი, ხოლო 2019–20 წლებში სათავეში ედგა ინგლისურ „დერბი ქაუნთის“. 2022–23 წლებში „ვიტესის“ მთავარ მწვრთნელად მუშაობდა.
.jpg)
ბარსელონა
ალ-ჯაზირა
