მზეყვავილა

მზეყვავილა (Helian themum), მცენარეთა გვარი საკმელასებრთა ოჯახისა. ერთი ან მრავალწლოვანი ბალახები, უფრო ხშირად ბუჩქბალახებია. საქართველოში ამ გვარის 9 სახეობა იზრდება. მათგან ერთი სახეობა (Helianthemum georgicum) საქართველოს ენდემია (გვხვდება მხოლოდ ქართლსა და მესხეთში), ერთი (Helianthemum buschii) — კავკასიისა (იზრდება დასავლეთ და ცენტრალურ იმიერკავკასიაში). დანარჩენი 7 ფართოდ არის გავრცელებული ხმელთაშუაზღვისპირეთის ქვეყნებში, სამხრეთ ევროპაში, მცირე აზიასა და ირანში. მზეყვავილა იზრდება მშრალ და ქვიან ფერდობებზე, კლდეებზე, აგრეთვე ბუჩქნარებს შორის მთის ქვედა სარტყლიდან ზედა სარტყლამდე. დეკორატიული და თაფლოვანი მცენარეებია. დიდი რაოდენობით შეიცავენ მთრიმლავ ნივთიერებებს.

ლიტერატურა

• ხინთიბიძე ლ., ქსე, ტ. 6, გვ. 658, თბ., 1983