Burger King
ბურგერ კინგი (Burger King) — სწრაფი კვების ჰამბურგერებზე ორიენტირებული რესტორნების გლობალური ქსელი. მისი სათავო ოფისი მდებარეობს აშშ-ში, ფლორიდის შტატში.
ისტორია
[რედაქტირება | წყაროს რედაქტირება]ბურგერ კინგის წინაპარი 1953 წელს დაარსდა ფლორიდის შტატ ქალაქ ჯექსონვილში. მისი სახელი თავდაპირველად იყო ინსტა-ბურგერ კინგი. დამფუძნებლები იყვნენ ჯონ კრამერი და მისი ცოლის ბიძა მეთიუ ბარნსი, რომლებმაც პირველი მაღაზიები რკინიგზის სადგურის ირგვლივ გახსნეს. ჰამბურგერებმა სულ მალე მოიპოვა პოპულარობა და საოცარი წარმატება. რასაც ფრანჩაიზების გაცემაც მოყვა. 1959 წელს, სათავო კომპანიას სერიოზული პრობლემები შეექმნა და ის მაიამის ერთ-ერთმა ფრანჩაიზერმა კომპანიამ იყიდა. მყიდველებმა ინსტა-ბურგერ კინგს უპირველეს ყოვლისა სახელი შეუცვალეს და მას უბრალოდ ბურგერ კინგი უწოდეს. მომდევნო 8 წლის განმავლობაში, ობიექტების რიცხვი აშშ-ის მასშტაბით 250 გახდა, ხოლო 1967 წელს იგი „პილსბერი კომპანიმ“ შეიძინა.
კომპანიის ისტორიაში მნიშვნელოვანია 1978 წელი, როდესაც ბურგერ კინგმა, მაკდონალდსისი აღმასრულებელი დირექტორი დაიქირავა კომპანიის გამართვისა და რეორგანიზაციის მიზნით. ამ ფაქტს „ოპერაცია ფენიქსსაც უწოდებენ“.
მიუხედავად ამისა, კომპანიის არაეფექტური მმართველობისა და სხვა მრავალი მიზეზის გამო, ბურგერ კინგი სერიოზულ დაღმასვლას განიცდიდა, სანამ 1989 წელს ბრიტანულმა კონგლომერატმა „გრანდ მეტროპოლიტენმა“ და მისმა მემკვიდრე „დიაგეომ“ არ შეიძინა.
2002 წელს, სამი კომპანიისგან შემდგარმა ტრიუმვირატმა, ბურგერ კინგი „დიაგეოსგან“ 1.5 მლრდ აშშ დოლარად შეიძინა.
ქსელი
[რედაქტირება | წყაროს რედაქტირება]
ბურგერ კინგის პირველი რესტორანი აშშ-ის ფარგლებს გარეთ, პირველად 1963 წელს გაიხსნა პუერტო-რიკოში, მას მოყვა 1969 წელს რესტორანი კანადაში, უკვე 1975 წელს ევროპაში, მადრიდში. 1982 წელს, მათ რიგებს ემატება აღმოსავლეთ აზიის ქვეყნები: იაპონია, ტაივანი, სამხრეთ კორეა, სინგაპური. აღსანიშნავია, რომ მკაცრი კონკურენციის პირობებში, 2001 წელს, იაპონიაში ბურგერ კინგის ყველა რესტორანი დაიხურა, მაგრამ 2007 წელს ხელახლა გაიხსნა.
1970 წლებიდან, რესტორნების ქსელი შედის ლათინური ამერიკის ქვეყნებშიც. რესტორნები იხსნება მექსიკაში, ვენესუელაში, ჩილესა და არგენტინაში.
მიუხედავად იმისა, რომ ბურგერ კინგი ჩამორჩება მაკდონალდსისი ქსელს, მსოფლიოს რიგ ქვეყნებში საქმე პირიქითაა, მათ შორისაა მექსიკა და ესპანეთი.
საინტერესოა, რომ ავსტრალია ერთადერთი ქვეყანაა ბურგერ კინგის გავრცელების არეალშიც, სადაც ეს კომპანია სხვა სახელით ოპერირებს. 1971 აღმოჩნდა, რომ ავსტრალიის ქალაქ ადელაიდაში, საკვების ერთ-ერთი მაღაზია უკვე იყენებდა ამ სახელის სავაჭრო ბრენდს, ამიტომ ავსტრალიაში ბრენდი შევიდა „Hungry Jack's“- ის სახელით.
გეგმები
[რედაქტირება | წყაროს რედაქტირება]2008 წლიდან, მომდევნო 10 წლის განმავლობაში, დაგეგმილია, რომ ბურგერ კინგის ბაზრის 80 % აშშ-ის ფარგლებს გარეთ იქნება. განსაკუთრებული აქცენტი კეთდება აზია-წყნარი ოკეანის რეგიონზე. კომპანია გეგმავს, თავის სამ უმსხვილეს ბაზრად აქციოს ინდოეთი, ჩინეთი და იაპონია. 2012 წლის ბოლოსთვის, ქსელს აზიის ტერიტორიაზე 250 ახალი რესტორანი შეემატება. იგეგმება ფრანჩაიზინგის გააქტიურება აღმოსავლეთ ევროპაში, აფრიკაში, ახლო აღმოსავლეთსა და ბრაზილიაში.
ამჟამად, 2010 წლის ბოლოსთვის, ბურგერ კინგი 32,400 რესტორნით, რჩება როგორც მეორე უმსხვილესი ქსელი სწრაფი კვების ჰამბურგერების სარესტორნო ქსელში მაკდონალდსის შემდეგ. მისი რესტორნები წარმოდგენილია მსოფლიოს 80 ქვეყანაში.
კომპანიის ძირითად პროდუქტებს წარმოადგენს ჰამბურგერები, ფრანგული ფრი, გამაგრილებელი სასმელები და სხვადასხვა დესერტი.