მასალა ვიკიპედიიდან — თავისუფალი ენციკლოპედია
მოკლეკუდა სცინკი (ლათ. Tiliqua rugosa) — ხვლიკი სცინკისებრთა ოჯახისა. მისი სხეულის სიგრძეა 35–36 სმ. ტანი მასიურია, აქვს დიდი თავი და მოკლე კუდი, დაფარულია სქელი ხორკლიანი ქერცლით. შეფერილია ზეთისხილისფერ ან წითელ-ყავისფერ ტონებში. გავრცელებულია ავსტრალიის ბუჩქნარიან სტეპებში და ნახევარუდაბნოებში. თხრის არაღრმა ჰორიზონტალურ სოროებს. იკვებება ბალახოვანი მცენარეების ფოთლებით, ყვავილებითა და ნაყოფებით, მწერებით და ლოკოკინებით, რომლებსაც ნიჟარებიდან მასიური კბილების დახმარებით აცალკევებს. მოკლეკუდა სცინკისათვის დამახასიათებელია ნამდვილი ცოცხლადშობა, პლაცენტის განვითარებით. მარტში შობს 2–3 ნაშიერს.
