ირინა მიროშნიჩენკო

ირინა მიროშნიჩენკო
დაბადების თარიღი	24 ივლისი, 1942 (1942-07-24) ბარნაული, (რსფსრ, სსრკ)
გარდაცვალების თარიღი	3 აგვისტო, 2023 (81 წლის) მოსკოვი, რუსეთი
ეროვნება	რუსი
მოქალაქეობა	სსრკ,  რუსეთი
საქმიანობა	მსახიობი
ჯილდოები	რსფსრ დამსახურებული არტისტი, რსფსრ სახალხო არტისტი, ღირსების ორდენი

ირინა მიროშნიჩენკო (რუს. Ири́на Петро́вна Мирошниче́нко; დ. 24 ივლისი, 1942, ბარნაული, (რსფსრ, სსრკ) — გ. 3 აგვისტო, 2023, მოსკოვი, რუსეთი) — საბჭოთა და რუსი მსახიობი, მომღერალი, პედაგოგი. რსფსრ სახალხო არტისტი (1988).

ბიოგრაფია

დაიბადა 1942 წლის 24 ივლისს ბარნაულში, სადაც მამამისი იყო მივლინებული მოსკოვიდან ციმბირის საბრძოლო ოლქის 22-ე სათადარიგო მსროლელთა პოლკის შემადგენლობაში. 1944 წელს დედასთან ერთად დაბრუნდა მოსკოვში (მამამისი შტაბში გადაიყვანეს და მხოლოდ 1945 წლის აგვისტოში, დემობილიზაციის შემდეგ შეუერთდა ოჯახს).

6 წლიდან სწავლობდა ვიოლინოზე დაკვრას გნესინების სახელობის სასწავლებელთან არსებულ სკოლაში.

1961 წელს სწავლა დაიწყო МХАТ-თან არსებულ სკოლა-სტუდიაში (ვასილი მარკოვის კურსი). მესამე კურსზე შედგა მისი დებიუტი გიორგი დანელიას ფილმში „დავდივარ მოსკოვის ქუჩებში“. სკოლა-სტუდიის დამთავრების შემდეგ მსახიობად მიიღეს მოსკოვის მხატვრულ თეატრში (МХАТ), რომლის სცენაზეც ითამაშა მაშა („თოლია“), მისის ჩივლი („იდეალური ქმარი“), ჟენია („ვალენტინი და ვალენტინა“), რანევსკაია („ალუბლის ბაღი“) და სხვა მრავალი.

კინოში მისი პირველი დიდი ნამუშევარი იყო მზვერავ გალინა ორტინსკის როლი ფილმიდან „მათ იცნობდნენ მხოლოდ სახით“. შემდეგ იყო „ბიძია ვანია“, „კრემლის კურანტები“, „არც დაგსიზმრებიათ“ და მრავალი სხვა.

ირინა მიროშნიჩენკო გარდაიცვალა 2023 წლის 3 აგვისტოს მოსკოვის საავადმყოფოში. დაკრძალულია ტროეკუროვის სასაფლაოზე

ფილმოგრაფია

წელი		ქართულად	მშობლიური სახელწოდება	როლი
1964	ფ	დავდივარ მოსკოვის ქუჩებში	Я шагаю по Москве	კატია
1966	ფ	ანდრეი რუბლიოვი	Андрей Рублёв	მარიამ მაგდალინელი
1968	ფ	ნიკოლოზ ბაუმანი	Николай Бауман	ნადეჟდა ბაუმანი
1968	ფ	რეზიდენტის შეცდომა	Ошибка резидента	რიტა
1970	ფ	ძია ვანია	Дядя Ваня	ელენა სერებრიაკოვა
1979	ფ	საიდუმლო სამსახურის აგენტი	Агент секретной службы	ლიდია ფლორია
1980	ფ	არც დაგსიზმრებიათ	Вам и не снилось…	ლუდმილა, კატიას დედა
1982	ფ	პროფესია — გამომძიებელი	Профессия — следователь	ნატალია კროშინა
1985	ფ	მემკვიდრეობა	Наследство	ვარვარა შუმოვა
1986	ფ	მადამ ვონგის საიდუმლოებები	Тайны мадам Вонг	მადამ ვონგი

ჯილდოები და აღიარება

• 1971 საპატიო ნიშნის ორდენი
• 1976 რსფსრ დამსახურებული არტისტი
• 1988 რსფსრ სახალხო არტისტი
• 1998 ღირსების ორდენი
• 2015 მეგობრობის ორდენი

რესურსები ინტერნეტში

• ირინა მიროშნიჩენკო — კინოფილმების ინტერნეტ მონაცემთა ბაზა (ინგლისური)
• ირინა მიროშნიჩენკო allmovie-ზე