„(I’ll Never Be) Maria Magdalena“, ცნობილი როგორც „Maria Magdalena“ — გერმანელი მომღერლის, სანდრას სიმღერა მისი სადებიუტო ალბომიდან „The Long Play“ (1985). სიმღერა, რომლის ავტორები იყვნენ ჰუბერტ კემლერი, მარკუს ლერი, მიხაელ კრეტუ და რიჩარდ პალმერ-ჯეიმზი, გამოვიდა 1985 წლის მარტში Virgin Records-ის მიერ, როგორც ალბომის წამყვანი სინგლი. ევროპაში ჩარტების ერთ-ერთი მთავარი ჰიტი აღმოჩნდა და რამდენიმე ქვეყანაში პირველ ადგილსაც მიაღწია.
მუსიკის ავტორები იყვნენ ჰუბერტ კემლერი, მარკუს ლერი და მიხაელ კრეტუ. სიმღერის არანჟირების ავტორი და პროდიუსერი ასევე კრეტუ იყო. ტექსტი დაწერა რიჩარდ პალმერ-ჯეიმზმა. მასში ბიბლიური პერსონაჟის, მარიამ მაგდალინელის ხსენება კემლერის იდეა იყო,[1] გაჩნდა მაშინ, როდესაც მისამღერისათვის საჭირო გახდა შვიდმარცვლიანი სახელის მოფიქრება. აირჩა სახელის გერმანული ვერსია, რადგან ინგლისურში (Mary Magdalene) მხოლოდ ხუთი მარცვალი იყო.
სიმღერა პირველად გამოვიდა 1985 წლის მარტში, როგორც წამყვანი სინგლი სანდრას სადებიუტო ალბომიდან „The Long Play“. ეს იყო მისი, როგორც სოლო არტისტის, მესამე სინგლი, მაგრამ პირველი სოლო სინგლი, რომელიც გამოვიდა საერთაშორისო დონეზე. რადიოში გაშვების შესაძლებლობის მოპოვების მცდელობა თავდაპირველად წარუმატებელი იყო, რის შემდეგაც ლეიბლმა საბერძნეთის დიჯეები და მათი ტურისტული აუდიტორია ამოიღო სამიზნეში; სიმღერა ჰიტად იქცა საბერძნეთში, სადაც სინგლების ჩარტშიც მოხვდა. სამშობლოში დაბრუნებულმა ტურისტებმა სიმღერა აქაც მოითხოვეს. 1985 წლის 13 სექტემბრიდან 4 ოქტომბრამდე, ზედიზედ ოთხი კვირის განმავლობაში, გერმანიის სინგლების ოფიციალურ ჩარტში პირველ ადგილს იკავებდა. შემდეგ სინგლმა პირველი ადგილი დაიკავა ავსტრიაში, შვეიცარიაში, შვედეთში, ნორვეგიაში, ნიდერლანდებსა და ფინეთში. მან ასევე მიაღწია პირველ ადგილს გერმანიის რადიოროტაციის ჩარტში[2] და მეხუთეს ავსტრიისაში.[3] პანევროპულ ჩარტებში, ის იყო მე-10 და მე-20 ჰიტი, რადიოროტაციისა და გაყიდვების ჩარტებში შესაბამისად.[4][5] სიმღერა პოპულარული რადიოჰიტი იყო ბრაზილიაში, ახლო აღმოსავლეთში, ჩრდილოეთ აფრიკასა და აღმოსავლეთ ევროპაში.
სიმღერა რემიქსის სახით ხელახლა გამოვიდა 1993 წელს, როგორც დამოუკიდებელი სინგლი, მაგრამ კომერციულად წარმატებული არ აღმოჩნდა, თუმცა ფინეთის საუკეთესო ათეულში და დანიის საუკეთესო ოცეულში მაინც მოხვდა. მუსიკალურმა ვებგვერდმა AllMusic-მა რეტროსპექტულად შეაფასა იგი 5 ვარსკვლავიდან 2,5-ით.[6] 1999 წელს სიმღერის კიდევ ერთი რემიქსი გამოვიდა მხოლოდ საფრანგეთში, როგორც სარეკლამო სინგლი მისი კომპილაციური ალბომისMy Favorites მხარდასაჭერად. ტრეკი კვლავ ხელახლა გაარანჟირდა სანდრას რემიქსული ალბომისთვისReflections (2006). ორიგინალური ვერსია მოგვიანებით ნიმუშად გამოიყენეს სიმღერაში „Kings & Queens“ სანდრას მეათე ალბომიდან Stay in Touch (2012).
↑„Top 3 in Europe“(PDF). Eurotipsheet. 3 (2): 16. 13 January 1986. OCLC29800226. ციტირების თარიღი: 3 მარტი, 2020 – წარმოდგენილია World Radio History-ის მიერ. შეამოწმეთ თარიღის პარამეტრი |accessdate=-ში (დახმარება)
_Maria_Magdalena.jpg)