საქართველოს სახელმწიფო უსაფრთხოებისა და კრიზისების მართვის საბჭო

საბჭოს ლოგო

საქართველოს სახელმწიფო უსაფრთხოებისა და კრიზისების მართვის საბჭო — საქართველოს სახელმწიფო უწყება, ქვეყნის პრემიერ-მინისტრის სათათბირო ორგანო, რომელიც უშუალოდ მას ექვემდებარებოდა. მოქმედებდა 2014 წლის 1 იანვრიდან.

„საქართველოს კონსტიტუციაში ცვლილებებისა და დამატებების შეტანის შესახებ“ კონსტიტუციური კანონის შესაბამისად, 2013 წლის საპრეზიდენტო არჩევნების შემდეგ, საქართველო გადავიდა სახელმწიფოებრივი მოწყობის საპარლამენტო მოდელზე, ანუ აღმასრულებელი ფუნქცია სრულად გადაეცა საქართველოს მთავრობას, პრემიერ-მინისტრის მეთაურობით. მოქმედი კონსტიტუციის პირობებში, მთავრობა და მისდამი დაქვემდებარებული უწყებები ახორციელებდნენ სრული სპექტრის საქმიანობას ეროვნული უსაფრთხოების სფეროში. აღნიშნული გარემოებებიდან გამომდინარე, კონსტიტუციური ცვლილებების შემდეგ აუცილებელი გახდა კოორდინაციის ახალი მექანიზმის შემუშავება და ჩამოყალიბდა სახელმწიფო უსაფრთხოებისა და კრიზისების მართვის საბჭო.

საბჭოს შემადგენლობაში შედიოდნენ მუდმივი [პრემიერ-მინისტრი (თავმჯდომარე), ფინანსთა მინისტრი, შინაგან საქმეთა მინისტრი, თავდაცვის მინისტრი, საგარეო საქმეთა მინისტრი, პრემიერ-მინისტრის თანაშემწე სახელმწიფო უსაფრთხოების საკითხებში (მდივანი)] და მოწვეული (ზოგიერთი სხვა მინისტრი, პარლამენტის თავმჯდომარე, შეიარაღებული ძალების გენერალური შტაბის უფროსი და სხვ.) წევრები.

2017 წლის 22 ნოემბერს მთავრობის მიერ ინიცირებული ცვლილებების მიხედვით, სახელმწიფო კრიზისების მართვის საბჭო როგორც ცალკე ორგანო გაუქმდებოდა და საგანგებო სიტუაციების მართვის სააგენტოსთან გაერთიანდებოდა; ეს უკანასკნელი კრიზისების საბჭოს შექმნამდეც არსებობდა. აღნიშნულ ცვლილებებს (სხვა ცვლილებებთან ერთად) პარლამენტმა მხარი 7 დეკემბერს დაუჭირა. საქართველოს პრემიერ-მინისტრის ბრძანებით, საბჭო გაუქმდა 2017 წლის 15 დეკემბერს.

საბჭოს მდივნები

• მინდია ჯანელიძე: 22 იანვარი, 2014 – 4 ნოემბერი, 2014
• დავით სუჯაშვილი: 5 დეკემბერი, 2014 – 2015
• მინდია ჯანელიძე: 1 მაისი, 2015 – 12 ნოემბერი, 2017
• გიორგი მღებრიშვილი: 13 ნოემბერი, 2017 – 15 დეკემბერი, 2017

რესურსები ინტერნეტში

• ოფიციალური საიტი ^{[დაარქივებული]}