ირემასოკო

ირემასოკო (Sarcodon imbricatus) — ქუდიანი საჭმელი სოკო ზღარბასოკოების ოჯახისა. ქუდის დიამეტრია 5-20 სმ, მისი ზედაპირი დაფარულია სქელი, დიდი, კონცენტრულად გაწყობილი მუქი ყავისფერი ქერცლით. ქვედა მხარეს აქვს ფეხისკენ წაწვეტებული თეთრი ეკლები, რომლებიც სოკოს მომწიფებისას უკვე მოყავისფროა. ფეხის სიგრძეა 2-8 სმ, ცილინდრული ფორმა აქვს, თეთრია, ძირში ყავისფერი. იზრდება ნაძვნარში, ფიჭვნარსა და შერეულ ტყეებში ზაფხულსა და შემოდგომაზე. იჭმება ნორჩი.

ლიტერატურა

• ნახუცრიშვილი ი., ქართული საბჭოთა ენციკლოპედია, ტ. 5, გვ. 218, თბ., 1980 წელი.