შინაარსზე გადასვლა

კოსის პლატო

მასალა ვიკიპედიიდან — თავისუფალი ენციკლოპედია
კოსის პლატო
კოორდინატები: 44°09′ ჩ. გ. 3°15′ ა. გ. / 44.150° ჩ. გ. 3.250° ა. გ. / 44.150; 3.250
ქვეყანა საფრანგეთის დროშა საფრანგეთი
სიმაღლე 900–1200 
სიგრძე 100 კმ
სიგანე 50 კმ
კოსის პლატო — საფრანგეთი
კოსის პლატო
სურათები ვიკისაწყობში

კოსის პლატო (ფრანგ. Causse) — ღრმად ეროზირებული კირქვული პლატოების ჯგუფი სამხრეთ-დასავლეთ საფრანგეთში. წარმოადგენს ცენტრალური მასივის ნაწილს. ჩრდილო-დასავლეთით ესაზღვრება ლიმუზენისა და პერიგორის მაღლობები, აღმოსავლეთით ობრაკი და სევენები.[1]

სიმაღლე 900–1200 მ. ჩრდილოეთიდან სამხრეთისაკენ გადაჭიმულია 100 კმ-ზე, ხოლო დასავლეთიდან აღმოსავლეთისაკენ 50 კმ-ზე. აგებულია იურული ასაკის კარბონატული ქანებით.[2] დანაწევრებულია მდინარეების ტარნის, დორბის, ჟონტის, ლოსა და ავერონის ღრმა ხეობებით. განსაკუთრებით ღრმა და თვალწარმტაცი კანიონები გამომუშავებული აქვთ ტარნსა და ავერონს.[3]

პლატოებზე ფართოდაა გავრცელებული რელიეფის კარსტული ფორმები, მათ შორის მღვიმეები, კარსტული ძაბრები და სხვა. არის მრავალრიცხოვანი კარსტული წყაროები. დამახასიათებელია ფლატეებიანი კიდეები. დაფარულია მუხის, წიფლისა და ფიჭვის ტყეებით.[1]

კოს-დიუ-კერსის კავერნებში შემორჩენილია პრეისტორიული ადამიანის კვალი. კოს-დიუ-ლარზაკის დასავლეთ კიდეზე არსებული როკფორის მღვიმეები გამოიყენება სახელგანთქმული როკფორის ყველის დასამზადებლად. მეცხვარეობა ტურიზმის შემდეგ, რეგიონული ეკონომიკის მეორე საყრდენია. განვითარებულია ტურიზმი. იუნესკოს მსოფლიო მემკვიდრეობის ძეგლია.[4]

ტერმინი „Causse“ მომდინარეობს ოქსიტანური „Cauce“-სგან, რომელიც ნიშნავს „კირს“.[5]

სქოლიო[რედაქტირება | წყაროს რედაქტირება]

  1. 1.0 1.1 John Gunn. Encyclopedia of Caves and Karst Science. 2004
  2. Causses du Quercy UNESCO Global Geopark
  3. Encyclopedia Britannica | Causses geological formation, France
  4. The Causses and the Cévennes, Mediterranean agro-pastoral Cultural Landscape
  5. A la découverte des noms de lieux du Quercy et des communes du Lot. 2002