საღვთო ალიანსი
ვიკიპედიიდან
საღვთო ალიანსი იყო კოალიცია რუსეთს, ავსტრიასა და პრუსიას შორის შექმნილი 1815 წელს რუსეთის მეფე ალექსანდრე I-ის ინიციატივით, რომელსაც სამი სახელმწიფოს წარმომადგენელმა ვენაში მოაწერა ხელი 26 სექტემბერს.
ალიანსის გაცხადებული მიზანი იყო ქველმოქმედებისა და მშვიდობის ქრისტიანული ღირებულებების დამკვიდრება ევროპულ პოლიტიკურ ცხოვრებაში, თუმცა პრაქტიკულად კლემენს ვენცელ ფონ მეტერნიხმა იგი რევოლუციის საწინააღმდეგო ბასტიონი გახადა. სამი ქვეყნის მონარქმა ეს ალიანსი მათ ქვეყნებში რევოლუციური გავლენის წინააღმდეგ ერთობლივი ძალისხმევისთვის გამოიყენა (განსაკუთრებით საფრანგეთის რევოლუციის ტალღისგან დასაცავად). შესაბამისად, ეს ალიანსი დემოკრატიის, რევოლუციისა და სეკულარიზმის წინააღმდეგი იყო. შემდგომში მათ შეუერთდა დანარჩენი ევროპული მონარქიებიც გარდა დიდი ბრიტანეთის, ვატიკანისა და ოსმალეთის იმპერიისა. საღვთო ალიანსი იყო პირველი თანამედროვე საერთაშორისო სამშვიდობო ორგანიზაცია. ალიანსი 1825 წელს დაიშალა ალექსანდრეს გარდაცვალებასთან ერთად. ალიანსი ასევე ცდილობდა გავლენა ექონია ლათინურ ამერიკაზე, თუმცა მას ხელი შეუშალა ბრიტანეთის წინააღმდეგობამ და აშშ-ის პრეზიდენტი ჯეიმზ მონროს ე.წ. მონროს დოქტრინამ.
 |
ეს დაუსრულებელი სტატიაა პოლიტიკის შესახებ. თქვენ შეგიძლიათ დაეხმაროთ ვიკიპედიას და შეავსოთ იგი. |
