„Voulez-Vous“ (ფრანგულად — „გინდა?“, წარმოთქმა: [vule vu]) — შვედური ჯგუფის, ABBA-ს 1979 წლის სიმღერა. ტექსტის ავტორები და კომპოზიტორები არიან ბენი ანდერსონისა და ბიორნ ულვეუსი. წამყვანი ვოკალი გაინაწილეს აგნეტა ფელტსკუგმა და ანი-ფრიდ ლიუნგსტადმა. არის ჯგუფის 1979 წლის ამავე სახელწოდების ალბომის მეორე სიმღერა. დიდ ბრიტანეთსა და ირლანდიაში „Voulez-Vous“ გამოვიდა ორმაგ-A-მხრიანი სინგლის სახით, თუმცა სხვა თითქმის ყველგან ცალ-A-გვერდიანი იყო. ორმაგ-A-მხრიანი სინგლი, 2021 წლის სექტემბრის მდგომარეობით, ABBA-ს მე-13 საუკეთესო სიმღერაა დიდ ბრიტანეთში, როგორც სუფთა გაყიდვების, ისე ციფრული ნაკადების (სტრიმინგის) მხრივ.[3]
სიმღერა ასევე შედის კომპილაციურ ალბომში „Gold: Greatest Hits“. 1992 წელს ალბომის პირველად გამოსვლის დროს სიმღერა წარმოდგენილი იყო როგორც 4:21 წთ-იანი დამუშავებული ვერსია, 1999 წლის გამოცემაში კი სრული, 5:09 წთ-იანი ვერსიის სახით შედის. „Voulez-Vous“ 1992 წელს სინგლის სახით ხელახლა გამოუშვეს „Gold: Greatest Hits“-ის გაყიდვების ხელის შეწყობისთვის. „Voulez-Vous“ არის ABBA-ს ერთადერთი სიმღერა, რომელიც ოფიციალურად გამოვიდა გაფართოებული საცეკვაო რემიქსის სახით — თუმცა როგორც სარეკლამო რგოლი. Atlantic Records-ის მიერ 1979 წელს შეერთებულ შტატებში 12-დუიმიანი სინგლის სახით გამოშვებული ორმაგ-A-მხრიანი 6:07 წთ-იანი ვერსია შეტანილი იყო 2001 წლის კომპილაციურ ალბომში „The Definitive Collection“ (როგორც ბონუსი).
მელოდიის იდეა დაიბადა ბაჰამის კუნძულებზე შემოქმედებითი მოგზაურობის დროს და რადგანაც მაიამისთან იყვნენ ახლოს, აკომპანიმენტის ფონოგრამა ჩაწერეს Criteria Studios-ში დისკოჯგუფ Foxy-ის წევრებთან ერთად. „Voulez-Vous“ არის ABBA-ს ერთადერთი სიმღერა (გარდა ცოცხალი ჩანაწერებისა), რომელიც შვედეთის ფარგლებს გარეთაა ჩაწერილი.
ჟურნალმა „ბილბორდმა“ „Voulez-Vous“ ABBA-ს ერთ-ერთი „ყველაზე ენერგიულ სიმღერად“ მოიხსენია და აღნიშნა, რომ ის შეიცავს „ჟღერადობით თითქმის რუსულ მუსიკალურ აქცენტებს“.[4] ჟურნალმა „Cashbox“-მა კი „ცოცხალი დისკოს რიტმის მქონე ევროპოპში დაბრუნებად“ შეაფასა და შეაქო ვოკალური შესრულება.[5]
ABBA-ს სხვა ჰიტებთან (როგორც მანამდე, ისე მის შემდეგ გამოშვებულებთან) შედარებით, „Voulez-Vous“ არ მოჰყოლია ანალოგიური პოპულარობა. ბელგიაში ჩარტების სათავეში მოექცა, თუმცა დიდ ბრიტანეთში, ირლანდიასა და ნიდერლანდებში მე-3 ადგილს მიაღწია, საფრანგეთში, ესპანეთსა და შვეიცარიაში კი — მე-9-ს.
