ჩეჩილი ყველი
ჩეჩილი — ძროხის ყველი, მზადდება ძროხის მოხდილი რძისაგან. პოპულარულია საქართველოში და სომხეთში.[1]
ორგანოლეპტიკა
[რედაქტირება | წყაროს რედაქტირება]ყველის მასა არის ძაფოვანი, შეკრული ან დაწნული ფორმის. ძაფები მკვრივია, საკმაოდ მყარი გაწელვისას. ფერად თეთრია. მასა – 0,5-3 კგ დაწნული თოკების სახით. აქვს მსუბუქი რძემჟავური, სასიამოვნო სუნი. გემო — გამოკვეთილი ცილოვანი, საკმაოდ მარილიანი. მზადდება აგრეთვე „მესხური ჩეჩილის“ შებოლილი ნაირსახეობა.
ყველი „მესხური ჩეჩილი“ უნდა აკმაყოფილებდეს შემდეგ მოთხოვნებს: ტენიანობა – არაუმეტეს 60 %, ცხიმიანობა მშრალ ნივთიერებაში – არანაკლებ 2 %, მარილის შემცველობა – 4-8%. „მესხური ჩეჩილის“ დასამზადებლად საჭირო რძის მიღება, გადამუშავება და ყველის წარმოება ხორციელდება სამცხე-ჯავახეთის რეგიონის ტერიტორიაზე.
პროდუქტის დამზადების მეთოდები
[რედაქტირება | წყაროს რედაქტირება]რძეს ამწიფებენ 45-50°C-მდე. ჩაკვეთა მიმდინარეობს 5-10 წუთი 38-40°C ტემპერატურაზე. ჩანაკვეთს შედედების დაწყებისთანავე აცხელებენ, თან ურევენ 48-54° ტემპერატურამდე, რის შედეგადაც წარმოიქმნება დიდი ფიფქები, რომლებიც ადვილად ეწებება ერთმანეთს და ხელის მანიპულირებით წარმოქმნიან გრძელ 6-8 სმ დიამეტრის თასმას. თასმას ნელ-ნელა იღებენ და აწყობენ მაგიდაზე წრიულად. გაცივებულ მასას შეკრავენ კონებად. საქართველოს სამხრეთ რეგიონში — მესხეთში უძველესი დროიდან მზადდებოდა ყველი მესხური ჩეჩილი.
ივანე ჯავახიშვილის გადმოცემით ახალ თბილ დოს „დოჟუჟუნას“ ასხამენ ქვაბში, ყველის კვეთს უმატებენ და ცეცხლზე გაათბობენ, გააცხელებენ და ბოლოს ამოიღებენ ხაჭოს და ხელებით აქეთ-იქით სწევენ, აკეთებენ თოკებს, ერთად მოუკრავენ თავს, მარილს დააყრიან და შეინახავენ. მ. მაკალათიას, ვ. შამილაძის და სხვათა მონაცემებით ახალი დოდან ამზადებენ ძროხის ჩეჩილ ყველს.
ყველი სხვა წათხის ყველისაგან გამოირჩევა თავისებური დამზადების ტექნოლოგიით. მომწიფებულ მესხურ ჩეჩილს ახასიათებს სპეციფიკური კონსისტენცია, გემო და სუნი, რაც გამოარჩევს მას სხვა ყველისაგან.
რესურსები ინტერნეტში
[რედაქტირება | წყაროს რედაქტირება]- ბერიძე, მერაბ (2011). სოფლები და ნასოფლარები მოგვითხრობენ (ka). Tbilisi: უნივერსალი, გვ. 88. ISBN 978-9941-17-415-5.
- ღლონტი, ალექსანდრე (1984). საქართველოს პარლამენტის ეროვნული ბიბლიოთეკა (ka). თბილისი: განათლება, გვ. 509.
- თოფჩიშვილი, როლანდ (2014). ქართველთა კვებითი კულტურის ისტორიიდან (ka). თბილისის სახელმწიფო უნივერსიტეტი, გვ. 327. ISBN 9789941224393.
სქოლიო
[რედაქტირება | წყაროს რედაქტირება]- ↑ Batello, Caterina (2018). GARDENS of BIODIVERSITY: Conservation of genetic resources and their use in traditional food production systems by small farmers of the Southern Caucasus (en). Food and Agriculture Organization, გვ. 235. ISBN 978-92-5-106613-3. „In both Armenia and Georgia, chechil is a very popular stringy cheese“