ქეთევან ლოსაბერიძე

ქეთევან ლოსაბერიძე

ქეთევან ლოსაბერიძე
პირადი ინფორმაცია
ეროვნება	ქართველი
დაბ. თარიღი	1 აგვისტო, 1949(1949-08-01)
დაბ. ადგილი	ლეყერეთი, საქართველოს სსრ, სსრკ
გარდ. თარიღი	23 იანვარი, 2022(2022-01-23) (72 წლის)
გარდ. ადგილი	თბილისი
სიმაღლე	162
სპორტი
ქვეყანა	სსრკ
სახეობა	მშვილდოსნობა
კლუბი	„ბურევესტნიკი“ თბილისი
ჯილდოები	ხალხთა მეგობრობის ორდენი და სსრკ სპორტის დამსახურებული ოსტატი

ქეთევან ლოსაბერიძე (დ. 1 აგვისტო, 1949, ლეყერეთი, იმერეთი — გ. 23 იანვარი, 2022) — ქართველი და საბჭოთა მშვილდოსანი. 1980 წლის ოლიმპიური ჩემპიონი, მსოფლიოსა და ევროპის ჩემპიონი. საბჭოთა კავშირის სპორტის დამსახურებული ოსტატი. მშვილდოსნობაში ოლიმპიური ოქროს პირველი და ერთადერთი მფლობელი საბჭოთა სპორტის ისტორიაში. ხალხთა მეგობრობის, ვახტანგ გორგასლის II ხარისხის და ბრწყინვალების საპრეზიდენტო ორდენების კავალერი.

ბიოგრაფია

ქეთევან ლოსაბერიძე დაიბადა 1949 წლის 1 აგვისტოს, სოფელ ლეყერეთში, ტყიბულის რაიონში. 1970 წელს დაამთავრა ქუთაისის პედაგოგიური ინსტიტუტი. იგი იყო პირველი და ერთადერთი ევროპელი ქალი, რომელმაც ოლიმპიური ჩემპიონობა მოიპოვა მშვილდოსნობაში. 1980 წლის მოსკოვის ოლიმპიურ თამაშებზე მან ოქროს მედალი მოიპოვა. გარდა ამისა, მონაწილეობა მიიღო 1972 წლის მიუნხენის ოლიმპიადაში. მისი მიღწევები მოიცავს მსოფლიოსა და ევროპის ჩემპიონობებს, ასევე მრავალ საერთაშორისო ტურნირზე გამარჯვებებს.

სპორტული კარიერის დასრულების შემდეგ, ქეთევან ლოსაბერიძე აქტიურად იყო ჩართული სპორტის ადმინისტრირებაში. 2002–2005 წლებში იყო საქართველოს მშვილდოსნობის ეროვნული ფედერაციის პრეზიდენტი. მისი ხელმძღვანელობით ფედერაციამ მნიშვნელოვანი ნაბიჯები გადადგა სპორტის ამ სახეობის განვითარებაში საქართველოში.

1979 წელს მიენიჭა საბჭოთა კავშირის სპორტის დამსახურებული ოსტატის წოდება. დაჯილდოებულია ვახტანგ გორგასლის II ხარისხის ორდენით, ბრწყინვალების საპრეზიდენტო ორდენით (2018) და ხალხთა მეგობრობის ორდენით. 1980 წელს დასახელდა საქართველოს წლის საუკეთესო სპორტსმენად. გარდაიცვალა 2022 წლის 23 იანვარს, 72 წლის ასაკში.

მიღწევები

• ოლიმპიური ჩემპიონი: 1980 (მოსკოვი)
• მიუნხენის ოლიმპიური თამაშების IV ადგილოსანი: 1972
• მსოფლიოს ჩემპიონი: 1973 (გუნდური), 1981 (გუნდური)
• ევროპის ჩემპიონი: 1972 (პირადი, გუნდური), 1978 (გუნდური), 1980 (გუნდური)
• სსრ კავშირის ჩემპიონი: 1973, 1979
• სსრ კავშირის ჩემპიონატის ბრინჯაოს მედალოსანი: 1971, 1972, 1974, 1975, 1981
• სსრ კავშირის თასის მფლობელი: 1972, 1978
• სსრ კავშირის ხალხთა სპარტაკიადის ვიცე-ჩემპიონი: 1979
• მილანის (1975, 1980), ლოძის (1976), კიოლნისა (1978) და ლვოვის (1981) საერთაშორისო ტურნირების გამარჯვებული
• საქართველოს წლის საუკეთესო სპორტსმენი (სპორტულ ჟურნალისტთა კავშირი): 1980
• სსრ კავშირის საერთაშორისო კლასის სპორტის ოსტატი: 1971
• საბჭოთა კავშირის სპორტის დამსახურებული ოსტატი: 1979

ძირითადი შედეგები

დისციპლინა	წელი	ტურნირი	მასპინძელი	ადგილი
მშვილდოსნობა	1972	ევროპის ჩემპიონატი	ვალფერდანჟი, ლუქსემბურგი	01 
მშვილდოსნობა	1972	ევროპის ჩემპიონატი	ვალფერდანჟი, ლუქსემბურგი	01 
მშვილდოსნობა	1973	მსოფლიო ჩემპიონატი	გრენობლი, საფრანგეთი	01 
მშვილდოსნობა	1978	ევროპის ჩემპიონატი	სტოუნლეიგი, დიდი ბრიტანეთი	01 
მშვილდოსნობა	1980	ევროპის ჩემპიონატი	კომპიენი, საფრანგეთი	01 
მშვილდოსნობა	1980	ზაფხულის XXII ოლიმპიური თამაშები	მოსკოვი, სსრკ	01 
მშვილდოსნობა	1981	მსოფლიო ჩემპიონატი	პუნტა-ალა, იტალია	01 

პერიოდიკა

• ქეთევან ლოსაბერიძის შვიდი რეკორდი // „ლელო“, 30 მარტი, 1978, № 63 (6128), გვ. 1.
• ქეთევან ლოსაბერიძე — სსრ კავშირის თასის მფლობელი // „ლელო“, 26 ოქტომბერი, 1978, № 211 (6266), გვ. 1.
• ახალი მწვერვალებისაკენ! // „ლელო“, 31 დეკემბერი, 1978, № 256 (6311), გვ. 1.
• რესპუბლიკაში საუკეთესონი // „ლელო“, 31 დეკემბერი, 1981, № 250 (7061), გვ. 1.

ლიტერატურა

• ენციკლოპედია „თბილისი“, თბ., 2002. — გვ. 632, ISBN 99928-20-32-2.

რესურსები ინტერნეტში

• ქეთევან ლოსაბერიძე — საქართველოს ბიოგრაფიული ლექსიკონი
• ქეთევან ლოსაბერიძე — ბიოგრაფიული ლექსიკონი
• ქეთევან ლოსაბერიძე — ქართული სპორტი