მასალა ვიკიპედიიდან — თავისუფალი ენციკლოპედია
ფრიტა (ლათ. Alburnoides) — თევზების გვარი კობრისებრთა ოჯახისა. მათი სხეულის სიგრძე 8—14 სმ, მასა — 100 გ აღწევს. ფართოდ არის გავრცელებული ევროპის მტკნარ წყლებში, ალპებიდან ჩრდილოეთით და საფრანგეთიდან დასავლეთით, კავკასიაში, მცირე აზიის ჩრდილოეთ სანაპიროზე, ტიგროსისა და ევფრატის აუზში. ბინადრობს მდინარეებსა და ტბებში. ფრიტას სახეობები გვხვდება როგორც დასავლეთ (Alburnoides bipunctatus fasciatus), ისე აღმოსავლეთ (Alburnoides bipunctatus eichwaldi) საქართველოში. მოიპოვება ასევე ჯავახეთის ზეგანზე არსებულ მდინარეებში. ფრიტა გვხვდება ასევე ამტყელის ტბაში. სარეწაო მნიშვნელობა არ აქვს.
საქართველოში ფრიტას სახეობებს ხშირად „ნაფოტას“ უწოდებენ (შდრ. ნაფოტა).[1]