დნობის კუთრი სითბო

დნობის კუთრი სითბო, დნობის ენტალპია, კრისტალიზაციის კუთრი სითბო (სიმბოლო: λ) — სითბოს ის რაოდენობა, რომელიც საჭიროა დნობის ტემპერატურაზე ერთეული მასის კრისტალური ნივთიერების სითხედ გადაქცევისათვის, ანუ სხვა სიტყვებით — ნივთიერების ერთეული მასის დნობის სითბო.

დნობის სითბო — სითბოს რაოდენობა, რომელიც საჭიროა წონასწორული იზობარულ-იზოთერმული პროცესის დროს ნივთიერების გადასაყვანად მყარი (კრისტალური) მდგომარეობიდან თხევადში.

დნობის კუთრი სითბო აღინიშნება ასო $~\lambda$ (ბერძნული ლამბდა) დნობის კუთრი სითბოს გამოსათვლელი ფორმულაა: $\lambda ={\frac {Q}{m}}$, სადაც $~\lambda$ — დნობის კუთრი სითბოა, $~Q$ — სითბოს რაოდენობა, მიღებული ნივთიერების მიერ დნობისას (ან გამოყოფილი კრასტალიზაციისას), $~m$ — გასადნობი (კრისტალიზებად) ნივთიერების მასა.

დნობის კუთრი სითბო იზომება კალ/გ, კკალ/კგ და ჯ/კგ ერთეულებით. არსებობს აგრეთვე მოლური (გრამ-ატომური) დნობის სითბო, (ჯ/მოლ, კკალ/მოლ ან კალ/მოლ) დნობის სითბო.

ნივთიერება	დნობის კუთრი სითბო (კჯ/კგ)
ალუმინი	390
რკინა	277
ოქრო	66.2
ყინული	335
სპილენძი	213
ნაფტალინი	151
კალა	60.7
პლატინა	101
ვერცხლისწყალი	12
ტყვია	25
ვერცხლი	105
თუთია	102
თუჯი (თეთრი)	14
თუჯი (ნაცრისფერი)	100

იხილეთ აგრეთვე

• ენტალპია

ლიტერატურა

• ქართული საბჭოთა ენციკლოპედია, ტ. 3, თბ., 1978. — გვ. 599.
• Енохович А. С. Краткий справочник по физике. — М.: Высшая школа, 1976. — С. 114. — 288 с.