ცხენჭანარი[1] (ლათ.Hemibarbus) — თევზების გვარი კობრისებრთა ოჯახისა. გარეგნულად წვერას ან დიდ ციმორს ჰგვანან. პირის კუთხეებში თითო წყვილი ულვაში აქვთ, ზურგის ფარფლში ბლაგვი ეკალია.[2] ცნობილია 12 სახეობა.[3] გავრცელებული არიან ამურის აუზში, მონღოლეთის (ტბა ბუირ-ნური), ჩინეთის, კორეისა და იაპონიის წყალსატევებში. თეთრი ცხენჭანარი (H. labeo) სიგრძეში 58 სმ-ს აღწევს (მასა 1 კგ-მდე). იკვებება მწერების მატლებით, მოლუსკებით, იშვიათად თევზით. სქესობრივ სიმწიფეს 4–5 წელში აღწევს. ტოფობს პორციებად, მაის – ივლისში. დედალი ქვებზე ან მცენარეთა ფესვებზე ყრის 40–150 ათას წებოვან ქვირითს (დიამეტრი 2–3 მმ). ლაქებიანი ცხენჭანარი (H. maculatus) უფრო მცირე ზომისაა (40 სმ-მდე); ზურგისა და კუდის ფარფლებზე და ტანის გვერდებზე (გვერდითი ხაზის ზემოთ) მუქი ლაქები აყრია. ორივე ამ სახეობას მცირე სარეწაო მნიშვნელობა აქვს.[2]
