პატარა ჯიხაიშის განძი

პატარა ჯიხაიშის განძი — ვერცხლის მონეტებისა და ნივთების განძი. აღმოჩნდა 1946 წელს სოფელ პატარა ჯიხაიშში. ჩვენამდე მოაღწია 18 მონეტამ. განძის დიდი მეცნიერული მნიშვნელობა ისაა, რომ მასში შედის იმერეთის მეფის გიორგი II-ის (1565-1585) სახელით მოჭრილი 5 ქართული მონეტა, რომელთა ზუსტი ატრიბუცია შესაძლებელი გახდა ამ განძის აღმოჩენის შემდეგ.

აღნიშნული მონეტები 3 ტიპად იყოფა:

• I ტიპი — შუბლზე სქემატურადაა გამოსახული წვერულვაშიანი მამაკაცის თავი ფასში, ზურგზე - ქართული ასომთავრული წარწერა: „მეფე გიორგი“;
• II ტიპი — შუბლზე ორსტრიქონიანი წარწერაა: „მეფეთა მეფე“; ზურგზე — „მეფე გიორგი“;
• III ტიპი — შუბლზე ადამიანის თავის მარცხენა პროფილია, შუბლთან — ასომთავრულად „გ“, ზურგზე — მარცხნივ მიმართული რომელიღაც ცხოველის გამოსახულება.

განძის შემადგენლობაში შედის აგრეთვე 1574 წელს (ჰიჯრით 982) მოჭრილი 4 თურქული ახჩა და სინქრონული 9 ირანული მონეტა და მათი მინაბაძები.განძი ჩაფლული უნდა იყოს XVI საუკუნის II ნახევარში.

ლიტერატურა

• დუნდუა გ., ქართული საბჭოთა ენციკლოპედია, ტ. 7, თბ., 1984. — გვ. 710.
• ლომოური თ., პატარა-ჯიხაიშში აღმოჩენილი XVI საუკუნის განძის გამო, «ს. ჯანაშიას სახელობის საქართველოს სახელმწიფო მუზეუმის მოამბე», 1953, ტ. 17 B.