მიროლდა

მიროლდა
	კოორდინატები: 46°05′21″ ჩ. გ. 6°46′15″ ა. გ. / 46.08917° ჩ. გ. 6.77083° ა. გ.
ქვეყანა	საფრანგეთი
ტერიტორიული ერთეული	ზემო სავოია
აბსოლუტური სიმაღლე	1880 მ
სიგრძე	13 000 მ
სიღრმე	1733 მ
სირთულის კატეგორია	5B
ამგებელი ქანები	კირქვა

მიროლდა (ფრანგ. Gouffre Mirolda) — კარსტული მღვიმე საფრანგეთში, ზემო სავოიის დეპარტამენტში. მდებარეობს სავოიის ალპებში, ზღვის დონიდან 1880 მ სიმაღლეზე. გამომუშავებულია კირქვებში. მსოფლიოს ერთ-ერთი უღრმესი კარსტული მღვიმე. სიღრმე 1733 მ.^[1] სიგრძე დაახლოებით 13 000 მ. მომცრო ჭებთან ერთად წარმოქმნის სუსტად განტოტებულ გაწყლოვანებული გალერეებისა და მეანდრების სხვადასხვა დონის სისტემას.^[2] 1990 წლისათვის მღვიმის სიღრმე შეადგენდა 1221 მ-ს.^[3] 1998 წლის იანვარში დაფიქსირდა ახალი სიღრმე — 1610 მ, რითაც 8 მ-ით გადააჭარბა მეზობლად მდებარე ჟან-ბერნარის მღვიმეს და გახდა პლანეტის უღრმესი მღვიმე. 1998 წლის აგვისტოში მსოფლიოს უღრმესი მღვიმე გახდა ლამპრეხტსოფენი 1632 მ სიღრმით. 2001 წელს მიროლდა მე-3 ადგილზე გადაანაცვლა კრუბერის გამოქვაბულმა, რომლის სიღრმე იმ დროისათვის 1710 მ უდრიდა. 2003 წლის იანვარში სპელეოლოგების მიერ მღვიმის ფსკერზე არსებული რთული სიფონის დაძლევის შემდეგ, მიროლდა კვლავ გახდა მსოფლიოს უღრმესი მღვიმე 1733 მ-ით,^[4] თუმცა ერთი წლის შემდეგ პირველობა კვლავ დაუთმო კრუბერის გამოქვაბულს. მიროლდა საერთაშორისო ექსპედიციების ობიექტია.