გომბეშოსებრნი (ლათ.Bufonidae) — უკუდო ამფიბიების ოჯახი. გავრცელებული არიან ყველა კონტინენტზე. ცხოვრობენ ოკეანურ კუნძულებზეც. ცნობილია 1200-ზე მეტი სახეობა, რომლებიც გაერთიანებული არიან 7 ქვეოჯახში: ავსტრალიური გომბეშოები (Criniinae), მთისა (Heleophryninae), თითფაროსანნი (Elosinae), სამხრეთ-ამერიკულნი (Preudinae), ცხვირა (Rhynophryninae), სტვენია (Leptodactylinae) და საკუთრივ გომბეშოები (Bufoninae).
ყველაზე პრიმიტიული არიან ავსტრალიური გომბეშოები, რომლებსაც ქორდის ნაშთები აქვთ შერჩენილი. საკუთრივ გომბეშოებს კბილები არა აქვთ. გავრცელებული არიან ფართოდ. მათი 6 გვარიდან ყველაზე პრიმიტიულია ცოცხლადმშობი ნექტოფრინა (Nectophrynoides), ყველაზე გავრცელებული კი — გომბეშო (Bufo). საქართველოშიც არის გავრცელებული. გომბეშოსებრი სპობენ ბაღ-ბოსტნების მავნებელ მწერებს და ამით დიდი სარგებლობა მოაქვთ. მათი კანის ჯირკვლების გამონაყოფი შხამიანი ნივთიერება სასიკვდილოა ზოგიერთი ცხოველისათვის.
