რილა

რილა
კოორდინატები: 42°06′00″ ჩ. გ. 23°33′00″ ა. გ.
ქვეყანა	ბულგარეთი
უმაღლესი წერტილი	მუსალა
სიმაღლე	2925 მ

რილა, რილა-პლანინა (ბულგ. Рила, Рила-Планина) — მთის მასივი ბულგარეთის სამხრეთ-დასავლეთ ნაწილში; უმაღლესია ბალკანეთის ნახევარკუნძულზე. სიმაღლე 2925 მ-მდე (მთა მუსალა). უმთავრესად აგებულია ძველი კრისტალური და მეტამორფული ქანებით. დამახასიათებელია წვეტიანი მწვერვალები, რელიეფის მყინვარული ფორმები, ტბები. მასივიდან სათავეს იღებენ მდინარეები: ისკირი, მარიცა, მესტა. კალთები შემოსილია მუხის, წიფლისა და წიწვოვანი ტყით, 2000-2100 მ-ის ზევით სუბალპური და ალპური მდელოებია. განვითარებულია ხე-ტყის დამუშავება, საძოვრო მესაქონლეობა. არის მინერალური წყაროები, არქიტექტურული ძეგლები. კურორტები, ტურიზმი, ალპინიზმი, სათხილამურო სპორტი. მასივის დიდი ნაწილი უკავია ეროვნულ პარკს. სამხრეთ-დასავლეთ განშტოებებზეა X საუკუნის რილის მონასტერი.

ლიტერატურა

• ქართული საბჭოთა ენციკლოპედია, ტ. 8, თბ., 1984. — გვ. 390.